ନବରଙ୍ଗପୁର,୧୭ା୬(ସଦାଶିବ ପ୍ରହରାଜ) ଭାରତମାଳା ସଡ଼କ ପାଇଁ ସିୟୁନି କ୍ବାରିରୁ ଠିକା ସଂସ୍ଥା ପଥର ଖନନ କରୁଛି । ସରକାରୀ ଖଣି ନିୟମ ଉଲ୍ଲଂଘନକରି ସଂସ୍ଥା ଅନୁମତିଠାରୁ ୩ ଲକ୍ଷରୁ ଅଧିକ ସିଏମ୍ ପଥର ଫଟାଇ ଉଠାଇ ଚାଲିଛନ୍ତି। ୩ ମିଟର ଖନନ କରିବା ପରିବର୍ତ୍ତେ ୫୦ ଫୁଟ ଗଭୀରରୁ ଊର୍ଦ୍ଧ୍ୱ ନିମ୍ନ ଭାଗକୁ ଖନନ କରାଯାଇ ପଥର ଉଠାଇ ନିଆଯାଉଛି। ୨୩ ହଜାର ସିଏମ୍ ପଥର ଉଠାଇବା ପାଇଁ ଅନୁମତି ନେଇ ଏବେ ୩ ଲକ୍ଷ ସିଏମ୍ରୁ ଅଧିକ ପଥର ନେଇସାରିଲାଣି ଠିକାସଂସ୍ଥା। ଏହାଦ୍ୱାରା ବ୍ୟାପକ ରାଜସ୍ବ ହାନି ହେଲାଣି। ନିୟମିତ ବ୍ୟବଧାନରେ ଅଭିଯୋଗ ପରେ ନବରଙ୍ଗପୁର ତହସିଲଦାର ଜୟଦ୍ରଥ ଆଚାର୍ଯ୍ୟ ଠିକା ସଂସ୍ଥା ଅର୍କନ୍ସକୁ ଡିମାଣ୍ଡ ନୋଟିସ ଜାରିକରିଛନ୍ତି। ଠିକାସଂସ୍ଥା ୩ ଲକ୍ଷରୁ ଅଧିକ ସିଏମ୍ ପଥର ଖନନ କରିଛି। ବୁଧବାର ଡିମାଣ୍ଡ ନୋଟିସ କରାଯିବା ସହ ପ୍ରତି ସିଏମ୍ ପିଛା ୧୪୦ ଟଙ୍କା ଓ ୨ ପ୍ରତିଶତ ଜରିମାନା ଦେବାକୁ ସଂସ୍ଥାକୁ ନିର୍ଦ୍ଦେଶ ଦିଆଯାଇଥିବା ତହସିଲଦାର କହିଛନ୍ତି।
୩ ମିଟର ପରିବର୍ତ୍ତେ ୫୦ ଫୁଟ ଖୋଳିଲାଣି ଠିକା ସଂସ୍ଥା ଖବର ପ୍ରକାଶ ପରେ ରାଜସ୍ବ ବିଭାଗ ତତ୍ପର ହୋଇଉଠିଛି। ନବରଙ୍ଗପୁର ତହସିଲଦାର ଆଚାର୍ଯ୍ୟଙ୍କ ନିର୍ଦ୍ଦେଶ ପରେ କ୍ବାରି ତଥା ଖନନ ସ୍ଥାନରେ ବିକ୍ରମପୁର ରାଜସ୍ବ ନିରୀକ୍ଷକ ଭି. ଭି. ରାଜୁ ଓ ସୁପରଭାଇଜର ସୀମାଞ୍ଚଳ ଦାଶ ୧ ତାରିଖରେ ମାପଚୁପ କରି ନବରଙ୍ଗପୁର ତହସିଲଦାରଙ୍କୁ ରିପୋର୍ଟ ପ୍ରଦାନ କରିଥିଲେ। ପ୍ରାୟ ୧ ଲକ୍ଷ ସିଏମ୍ରୁ ଊର୍ଦ୍ଧ୍ୱ ପଥର ଠିକାସଂସ୍ଥା ଖନନକରି ନେଇଥିବା କହୁଥିବା ବେଳେ ୩ ଲକ୍ଷ ସିଏମ୍ରୁ ଅଧିକ ପଥର ଖନନ କରାଯାଇଥିବା ତହସିଲଦାର କହିଛନ୍ତି।
ନବରଙ୍ଗପୁର ତହସିଲ ଅଧୀନ ବିକ୍ରମପୁର ରାଜସ୍ବ ସର୍କଲର ଖାତା ନମ୍ବର ୫୯୪, ପ୍ଲଟ୍ ନମ୍ବର ୧୯୪୪, ପଥର ବଣ କିସମ ଥିବା ସିୟୁନି କ୍ବାରିରୁ ପଥର ନେବାକୁ ଅର୍କନ୍ସ ସଂସ୍ଥା ୩୦ ହଜାର ୧୮୪ ସିଏମ୍ ପଥର ଉଠାଇବ ବୋଲି ଆବେଦନ କରିଥିଲା। ଖଣି ନିୟମ ପ୍ରକାରେ ହିଁ ପ୍ରତି ୩ ମାସରେ ଥରେ କ୍ବାରି ପାଇଁ ଅନୁମତି ମିଳିଲା। ସଂସ୍ଥା ୨୦୨୨ ଜୁଲାଇ ୧୨ରେ ୧ ହଜାର, ଡିସେମ୍ବର ୧୬ରେ ୧ ହଜାର ଓ ଡିସେମ୍ବର ୨୯ରେ ଆଉ ୧ ହଜାର ସିଏମ୍ ପଥର ଉଠାଇବାକୁ ଆବେଦନ କଲେ। ତତ୍କାଳୀନ ତହସିଲଦାରଙ୍କ ନିର୍ଦ୍ଦେଶରେ ୨୦୨୨ରେ ରାଜସ୍ବ ନିରୀକ୍ଷକ ଓ ରେଭିନ୍ୟୁ ସୁପରଭାଇଜର ତଦନ୍ତ କରି ଠିକାସଂସ୍ଥା ବିରୋଧରେ ରିପୋର୍ଟ ଦେଇଥିଲେ। ଅନୁମତିରୁ ଅଧିକ ୩୨ ହଜାର ୪ ଶହ ସିଏମ୍ ପଥର ଉଠି ସାରିଲାଣି ବୋଲି ରିପୋର୍ଟ ଦେଇଥିଲେ। ଅର୍କନ୍ସ ସଂସ୍ଥାକୁ ତହସିଲ ପକ୍ଷରୁ କାରଣ ଦର୍ଶାଅ ନୋଟିସ ପରେ ୧ ଲକ୍ଷ ପେନାଲଟି ସହ ୨୦୨୩ ମାର୍ଚ୍ଚ ୬ରେ ୪୬ଲକ୍ଷ ଟଙ୍କା ଠିକା ସଂସ୍ଥା ଜମାକରିଥିଲେ। ଏହାପରେ ମଧ୍ୟ ଠିକା ସଂସ୍ଥା ଖଣି ନିୟମ ମାନୁ ନ ଥିବା ଅଭିଯୋଗ ହୋଇଛି।