ପୋଲସରା,୧୭ା୪: ସରକାରୀ ମେଡ଼ିକାଲରେ ଗର୍ଭବତୀଙ୍କଠାରୁ ଜୋର ଜବରଦସ୍ତି ନର୍ସ ଟଙ୍କା ମାଗୁଛନ୍ତି। ନହେଲେ ଶିଶୁକୁ ଛାଡ଼ିବୁ ନାହିଁ ବୋଲି ଧମକ ଦେଉଥିବା ଅଭିଯୋଗ କରିଛନ୍ତି ଜଣେ ଗର୍ଭବତୀ ମହିଳା। ପୋଲସରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଏପରି ଘଟଣା ଘଟୁଥିବା ଅଭିଯୋଗ ଆଣିଛନ୍ତି ଡିମ୍ବିରିଆ ଗ୍ରାମର ଗର୍ଭବତୀ ମହିଳା ଶିବାନୀ ପ୍ରଧାନ। ତାଙ୍କ ଅଭିଯୋଗ ପ୍ରକାରେ, ଗତ ୧୨ ତାରିଖ ବୁଧବାର ପୋଲସରା ସରକାରୀ ମେଡିକାଲରେ ରାତି ୮ଟାରେ ଶିବାନୀଙ୍କ ଏକ ଶିଶୁକନ୍ୟା ଜନ୍ମ ହୋଇଥିଲା। ସେହି ସମୟରେ କାର୍ଯ୍ୟରତ ନର୍ସ ଜୋତ୍ସ୍ନାରାଣୀ ନନ୍ଦ ଓ ଜୟନ୍ତୀ ପାତ୍ର ଗର୍ଭବତୀ ମହିଳାଙ୍କ ବାପାକୁ ୨୦୦୦ ଟଙ୍କା ମାଗିଥିଲେ। ତାଙ୍କ ବାପା ସରକାରୀ ମେଡିକାଲରେ କାହିଁକି ଟଙ୍କା ଦେବି ପଚାରିବାରୁ, ଟଙ୍କା ନଦେଲେ ଆମେ ଶିଶୁକନ୍ୟାକୁ ହସ୍ତାନ୍ତର କରିବୁ ନାହିଁ ବୋଲି କହିଥିବା ଅଭିଯୋଗ ପତ୍ରରେ ଉଲ୍ଲେଖ ରହିଛି। ତେବେ ନର୍ସଙ୍କ କଥାରେ ରାଜି ହୋଇ ପରିବାର ଲୋକେ ୨୦୦୦ ଟଙ୍କା ଦେଇଥିଲେ। ଏହି ବିଷୟକୁ ନେଇ ମେଡ଼ିକାଲ ଅଧିକାରୀଙ୍କୁ କହିବାରୁ ସେ କିଛି ଶୁଣି ନଥିଲେ। ତେବେ ଏ ନେଇ ନର୍ସ ଦୁଇଜଣଙ୍କୁ ପଚାରିବାରୁ ସେମାନେ ଏହାକୁ ଅସ୍ବୀକାର କରିବା ସହିତ ଟଙ୍କା ମାଗନଥିବା କହିଛନ୍ତି। ଏ ନେଇ ଶିବାନୀଙ୍କ ପରିବାର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ, ଜିଲା ସ୍ବାସ୍ଥ୍ୟ ଅଧିକାରୀ, ଜିଲାପାଳ, ସ୍ବାସ୍ଥ୍ୟମନ୍ତ୍ରୀ, ମୁଖ୍ୟ ଶାସନ ସଚିବ ଓଡ଼ିଶା, ୫-ଟି ସଚିବଙ୍କୁ ଲିଖିତ ଭାବେ ଡାକ ମାଧ୍ୟମରେ ଅଭିଯୋଗ କରିଥିବା କହିଛନ୍ତି। ତେବେ ଏ ନେଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡାକ୍ତର ଲଳିତ ରଥଙ୍କୁ ପଚାରିବାରୁ ସେ ପ୍ରତିକ୍ରିୟା ରଖିବାକୁ ମନା କରିଦେଇଛନ୍ତି।
