ନୂଆଗାଁ,୫।୧୦(ଧନେଶ୍ୱର ସାହୁ)ଗାଁର ବିକାଶ ତଥା ଜନସାଧାରଣଙ୍କ ସମସ୍ୟା ସୁଧାରିବା ପାଇଁ ବ୍ଲକ କାର୍ଯ୍ୟାଳୟ ପ୍ରତିଷ୍ଠା କରାଯାଇଛି। ବ୍ଲକ କାର୍ଯ୍ୟାଳୟର ସୁପରିଚାଳନା ପାଇଁ ଅଧିକାରୀଙ୍କୁ ନିୟୋଜିତ କରାଯିବା ସହ ଆନୁସଙ୍ଗିକ ବ୍ୟବସ୍ଥା ହୋଇଛି। ଏଥିପାଇଁ ଆବଶ୍ୟକ ସାମଗ୍ରୀ ଯୋଗାଇ ଦେଇଛନ୍ତି ସରକାର। ହେଲେ ନୟାଗଡ ଜିଲା ନୂଆଗାଁ ବ୍ଲକ କାର୍ଯ୍ୟାଳୟରେ ସବୁ ଥାଇ ମଧ୍ୟ ଅଧିକାରୀ ଓ କର୍ମଚାରୀଙ୍କ ପରିଚାଳନାଗତ ତ୍ରୁଟି ଯୋଗୁ ଅବ୍ୟବସ୍ଥା ମଧ୍ୟରେ ଚାଲିଛି ବୋଲି ଅଭିଯୋଗ ହୋଇଛି।
ଡ୍ରାଇଭର ଅଛନ୍ତି,କାମରେ ଲାଗୁନି ଜିପ୍: ବ୍ଲକ ଅଧିକାରୀ, କର୍ମଚାରୀ ପଞ୍ଚାୟତ କାର୍ଯ୍ୟାଳୟ କିମ୍ବା କୌଣସି ଅଫିସକୁ ପରିଦର୍ଶନରେ ଯିବା, କୌଣସି ବିକାଶ ମୂଳକ କାର୍ଯ୍ୟକୁ ତଦାରଖ କରିବା ପାଇଁ ସରକାରଙ୍କ ତରଫରୁ ଗୋଟିଏ ଜିପ୍ ଯୋଗାଇ ଦିଆ ଯାଇଛି। ସେହି ଗାଡ଼ିକୁ ଚଳାଇବା ପାଇଁ ଜଣେ ଡ୍ରାଇଭରଙ୍କୁ ମଧ୍ୟ ନିଯୁକ୍ତି ଦିଆଯାଇଛି। କିନ୍ତୁ ଉକ୍ତ ଗାଡ଼ି ଓ ଡ୍ରାଇଭରଙ୍କୁ କାମରେ ନ ଲଗାଇ ଗ୍ରାମୀଣ ଗୃହ ନିର୍ମାଣ ବିଭାଗରେ ନିୟୋଜିତ ଥିବା ବେସରକାରୀ ଗାଡ଼ିକୁ ପ୍ରତି କାମରେ ବ୍ୟବହାର କରାଯାଉଛି।
ଜେନେରେଟର ଅଛି, ବିଦ୍ୟୁତ୍ କଟିଲେ କାମ ବନ୍ଦ: ବିଦ୍ୟୁତ କଟିଲେ ମଧ୍ୟ ଲୋକମାନଙ୍କ ସମସ୍ୟାକୁ ସମାଧାନ କରିବା ସହ ବ୍ଲକର ପ୍ରତି ବିଭାଗ କାର୍ଯ୍ୟକୁ ସୂଚାରୁ ରୂପେ ଠିକ୍ ସମୟରେ ସାରିବା ପାଇଁ ଗୋଟିଏ ଜେନେରେଟର ଯୋଗାଇ ଦିଆଯାଇଛି। କିନ୍ତୁ ତାହାକୁ ରକ୍ଷଣାବେକ୍ଷଣ ନ କରିବାରୁ ତାହା ଅଚଳ ହୋଇ ପଡିଛି। ବିଦ୍ୟୁତ୍ କଟିଲେ ଲୋକମାନଙ୍କ ସମସ୍ୟା ସମାଧାନ ହୋଇ ପାରୁ ନାହିଁ। ଏପରିକି ସମସ୍ତ କାର୍ଯ୍ୟ ସେହି ଆଳରେ ବନ୍ଦ ହୋଇ ଯାଉଛି।
ଅଚଳ ହୋଇ ପଡିଛି ସିସିଟିଭି ବ୍ୟବସ୍ଥା: ବ୍ଲକ କାର୍ଯ୍ୟାଳୟର ସୁରକ୍ଷା ଦୃଷ୍ଟିରୁ କାର୍ଯ୍ୟାଳୟ ପରିସରରେ ସିସିଟିଭି କ୍ୟାମେରା ଲଗାଯାଇଛି। ତତ୍ ସହିତ କେଉଁ ବିଭାଗର କର୍ମଚାରୀମାନେ ତାଙ୍କ ବିଭାଗରେ କାମ କରୁଛନ୍ତି କି ନାହିଁ ତାହା ବିଡିଓ ଜାଣିବା ପାଇଁ ଲକ୍ଷାଧିକ ଟଙ୍କା ବ୍ୟୟ କରି ପ୍ରତି ବିଭାଗ କକ୍ଷରେ ସିସିଟିଭି କ୍ୟାମେରା ଲଗାଯାଇଛି। କିନ୍ତୁ ଦୀର୍ଘ ମାସ ହେଲା ତାହା ଅଚଳ ହୋଇ ପଡିଥିବା ବେଳେ ତାହାକୁ ମରାମତି କରାଯାଉ ନାହିଁ।
ଲୋକଙ୍କ ପାଇଁ ବସିବା ବ୍ୟବସ୍ଥା ନାହିଁ: ଦୂରଦୂରାନ୍ତରୁ କୌଣସି କାମରେ ଲୋକମାନେ ବ୍ଲକ କାର୍ଯ୍ୟାଳୟକୁ ଆସିଲେ ବସିବା ପାଇଁ କୌଣସି ବ୍ୟବସ୍ଥା ନାହିଁ। ଏପରି କି ଭୀଷଣ ଖରା କିମ୍ବା ବର୍ଷା ହେଲେ ବାରଣ୍ଡାରେ ଠିଆ ହୋଇ ରହିବାକୁ ପଡୁଛି। ଏସବୁ ଅବ୍ୟବସ୍ଥା ବାବଦରେ ନୂଆଗାଁ ବିଡିଓ ବାସୁଦେବ ନାୟକଙ୍କୁ ପଚାରିବାରେ ମୁଁ ଏସବୁ ସମସ୍ୟା ପ୍ରତି ଦୃଷ୍ଟି ଦେଇ ସମାଧାନ କରିବାକୁ ଚେଷ୍ଠା କରିବି ବୋଲି କହିଛନ୍ତି।
