ରାଉରକେଲା ଅଫିସ,୨୧ା୧୨: ବିର୍ସାମୁଣ୍ଡା ଅନ୍ତର୍ଜାତୀୟ ହକି ଷ୍ଟାଡିୟମରେ ପୁରୁଷ ହକି ବିଶ୍ୱକପ୍ ଖେଳାଯିବାକୁ ଆଉ ଅଳ୍ପଦିନ ବାକି ରହିଛି। ଏଥିପାଇଁ ଷ୍ଟାଡିୟମର ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚତ୍ଛି। ଅନ୍ୟପଟେ ସ୍ଥାନୀୟ ପ୍ରଶାସନ ପକ୍ଷରୁ ହକି ବିଶ୍ୱକପକୁ ଅଧିକ ରୋମାଞ୍ଚକ କରିବା ପାଇଁ ଜିଲାର ବିଭିନ୍ନ ଗ୍ରାମଠାରୁ ଆରମ୍ଭ କରି ସହର ପର୍ଯ୍ୟନ୍ତ ବିଭିନ୍ନ ଏଲ୍ଇଡି ସ୍କ୍ରିନର ବ୍ୟବସ୍ଥା କରାଯାଉଛି। ଆଉ କେତେକ ସ୍ଥାନରେ ହକି ଖେଳାଳିଙ୍କ ଷ୍ଟାଚ୍ୟୁ ନିର୍ମାଣ ଚାଲିଛି। ଷ୍ଟିଲ୍ସିଟି ରାଉରକେଲାରେ ପ୍ରଥମ ଥର ବିଶ୍ୱକପ୍ ହକି ମ୍ୟାଚର ଆୟୋଜନ ହେଉଥିବାବେଳେ ଏଠାରେ ସମୁଦାୟ ୨୦ଟି ମ୍ୟାଚ ଖେଳାଯିବ। ସେଥିମଧ୍ୟରୁ ୨୦୨୩ ଜାନୁୟାରୀ ୧୩ରେ ପ୍ରଥମ ମ୍ୟାଚ ଭାରତ ସହ ସ୍ପେନ ଦଳ ମଧ୍ୟରେ ଖେଳାଯିବ। ଏହି ମ୍ୟାଚକୁ ଦେଖିବା ପାଇଁ ଷ୍ଟାଡିୟମ ପରିସରରେ ଦୁଇଟି ଅଫ୍୍ଲାଇନ ଟିକେଟ କାଉଣ୍ଟର ବ୍ୟବସ୍ଥା କରାଯାଇଥିବାବେଳେ ପ୍ରତିଦିନ ଏହି ଟିକେଟ କାଉଣ୍ଟରରେ ଭିଡ ଦେଖିବାକୁ ମିଳୁଛି। ଆସନ୍ତା ୨୪ ତାରିଖରେ ଜିଲା ତଥା ସହରବାସୀ ବିର୍ସାମୁଣ୍ଡା ଷ୍ଟାଡିୟମରେ ଜୁନିୟର ଭାରତ ଦଳ ସହ ଦକ୍ଷିଣ କୋରିଆ ଦଳର ଅଭ୍ୟାସ ମ୍ୟାଚ ଖେଳ ଦେଖିବାକୁ ସୁଯୋଗ ପାଇପାରିବେ। ଆଉ ମାତ୍ର ୨ ଦିନ ପରେ ଜୁନିୟର ଭାରତ ଦଳ ଦକ୍ଷିଣ କୋରିଆ ଦଳ ସହ ଅଭ୍ୟାସ ମ୍ୟାଚ ଖେଳି ବିଜୟୀ ହୋଇ ବିଶ୍ୱକପକୁ ସ୍ବାଗତ କରିବ ବୋଲି ବିଭିନ୍ନ କ୍ରୀଡାପ୍ରେମୀ ଆଶା କରିଛନ୍ତି। ଏହି ଅଭ୍ୟାସ ମ୍ୟାଚରେ ଭାରତ ଜୁନିୟର ଦଳରେ ସୁନ୍ଦରଗଡ ଜିଲାର ସୁଦୀପ ଚିର୍ମାକୁ, ଅଭିଷେକ ଲାକ୍ରା, ସୁନୀଲ ଜୋଜୋ ଓ ଶିଉଲ ଲୁଗୁନ ନିଜର ହକିଷ୍ଟିକ ଯାଦୁ ଦେଖାଇବେ । ହକି ତାରକା ଉତ୍ତମ ସିଂଙ୍କ ନେତୃତ୍ୱରେ ଭାରତ ଜୁନିୟର ହକି ଦଳ ଦକ୍ଷିଣ କୋରିଆ ସହ ଅଭ୍ୟାସ ମ୍ୟାଚ ଖେଳିବ। ଏହି ଅଭ୍ୟାସ ମ୍ୟାଚକୁ ବିଭିନ୍ନ କ୍ରୀଡାପ୍ରେମୀ ବିନା ଟିକେଟରେ ଦେଖିପାରିବେ। ଉଭୟ ଦଳର ସମସ୍ତ ଖେଳାଳିଙ୍କ ଦକ୍ଷତାପୂର୍ଣ୍ଣ ମ୍ୟାଚକୁ ଦେଖିବା ପାଇଁ ଷ୍ଟାଡିୟମରେ ଭିଡ ଓ ଟ୍ରାଫିକ ବ୍ୟବସ୍ଥାକୁ ନିୟନ୍ତ୍ରଣ କରିବା ପାଇଁ ସ୍ଥାନୀୟ ପୋଲିସ ପ୍ରଶାସନ ପକ୍ଷରୁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ଏଥିସହ ଷ୍ଟାଡିୟମ ପରିସରରେ ସମସ୍ତ ଖେଳାଳିମାନଙ୍କ ପାଇଁ ୪ଟି ହୋଟେଲରେ ବ୍ୟବସ୍ଥା ସହ ଏ, ବି, ସି, ଡି ବ୍ଲକରେ ବିଭକ୍ତ କରାଯାଇଛି। ଏହି ହୋଟେଲରେ ଖେଳାଳିମାନଙ୍କ ପାଇଁ ଅତ୍ୟାଧୁନିକ ଜିମ୍ ଉପକରଣ ସାଙ୍ଗକୁ ଡ୍ରେସିଂରୁମ, ସୁଇମିଂପୁଲ ଭଳି ଅନ୍ୟାନ୍ୟ ଉନ୍ନତ ଧରଣର ବ୍ୟବସ୍ଥା ସହ ୨୧୬ଟି କକ୍ଷ ରହିବା ପାଇଁ ବ୍ୟବସ୍ଥା କରାଯାଇଛି। ଖେଳାଳିମାନଙ୍କ ଖାଦ୍ୟପେୟ ବ୍ୟବସ୍ଥା ପାଇଁ ବମ୍ବେର ତାଜ୍ ହୋଟେଲରୁ ୧୫୦ ଜଣ ରୋଷେୟାଙ୍କୁ ଚୟନ କରାଯାଇଛି। ଆସନ୍ତା ଜାନୁୟାରୀ ୫ରେ ଖେଳାଳିମାନେ ରାଉରକେଲାରେ ପହଞ୍ଚିବେ। ସେମାନଙ୍କ ଲାଗି ପାନପୋଷ ଛାତ୍ର କ୍ରୀଡ଼ାବାସ, ବିର୍ସାମୁଣ୍ଡା ଷ୍ଟାଡିୟମରେ ଥିବା ଆଷ୍ଟ୍ରୋଟର୍ଫ ଫିଲ୍ଡ ସହ ଅନ୍ୟ କେତେକ ଆଷ୍ଟ୍ରୋ ପଡିଆରେ ଅଭ୍ୟାସ କରିବା ପାଇଁ ବ୍ୟବସ୍ଥା କରାଯାଇଛି।
