ମୟୂରଭଞ୍ଜ,୩ା୮: ମୟୂରଭଞ୍ଜ ଜିଲାର ମହାରାଜା ଶ୍ରୀରାମ ଚନ୍ଦ୍ର ଭଞ୍ଜ ଦେଓ ବିଶ୍ୱବିଦ୍ୟାଳୟ (MSCBU) ଅଧୀନରେ ନର୍ସିଂ ଟେକ୍ନୋଲୋଜି ପାଠ୍ୟକ୍ରମରେ ଅଧ୍ୟୟନରତ ଛାତ୍ରୀମାନେ ଦୁଇ ବର୍ଷ ଧରି ପରୀକ୍ଷା ଅନୁଷ୍ଠିତ ନହେବାରୁ ଗଭୀର ମାନସିକ ସଙ୍କଟରେ ଅଛନ୍ତି। ପରୀକ୍ଷା ଓ ସାର୍ଟିଫିକେଟ ନ ମିଳିବା ଯୋଗୁଁ କ୍ୟାରିୟର ଅଟକି ରହିଥିବାରୁ ଛାତ୍ରୀମାନେ ଆତ୍ମହତ୍ୟା ବା ଆତ୍ମଦାହ ଧମକ ଦେଇଛନ୍ତି।
ବାରିପଦାର ବିଭିନ୍ନ ନର୍ସିଂ କଲେଜରେ ମେଡିକାଲ ରେଡିଓଲୋଜି, ଲାବୋରେଟୋରୀ ଟେକ୍ନୋଲୋଜି ଓ ଅପ୍ଟୋମେଟ୍ରୀରେ ବି.ଏସ୍.ସି ଅଧ୍ୟୟନରତ ଅଧିକାଂଶ ଛାତ୍ରୀ କହିଛନ୍ତି, ତିନି ବର୍ଷର ପାଠ୍ୟକ୍ରମ ଦୁଇ ବର୍ଷ ପୂର୍ବେ ଶେଷ ହୋଇଥିଲେ ମଧ୍ୟ ପରୀକ୍ଷା ହୋଇନାହିଁ। ଏହା ଯୋଗୁଁ ସରକାରୀ ନିଯୁକ୍ତି ସୁଯୋଗ ହାତଛଡ଼ା ହୋଇଛି। ଅଧିକାଂଶ ଛାତ୍ରୀ ବିଶ୍ୱବିଦ୍ୟାଳୟର ପରୀକ୍ଷା ନିୟନ୍ତ୍ରକଙ୍କୁ ଭେଟି ତୁରନ୍ତ ପରୀକ୍ଷା କିମ୍ବା ସାର୍ଟିଫିକେଟ ପ୍ରଦାନ ପାଇଁ ଦାବି କରିଛନ୍ତି।
ପରୀକ୍ଷା ନିୟନ୍ତ୍ରକ ସୁବ୍ରତ କୁମାର ରାଣା ଦୋଷ ସ୍ୱୀକାର କରି କହିଛନ୍ତି, ପ୍ରଶ୍ନପତ୍ର ପ୍ରସ୍ତୁତିରେ ଅସୁବିଧା ଓ ଅନୁବନ୍ଧିତ ମେଡିକାଲ କଲେଜରୁ ସହଯୋଗ ଅଭାବ ହେତୁ ବିଳମ୍ବ ହୋଇଛି। ସେ ଆଗାମୀ ଦୁଇ ମାସ ମଧ୍ୟରେ ପରୀକ୍ଷା ଅନୁଷ୍ଠାନର ପ୍ରତିଶ୍ରୁତି ଦେଇଛନ୍ତି, କିନ୍ତୁ ଛାତ୍ରୀମାନେ ଏହା ଉପରେ ସନ୍ଦେହ ପ୍ରକାଶ କରିଛନ୍ତି।
ଏହି ଘଟଣା ବିଶ୍ୱବିଦ୍ୟାଳୟର ପ୍ରଶାସନିକ ବିଫଳତାକୁ ଉଜାଗର କରିଛି ଏବଂ ଯୁବପିଢ଼ିର ଭବିଷ୍ୟତ ଗଢ଼ିବା ପାଇଁ ଦାୟୀ ଅନୁଷ୍ଠାନଗୁଡ଼ିକର ଜବାବଦେହିତା ଉପରେ ଗଭୀର ପ୍ରଶ୍ନ ଉଠାଇଛି।
