କଟକ,୨୪।୧(ଶିଳ୍ପା ପ୍ରିୟଦର୍ଶିନୀ): ନେତାଜୀ ଜୟନ୍ତୀ ଅବସରରେ ଓଡ଼ିଆ ବଜାରସ୍ଥିତ ନେତାଜୀ ସଂଗ୍ରହାଳୟ ପରିସରରେ ପୋଷ୍ଟାଲ ଗ୍ୟାଲେରି ଓ ନିକଟରେ ଥିବା ସଂସ୍କୃତି ଭବନକୁ ଉପରାଷ୍ଟ୍ରପତି ଉଦ୍ଘାଟନ କରିଥିଲେ। ଉକ୍ତ ସ୍ଥାନରେ ନାମ ଫଳକକୁ ସ୍ଥାନିତ କରାଯାଇଥିଲା। ହେଲେ ଏଥିରେ ସ୍ଥାନୀୟ ରାଜ୍ୟ ସଭା ସଦସ୍ୟ ଦେବାଶିଷ ସାମନ୍ତରାୟଙ୍କ ନାମ ନ ଥିବା ଦେଖିବାକୁ ମିଳିଛି। ଦେବାଶିଷ ଉପସ୍ଥିତ ନ ଥିବାବେଳେ ଜଣେ ରାଜ୍ୟ ସଭା ସଦସ୍ୟ ଭାବେ କାହିଁକି ତାଙ୍କ ନାମ ଉଲ୍ଲେଖ କରାଗଲା ନାହିଁ ସେ ନେଇ ନାନା ପ୍ରଶ୍ନ ଉପୁଜିଛି। ଏ ସମ୍ପର୍କରେ ଦେବାଶିଷ ସାମନ୍ତରାୟ କହିଛନ୍ତି, ଭୁଲଟା କେଉଁଠି ହେଇଛି ତାହା ଜାଣି ହେଉନି। ଉପରାଷ୍ଟ୍ରପତି ହେଉଛନ୍ତି ରାଜ୍ୟ ସଭାର ଅଧ୍ୟକ୍ଷ ଏବଂ ମୁଁ ଜଣେ ତାଙ୍କର ସଦସ୍ୟ। ଏଭଳି ପଦକ୍ଷେପ ଉପରାଷ୍ଟ୍ରପତିଙ୍କ ପ୍ରତି ଅସମ୍ମାନ କରାଯାଇଛି। ସଂସ୍କୃତି ବିଭାଗ ଏଭଳି କାର୍ଯ୍ୟ କରିଛି ଏବଂ ଏଥିପାଇଁ ମୁଁ ସଚିବଙ୍କୁ ଚିଠି ମଧ୍ୟ ଲେଖିବି। ଜିଲା ପ୍ରଶାସନ ମଧ୍ୟ ଦୋଷ ମାନୁନାହାନ୍ତି। ଅନ୍ୟ ବିଧାୟକଙ୍କ ନାମ ରହିଛି ହେଲେ ମୋ ନାମ ରହିବା କେବଳ ଜାଣତରେ ଏଭଳି କରାଯାଇଛି। ହୁଏତ ଅଭିଜ୍ଞ ଅଧିକାରୀମାନେ ଏଭଳି କରିଥିବେ ବୋଲି ସାମନ୍ତରାୟ କହିଛନ୍ତି। ବିଧାୟିକା ସୋଫିଆ ଦେବାଶିଷଙ୍କ ସପକ୍ଷରେ ବାହାରି କହିଛନ୍ତି, ସେ ଜଣେ ଲୋକପ୍ରତିନିଧି ଏବଂ ରାଜ୍ୟ ସଭାର ସଦସ୍ୟ । ତାଙ୍କର ନାମ ରହିବା ନିହାତି ଜରୁରୀ। ହେଲେ ତ୍ରୁଟି କେଉଁଠି ରହିଛି ତାହାର ତଦନ୍ତ ଓ ତର୍ଜମା କରାଯାଉ। ମେୟର ସୁବାସ ସିଂ କହିଛନ୍ତି, ଫଳକରେ ନାମ ରହିବା ଜରୁରୀ ଥିଲା। ସେ ଜଣେ ଲୋକ ପ୍ରତିନିଧି ଏବଂ ବିଧାୟକ ମଧ୍ୟ ଥିଲେ। ହେଲେ ପ୍ରଶାସନ ଏଭଳି କାହିଁକି କରିଛି ସେ ନେଇ ଉତ୍ତର ଦେଉ ବୋଲି ସିଂ କହିଛନ୍ତି। ଅନ୍ୟପଟେ କଟକ ଜିଲା ଭାଜପା ସଭାପତି ସୁକାନ୍ତ ବିଶ୍ୱାଳ କହିଛନ୍ତି, ପ୍ରଶାସନ କ’ଣ ନିଷ୍ପତ୍ତି ନେଇଛି ତାହା ଜାଣିନି। ହେଲେ ସାମ୍ବିଧାନିକ ପ୍ରକିୟା ଅନୁଯାୟୀ ତାଙ୍କ ନାମ ରହିବା ଜରୁରୀ ଥିଲା। ମୁଁ ଜଣେ କର୍ମୀ ଭାବେ ଏଠାରେ ପ୍ରବେଶ କରି ପାରିନାହିଁ। ବହୁ ଅବ୍ୟବସ୍ଥା କରାଯାଇଛି ବୋଲି ବିଶ୍ୱାଳ କହିଛନ୍ତି। ସୂଚନାଥାଉକି, ନେତାଜୀ ଜୟନ୍ତୀ ଅବସରରେ ନେତାଜୀ ସଂଗ୍ରହାଳୟରେ ପୋଷ୍ଟାଲ ଗ୍ୟାଲେରି ଓ ସଂସ୍କୃତି ଭବନ ଉଦ୍ଘାଟନ କରାଯାଇଥିଲା। ଏଠାରେ ଥିବା ଫଳକରେ ଉପରାଷ୍ଟ୍ରପତି ସି.ପି. ରାଧାକ୍ରିଷ୍ଣନ, ରାଜ୍ୟପାଳ ହରିବାବୁ କମ୍ଭମ୍ପାଟି, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କଟକ ଏମ୍ପି ଭର୍ତ୍ତୃହରି ମହତାବ, ବିଧାୟିକା ସୋଫିଆ ଫିର୍ଦ୍ଦୋସ, ବିଧାୟକ ସୌଭିକ୍ ବିଶ୍ୱାଳ, ଇଂ. ପ୍ରକାଶ ଚନ୍ଦ୍ର ସେଠୀଙ୍କ ନାମ ଉଲ୍ଲେଖ କରାଯାଇଛି।
