ଭଞ୍ଜନଗର,୧୯ା୧୦(ବାବୁଲା ପ୍ରଧାନ): ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନାର ଅନେକ ଗଳା ବାଟରେ ସୁଯୋଗ ନେଇ କୋଟି କୋଟି ଟଙ୍କା ଲୁଟ୍ ହେଉଥିଲା। ଏନେଇ ବିଭିନ୍ନ ସମୟରେ ଅଭିଯୋଗ ମଧ୍ୟ ହେଉଥିଲା। ତେଣୁ ଯୋଜନାରେ ସ୍ବଚ୍ଛତା ଆଣିବା ପାଇଁ ରାଜ୍ୟ ସରକାର ଇତିମଧ୍ୟରେ ପଦକ୍ଷେପ ନେଇଛନ୍ତି। ତେଣୁ ସମସ୍ତ ଜବ୍କାର୍ଡଧାରୀଙ୍କ ଇ-କେୱାଇସି ବାଧ୍ୟତାମୂଳକ କରାଯାଇଛି । ଯେଉଁମାନେ ଇ-କେୱାଇସି ଅପଡେଟ୍ କରିବେ ସେମାନେ ହିଁ ଆଗାମୀ ଦିନରେ କାମ କରିପାରିବେ। ଅକ୍ଟୋବର ୩୧ ପର୍ଯ୍ୟନ୍ତ ଇ-କେୱାଇସି ଅପଡେଟ୍ ଚାଲିବ। ଏହିଭଳି ଗଞ୍ଜାମ ଜିଲା ଭଞ୍ଜନଗର ବ୍ଲକରେ ମଧ୍ୟ ଏହି ପ୍ରକ୍ରିୟା ଚାଲିଛି। ବିଡିଓ ଭାରତୀ ଦେବୀ ଏବଂ ଏବିଡିଓ ପୂର୍ଣ୍ଣଚନ୍ଦ୍ର ପାଢ଼ୀ ପ୍ରତ୍ୟକ୍ଷ ଭାବେ ବିଭିନ୍ନ ଗ୍ରାମ ବୁଲି କାର୍ଯ୍ୟକ୍ରମ ତଦାରଖ କରୁଛନ୍ତି।
ସୂଚନାଯୋଗ୍ୟ, ପୁର୍ବରୁ ଏହି ଯୋଜନାରେ କାମ ଜଣେ କରୁଥିଲେ ଆଉ ଜଣେ ବେନିୟମ ଭାବେ ଟଙ୍କା ଉଠାଉଥିଲେ। ଏହିଭଳି ଗଳା ବାଟର ସୁଯୋଗ ନେଇ ବିପୁଳ ଅର୍ଥ ବାଟମାରଣ ହେଉଥିଲା। ଏଥିରେ ଅଫିସରଙ୍କଠାରୁ ଆରମ୍ଭ କରି କୁଜିନେତା, ମଧ୍ୟସ୍ଥି ଲାଭବାନ ହେଉଥିଲେ। କିନ୍ତୁ ନୂଆ ଯୋଜନାରେ ଏଣିକି ଯେଉଁ ଶ୍ରମିକ କାମ କରିବେ ତାଙ୍କରି ନାମରେ ହିଁ ଟଙ୍କା ଯିବ। ଏହାଦ୍ବାରା ଯୋଜନାରେ ସ୍ବଚ୍ଛତା ଆସିବ ବୋଲି ସରକାର ଆଶା ରଖିଛନ୍ତି। ଏହି ଯୋଜନାର ଲକ୍ଷ୍ୟ ହେଲା ଗ୍ରାମୀଣ ଅଞ୍ଚଳର ନିବାସୀମାନଙ୍କୁ ଜୀବିକା ସୁରକ୍ଷା ଦେବା ପାଇଁ ଗୋଟିଏ ନିଶ୍ଚିତ ରୋଜଗାର ସୁଯୋଗ ପ୍ରଦାନ କରିବା। ଏହାର ଉଦ୍ଦେଶ୍ୟ ହେଲା ଗ୍ରାମୀଣ ଅଞ୍ଚଳରେ ବେକାରି ହ୍ରାସ କରିବା। ଜଣକୁ ପ୍ରତିବର୍ଷ ୧୦୦ ଦିନ ନିଶ୍ଚିତ କାମ ଦେଇ ଆୟ ବୃଦ୍ଧି କରିବା । ଗ୍ରାମାଞ୍ଚଳରେ ପାଣି, ମାଟି, ଜଙ୍ଗଲ, ରାସ୍ତା ଇତ୍ୟାଦିର ଉନ୍ନତି କରିବା। ଗ୍ରାମୀଣ ଅଞ୍ଚଳରେ ସୁସ୍ଥାୟୀ ଉନ୍ନତି ସୁନିଶ୍ଚିତ କରିବା। ଦରିଦ୍ର ଓ ପଛୁଆ ଶ୍ରେଣୀର ଲୋକମାନଙ୍କୁ ଆତ୍ମନିର୍ଭର କରିବା। ମହିଳାମାନଙ୍କ ପାଇଁ ସମାନ ରୋଜଗାର ସୁଯୋଗ ସୃଷ୍ଟି କରିବା । ଏହି ଯୋଜନାକୁ ପ୍ରଥମେ ନ୍ୟାଶନାଲ ରୁରାଲ ଏମ୍ପ୍ଲୟମେଣ୍ଟ ଗ୍ୟାରେଣ୍ଟି ଆକ୍ଟ (NREGA) ଭାବେ ୨୦୦୫ରେ ଭାରତୀୟ ସଂସଦ ଦ୍ୱାରା ପାସ୍ କରାଯାଇଥିଲା। ଏହାକୁ ୨ ଫେବୃଆରୀ ୨୦୦୬ରୁ ଦେଶର ୨୦୦ ଜିଲାରେ ପ୍ରଥମେ କାର୍ଯ୍ୟକାରୀ କରାଯାଇଥିଲା। ପରେ ଏହାକୁ ସମଗ୍ର ଦେଶରେ କାର୍ଯ୍ୟକାରୀ କରାଯାଇ ୨ ଅକ୍ଟୋବର ୨୦୦୯ (ମହାତ୍ମା ଗାନ୍ଧୀ ଜୟନ୍ତୀ)ରେ ଏହାକୁ ନୂଆ ନାମ ମହାତ୍ମା ଗାନ୍ଧୀ ନାଶନାଲ ରୁରାଲ ଏମ୍ପ୍ଲୟମେଣ୍ଟ ଗ୍ୟାରେଣ୍ଟି ସ୍କିମ୍ (MGNREGS)ରେ ପରିବର୍ତ୍ତନ କରାଯାଇଥିଲା।
