ଭୁବନେଶ୍ୱର, ୨।୨ (କ୍ରୀଡ଼ା ପ୍ରତିନିଧି): ମଧ୍ୟପ୍ରଦେଶର ବିଭିନ୍ନ ସହରରେ ଖେଲୋ ଇଣ୍ଡିଆ ୟୁଥ୍ ଗେମ୍ସର ୫ମ ସଂସ୍କରଣ ଆରମ୍ଭ ହୋଇଯାଇଛି। ଆସନ୍ତା ୧୧ ତାରିଖ ପର୍ଯ୍ୟନ୍ତ ଚାଲିବାକୁଥିବା ପ୍ରତିଯୋଗିତାର ଆଥ୍ଲେଟିକ୍ସ ଇଭେଣ୍ଟ ପାଇଁ ବୁଧବାର ଓଡ଼ିଶା ଆଥ୍ଲେଟିକ୍ସ ଦଳ ଘୋଷିତ ହୋଇଛି। ଆଥ୍ଲେଟିକ୍ସ ଇଭେଣ୍ଟ ୩ରୁ ୫ ପର୍ଯ୍ୟନ୍ତ ଅନୁଷ୍ଠିତ ହେବ। ଏଥିରେ ରାଜ୍ୟର ୫ ବାଳିକା ଓ ୧୧ ବାଳକ ଅଂଶଗ୍ରହଣ କରିବେ। ବାଳକ ବିଭାଗର ୧୦୦ ମିଟରରେ ଦଣ୍ଡପତି ମୃତ୍ତି ଜୟରାମ, ୧୧୦ ମିଟର ହର୍ଡଲ୍ସରେ ରାଜେନ୍ଦ୍ର ସିଧୁ ଓ ନୀତୀଶ କୁଲି, ଟ୍ରିପଲ ଜମ୍ପରେ ସ୍ବାଗତ ବେହେରା, ୨୦୦ ମିଟରରେ ମହମ୍ମଦ ରେୟାଦ ବାସା ଓ ୮୦୦ ମିଟରରେ ପଙ୍କଜ ମଣ୍ଡଳ ଭାଗନେବେ। ସେହିପରି ବାଳିକା ୧୦୦ ମିଟର ହର୍ଡଲ୍ସ ଓ ଲଙ୍ଗଜମ୍ପରେ ସବିତା ଟପ୍ପୋ, ୮୦୦ ମିଟରରେ ଲକ୍ଷ୍ମୀପ୍ରିୟା କିଷାନ, ଲଙ୍ଗଜମ୍ପରେ ଯମୁନା ଟୁଡୁ, ଜାଭେଲିନ ଥ୍ରୋରେ ଜ୍ୟୋତ୍ସ୍ନା ପ୍ରିୟଦର୍ଶିନୀ ସାହୁ ଓ ଟ୍ରିପଲ ଜମ୍ପରେ ମେରୀ ମୁକ୍ତା ସୋରେଙ୍ଗ ଅଂଶଗ୍ରହଣ କରିବେ।
