ବରଗଡ,୮।୧(ପ୍ରେମାନନ୍ଦ ଖମାରୀ): ବରଗଡ଼ କ୍ରୀଷ୍ଣା ବିକାଶ ଗ୍ରାଉଣ୍ଡରେ ରବିବାର ଓଡ଼ିଶା ଓ ସୌରାଷ୍ଟ୍ର ମଧ୍ୟରେ ୨୩ ବର୍ଷରୁ କମ୍ ବୟସ ବର୍ଗର ସି. କେ. ନାଇଡୁ ଟ୍ରଫି ଉଦ୍ଘାଟିତ ହୋଇଯାଇଛି। ପ୍ରଥମେ ସୌରାଷ୍ଟ୍ର ଦଳର ଅଧିନାୟକ ଜୟ ଗୋହିଲ ଟସ୍ ଜିଣି ଓଡ଼ିଶା ଦଳକୁ ବ୍ୟାଟିଂ କରିବାକୁ ଆମନ୍ତ୍ରଣ କରିଥିଲେ। ସୌରାଷ୍ଟ୍ର ଦଳର ଫାଷ୍ଟ ବୋଲରଙ୍କ ଘାତକ ବୋଲିଂ ଯୋଗୁ ଓଡ଼ିଶା ଦଳର ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟ ହୋଇଥିଲା। ଓଡ଼ିଶା ଦଳ ମଧ୍ୟାହ୍ନଭୋଜନ ବିରତି ସୁଦ୍ଧା ୬ଉଇକେଟ ବିନିମୟରେ ମାତ୍ର ୫୪ ରନ କରିଥିଲା। ତେବେ ପ୍ରାରମ୍ଭିକ ବ୍ୟାଟ୍ସମ୍ୟାନ୍ ଓମ୍. ଟି. ମୁଣ୍ଡେ ଓ ୮ନମ୍ବର ବ୍ୟାଟ୍ସମ୍ୟାନ ସାୱନ ପାହାରିଆଙ୍କ ମଧ୍ୟରେ ମହତ୍ୱପୂର୍ଣ୍ଣ ପାର୍ଟନରଶିପ୍ ଯୋଗୁ ଦଳର ସ୍ଥିତିରେ ସୁଧାର ଆସିଥିଲା। ଉଭୟେ ଅର୍ଦ୍ଧଶତକ ହାସଲ କରିଥିଲେ। ମୁଣ୍ଡେ ୧୯୭ ବଲ ଖେଳି ୫ ଚୌକା ସହ ୫୯ ରନ କରି ଆଉଟ୍ ହୋଇଥିଲେ। ପାହାରିଆ ୧୫୦ବଲ ଖେଳି ୧୪ଚୌକା, ୧ ଛକା ସହ ୮୧ ରନ କରି ଅପରାଜିତ ରହିଥିଲେ। ଅନ୍ୟ କୌଣସି ଖେଳାଳି ଦୁଇ ଅଙ୍କରେ ପହଞ୍ଚତ୍ ପାରି ନ ଥିଲେ। ସୌରାଷ୍ଟ୍ର ଦଳ ପକ୍ଷରୁ ଧର୍ମାଦିତ୍ୟ ସିଂ ଗୋହିଲ୍ ୪୮ ରନ ଦେଇ ୫ ଉଇକେଟ ନେଇଥିଲେ। ସେହିପରି ନିଲ ପାଣ୍ଡ୍ୟା ୪୦ ରନ ବିନିମୟରେ ୩ ଏବଂ ପବନ ପାର୍ମାର ୩୫ରନ ବିନିମୟରେ ୨ ଉଇକେଟ ନେଇଥିଲେ। ଜବାବରେ ରବିବାର ଖେଳ ଶେଷ ସୁଦ୍ଧା ସୌରାଷ୍ଟ୍ର ଦଳ କୌଣସି ଉଇକେଟ ନ ହରାଇ ୩୮ ରନ କରିଛି। ଏହି ମ୍ୟାଚ୍ ପାଇଁ ବିସିସିଆଇ ପକ୍ଷରୁ ବାଲକ୍ରୀଷ୍ଣା ମିସକୁଇନ ମ୍ୟାଚ୍ ରେଫରି, ଦୀପକ ଡିଏଲ ଓ ବିକାଶ ଭଟ୍ଟ ଅମ୍ପାୟର ରହିଛନ୍ତି। ସେହିପରି ତାପସ ନାୟକ ସିନିୟର୍ ଭିଡିଓ ଆନାଲିଷ୍ଟ ଏବଂ ସାୱନ ପାଢ଼ୀ ଜୁନିୟର ଭିଡିଓ ଆନାଲିଷ୍ଟ ଅଛନ୍ତି। ସି.ଡି. ସୁନୀଲ ଅନ୍ଲାଇନ୍ ସ୍କୋରର ଏବଂ ବୀରବର ନାୟକ ମାନୁଆଲ ସ୍କୋରର ଅଛନ୍ତି।
ଉଦ୍ଘାଟନୀ ଉତ୍ସବରେ କ୍ରୀଷ୍ଣା ବିକାଶ ଗ୍ରୁପ୍ର ପରିଚାଳନା ନିର୍ଦ୍ଦେଶକ ଡି. ବିବେକ ଓ ଜିଲା କ୍ରିକେଟ ଆସୋସିଏଶନ ସଭାପତି ହରିହର ପ୍ରଧାନ ଅତିଥି ଭାବେ ଯୋଗଦେଇ ମ୍ୟାଚ୍କୁ ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ଜିଲା କ୍ରିକେଟ ଆସୋସିଏଶନର ପୂର୍ବତନ ସମ୍ପାଦକ ସୁବ୍ରତ ଚାଟାର୍ଜୀ, ଉପସଭାପତି ଶୁଭ୍ରାଂଶୁ ଶେଖର ମହାପାତ୍ର, କୋଷାଧ୍ୟକ୍ଷ ଗୁରୁଦତ୍ତ ଦାଶ, ଯୁଗ୍ମ ସମ୍ପାଦକ ସଚ୍ଚିଦାନନ୍ଦ ପଣ୍ଡା, ଗିରିଜା ପ୍ରସାଦ ନାଥ, ପ୍ରଦୀପ ନନ୍ଦ, ଚନ୍ଦ୍ରଶେଖର ପ୍ରଧାନ, ପ୍ରଦୀପ ସାହୁ, ଅମୀୟ ଭୂଷଣ ସାହୁ, ରଜତ ଦାଶ, କ୍ରୀଷ୍ଣା ବିକାଶ ଗ୍ରୁପ୍ର ଡାଇରେକ୍ଟର ଡ. ସମରେନ୍ଦ୍ର ନାଥ ପଣ୍ଡା, ସିନିୟର ସେକେଣ୍ଡାରୀ ସ୍କୁଲ ଅଧ୍ୟକ୍ଷ ଚିତ୍ତରଞ୍ଜନ ପତି, କ୍ରୀଡ଼ା ସଂଯୋଜକ ପୀତାମ୍ବର ପ୍ରଧାନ, କ୍ରିକେଟ କୋଚ୍ ଅଶୋକ ସିଂ, ଆସିଷ୍ଟାଣ୍ଟ କୋଚ୍ ରୂପକ ପ୍ରଧାନ ପ୍ରମୁଖ ଉପସ୍ଥିତ ଥିଲେ। ଜିଲା କ୍ରିକେଟ ଆସୋସିଏଶନ ସମ୍ପାଦକ ରବି ପଣ୍ଡା ପୌରୋହିତ୍ୟ କରିଥିବା ବେଳେ ବରିଷ୍ଠ ସଦସ୍ୟ ସନ୍ତୋଷ ପଣ୍ଡା କାର୍ଯ୍ୟକ୍ରମ ସଂଯୋଜନା କରିଥିଲେ। ଓଡ଼ିଶା କ୍ରିକେଟ ଆସୋସିଏଶନ ଆନୁକୂଲ୍ୟରେ ଓ ବରଗଡ଼ ଜିଲା କ୍ରିକେଟ ଆସୋସିଏଶନ ଆୟୋଜନରେ ଏହି ମ୍ୟାଚ ଅନୁଷ୍ଠିତ ହେଉଛି।
