ଭୁବନେଶ୍ବର,୩ା୭(ସୁନିତ୍ ମିଶ୍ର): ଦେଶର ସବୁ ରାଜ୍ୟକୁ ନେଇ ଭାଜପା ଗୁଆହାଟୀଠାରେ ଆସନ୍ତା ୬ ତାରିଖରୁ ୩ ଦିନିଆ ବୈଠକ ଡାକିଛି। ଆସନ୍ତା ୬, ୭ ଏବଂ ୮ ତାରିଖରେ ହେବାକୁ ଥିବା ଏହି ବୈଠକରେ ଦେଶକୁ ୩ଟି ଜୋନ୍ରେ ଭାଗ କରି ପ୍ରତ୍ୟେକ ଦିନ କିଛି କିଛି ରାଜ୍ୟ ସହ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା ଏବଂ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଆଲୋଚନା କରିବେ। ଏଥିରେ ମୁଖ୍ୟତଃ ସେମାନେ ଗୋଟିଏ ରାଜ୍ୟ ସହ ପ୍ରାୟ ୨ ଘଣ୍ଟା ଲେଖା ଆଲୋଚନା କରି ଦଳର ଭବିଷ୍ୟତ ରଣନୀତି ସମ୍ପର୍କରେ ଏକ ପ୍ରକାର ସମୀକ୍ଷା କରିବେ ବୋଲି ଜଣାପଡ଼ିଛି। ତେବେ ଆସନ୍ତା ୬ ତାରିଖରେ ପୂର୍ବାଞ୍ଚଳ ରାଜ୍ୟଗୁଡିକର ବୈଠକ ରହିଛି। ସେହିକ୍ରମରେ ଓଡ଼ିଶା ଏହି ବୈଠକରେ ଯୋଗଦେବ। ଏଥିରେ ଦଳର ରାଜ୍ୟ ସଭାପତି ମନମୋହନ ସାମଲ, ରାଜ୍ୟ ପ୍ରଭାରୀ ଡି ପୁରନ୍ଦେଶ୍ୱରୀ, କ୍ଷେତ୍ରୀୟ ପ୍ରଭାରୀ ସୁନୀଲ ବଂଶଲ ଏବଂ ସଙ୍ଗଠନ ସମ୍ପାଦକ ମାନସ ମହାନ୍ତି ଯୋଗଦେବାର କାର୍ଯ୍ୟକ୍ରମ ରହିଛି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ମଧ୍ୟ ଡକାଯାଇଥିବା ସୂଚନା ମିଳିଛି। ବୈଠକରେ ୨୦୨୪ ସାଧାରଣ ନିର୍ବାଚନ ଲାଗି ଦଳ କେତେ ପ୍ରସ୍ତୁତ ଏବଂ କିପରି ସଙ୍ଗଠନକୁ ସଜଡ଼ାଯିବ ସେନେଇ ଆଲୋଚନା ହେବ। ଓଡ଼ିଶାର ଯେଉଁଦିନ ବୈଠକ ବସିବ ସେଦିନ ଅନ୍ୟ ୧୧ଟି ରାଜ୍ୟ ସହ ମଧ୍ୟ କେନ୍ଦ୍ରୀୟ ନେତୃତ୍ୱ ଆଲୋଚନା କରିବା କାର୍ଯ୍ୟକ୍ରମ ରହିଛି। ଏହି ବୈଠକରେ ମୁଖ୍ୟତଃ ଓଡ଼ିଶା କିପରି ସରକାର କରିବ ସେନେଇ ଆଲୋଚନା ହେବ ବୋଲି ଭାଜପା ରାଜ୍ୟ ସଭାପତି ମତ ରଖିଥିବା ବେଳେ ଗୁଆହାଟୀ ବୈଠକର କୌଣସି ପ୍ରଭାବ ଓଡ଼ିଶା ଉପରେ ପଡ଼ିବ ନାହିଁ ବୋଲି ବିଜେଡି ଏବଂ କଂଗ୍ରେସ ମତ ରଖିଛନ୍ତି।
ମନମୋହନ କହିଛନ୍ତି, ଓଡ଼ିଶାର ଏକ ବହୁମତ ସରକାର ହେବ। କେନ୍ଦ୍ରରେ ମଧ୍ୟ ଏଥର ୩ୟ ଥର ପାଇଁ ଭାଜପା ସରକାର କରିବ। ଅନ୍ୟପକ୍ଷରେ ବିଜେଡି ବିଧାୟକ ଧ୍ରୁବ ସାହୁ କହିଛନ୍ତି ଯେ, ୨୦୧୯ରେ ଭାଜପା ଯେଉଁ ମିଶନ ୧୨୦ ପ୍ଲସ୍ କଥା କହୁଥିଲା ତା’ର ଫଳାଫଳ କ’ଣ ହେଲା ସେକଥା ସମସ୍ତେ ଦେଖିଲେ। ସେମାନେ ସବୁବେଳେ ବାହୁସ୍ଫୋଟ ମାରନ୍ତି ଏବଂ ଓଡ଼ିଶା ଲୋକ ସେମାନଙ୍କୁ ଠିକଣା ସମୟରେ ଜବାବ ଦିଅନ୍ତି। କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି, ବିଜେଡି-ଭାଜପା ଭିତରେ ୨୪ ବର୍ଷ ହେଲା ସାଲିସ୍ ରାଜନୀତି ଚାଲିଛି। ଏବେ ତୃଣମୂଳସ୍ତରରେ ଲଢ଼େଇ କରିବାକୁ ବସିଛନ୍ତି। ଏହାର କାରଣ ହେଉଛି ବିଜେଡିକୁ ଯେଉଁ ପୋଷ୍ଟ ନ ଯିବ, ସେଇଟା ଭାଜପାକୁ କିପରି ଯିବ ସେନେଇ ଯୋଜନା କରୁଛନ୍ତି। ସେମାନଙ୍କ ଲଢ଼େଇର ଏହା ହେଉଛି ସବୁଠାରୁ ବଡ଼ କଥା ବୋଲି ତାରା କହିଛନ୍ତି।
