ଚଣ୍ଡିଗଡ,୨।୮: ହରିୟାଣାର ନୁହରେ ଘଟଥିବା ସାମ୍ପ୍ରଦାୟିକ ହିଂସାକୁ ନେଇ ରାଜନୀତି ଜୋର ଧରିଛି। ଏହି ହିଂସା ପାଇଁ ବିରୋଧୀ ହରିୟାଣାର ଭାଜପା-ଜେଜେପି ସରକାରଙ୍କୁ ଦାୟୀ କରିଛନ୍ତି। ରାଜ୍ୟର ଗୃହ ଓ ସ୍ବାସ୍ଥ୍ୟମନ୍ତ୍ରୀ ଅନିଲ ବିଜ୍ ବୁଧବାର କହିଛନ୍ତି, ନୁହରେ ଏତେ ବଡ଼ ଧରଣର ଘଟଣା ଗୋଟିଏ ଦିନରେ ଘଟିପାରିବ ନାହିଁ। ଏଥିପାଇଁ ଅସ୍ତ୍ରଶସ୍ତ୍ର ସଂଗ୍ରହ କରି ଯୋଜନା ପ୍ରସ୍ତୁତ କରାଯାଇଛି ଏବଂ ଗୁଳି ଚାଳନା କରାଯାଇଛି। ଏହି ଘଟଣାର ସମ୍ପୂର୍ଣ୍ଣ ତଦନ୍ତ ହେବ। ଯେଉଁମାନେ ନୁହରେ ଏପରି କାଣ୍ଡ ଘଟାଇଥିବା ଲୋକଙ୍କୁ ଉଚିତ୍ ଦଣ୍ଡ ଦିଆଯିବ।
ଗୃହମନ୍ତ୍ରୀ କହିଛନ୍ତି ଯେ, ନୁହରେ ହୋଇଥିବା ହିଂସା ପରେ ପରିସ୍ଥିତି ବର୍ତ୍ତମାନ ସମ୍ପୂର୍ଣ୍ଣ ନିୟନ୍ତ୍ରଣରେ ରହିଛି। ହରିୟାଣା ଠାରୁ ୩୦ଟି ଏବଂ କେନ୍ଦ୍ରରୁ ୨୦ଟି ପୋଲିସ ଟିମ୍ ଘଟଣାସ୍ଥଳରେ ଅଛନ୍ତି। ନୁହ ଅଞ୍ଚଳକୁ ୮ଟି ପୋଲିସ ଷ୍ଟେସନରେ ବିଭକ୍ତ କରାଯାଇଛି। ପ୍ରତ୍ୟେକ ପୋଲିସ ଷ୍ଟେଶନରେ ଜଣେ ଆଇପିଏସ ଅଧିକାରୀଙ୍କୁ ପୋଷ୍ଟ କରାଯାଇଛି। ଲୋକମାନେ ସୋସିଆଲ ମିଡିଆରେ ଭୁଲ ପୋଷ୍ଟ ପୋଷ୍ଟ କରିବା ଉଚିତ୍ ନୁହେଁ । ଆମେ ସମସ୍ତ ଦିଗ ଉପରେ ନଜର ରଖିଛୁ ଏବଂ ଯଦି କେହି ସୋସିଆଲ ମିଡିଆ ମାଧ୍ୟମରେ ଭୁଲ ପୋଷ୍ଟ କରନ୍ତGି ତେବେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏହି ମାମଲାରେ ଏପର୍ଯ୍ୟନ୍ତ ୪୧ଟି ମାମଲା ରୁଜୁ ହୋଇଛି ଏବଂ ୧୧୬ ଜଣଙ୍କୁ ଗିରଫ କରାଯାଇଛି।
ସୂଚନାଯୋଗ୍ୟ, ହରିୟାଣାର ନୁହ ଜିଲା ନନ୍ଦ ଗାଁ ନିକଟରେ ବିଶ୍ୱହିନ୍ଦୁ ପରିଷଦ ପକ୍ଷରୁ ବ୍ରଜମଣ୍ଡଳ ଜଳାଭିଷେକ ଯାତ୍ରା କରାଯାଉଥିବାବେଳେ ଗୁରୁଗ୍ରାମ-ଅଲଓ୍ବାର ଜାତୀୟ ରାଜପଥରେ ଗୋଟିଏ ଗୋଷ୍ଠୀ ଏହାକୁ ଅଟକାଇବା ସହ ଶୋଭାଯାତ୍ରା ଉପରକୁ ଟେକାମାଡ଼ କରିଥିଲା। ଉତ୍ତେଜନା ବଢ଼ିବା ସହ ସରକାରୀ ଓ ଘରୋଇ ଗାଡ଼ିଗୁଡ଼ିକୁ ଟାର୍ଗେଟ କରାଯିବା ସହ କେତେକରେ ନିଆଁ ଲଗାଇଦିଆଯାଇଥିଲା। ଉତ୍ତ୍ୟକ୍ତ ଲୋକଙ୍କ ଗୁଳିରେ ୨ଜଣ ହୋମଗାର୍ଡଙ୍କ ମୃତ୍ୟୁ ଘଟିଥିବାବେଳେ ହିଂସା ରୋକିବା ପାଇଁ ନିୟୋଜିତ ଥିବା ଅନେକ ପୋଲିସ କର୍ମଚାରୀ ଆହତ ହୋଇଛନ୍ତି। ଏହି ହିଂସାରେ ବର୍ତ୍ତମାନ ପର୍ଯ୍ୟନ୍ତ ୬ ଜଣଙ୍କ ମୃତ୍ୟୁ ଘଟିଲାଣି।
