ପାଟନା, ୧।୧୦ : ବିହାରରେ ୨୦୨୩ରେ କିଏ ମୁଖ୍ୟମନ୍ତ୍ରୀ ହେବ ନେଇ ଚାଲିଥିବା ଆଲୋଚନା ମଧ୍ୟରେ ବିହାର ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ ସ୍ପଷ୍ଟୀକରଣ ଦେଇଛନ୍ତି। ସେ କହିଛନ୍ତି ଯେ ଶୀଘ୍ର ମୁଖ୍ୟମନ୍ତ୍ରୀ ହେବାକୁ ସେ ତତ୍ପର ନୁହଁନ୍ତି। ଆମର ଏକମାତ୍ର ଲକ୍ଷ୍ୟ ଥିଲା କିପରି ଭାଜପା ଏବଂ ଆରଏସଏସକୁ ସିଂହାସନରୁ ହଟାଇ ଦିଆଯିବ। ଆମେ ସେମାନଙ୍କୁ ବିହାରରୁ ହଟାଇଛୁ ଏବଂ ବର୍ତ୍ତମାନ ସେମାନଙ୍କୁ କେନ୍ଦ୍ରରୁ ହଟାଇବାକୁ ପଡିବ। ଆରଜେଡି ରାଜ୍ୟ ସଭାପତି ଜଗଦାନନ୍ଦ ସିଂଙ୍କ ବିବୃତ୍ତିକୁ ନେଇ ଯାଦବ ଏହା କହିଛନ୍ତି।
ସେ ଏହା ମଧ୍ୟ କହିଛନ୍ତି ଯେ ନୀତୀଶ କୁମାରଙ୍କ ନେତୃତ୍ୱରେ ଆମ ସରକାର ଭଲରେ ଚାଲିଛି। ସମର୍ଥକମାନେ ବେଳେବେଳେ ଏପରି ବିବୃତ୍ତି ଜାରି ରଖନ୍ତି । ଏହା ନୂଆ କଥା ନୁହେଁ। ଇତି ମଧ୍ୟରେ ନୀତୀଶ କୁମାର ମଧ୍ୟ ସ୍ପଷ୍ଟ କରିଛନ୍ତି ଯେ ପ୍ରଧାନମନ୍ତ୍ରୀ ହେବାକୁ ତାଙ୍କର କୌଣସି ଇଚ୍ଛା ନାହିଁ। ଏହି ସବୁ ବିଷୟ ଏବେ ଆଲୋଚନା କରିବାର ସମୟ ନୁହେଁ। ଏହାପୂର୍ବରୁ ବିହାରର ପୂର୍ବତନ ଉପମୁଖ୍ୟମନ୍ତ୍ରୀ ସୁଶୀଲ କୁମାର ମୋଦି ନୀତୀଶ କୁମାରଙ୍କୁ ଟାର୍ଗେଟ କରିଥିଲେ। ସେ କହିଥିଲେ ଯେ ଲାଲ ଯାଦବ, ଭାଜପା, ଜିତନକୁମାର ମାଝିଂଙ୍କ ପ୍ରତି ବିଶ୍ୱାସଘାତକତା କରିଥିବା ନୀତୀଶ ବିହାରରେ ତେଜସ୍ବୀଙ୍କୁ କୌଣସି ମୂଲ୍ୟରେ କ୍ଷମତା ହସ୍ତାନ୍ତର କରିବେ ନାହିଁ। ସେ ଲାଲୁଙ୍କ ପ୍ରତି ପୁଣି ଥରେ ବିଶ୍ୱାସଘାତକତା କରିବେ।
ବିହାର ଆରଜେଡିର ରାଜ୍ୟ ସଭାପତି ଜଗଦାନନ୍ଦ ସିଂଙ୍କ ଦିଲ୍ଲୀରେ ଦେଇଥିବା ବିବୃତ୍ତି ଉପରେ ତେଜସ୍ବୀ ପ୍ରତିକ୍ରିୟା ପ୍ରକାଶ କରିଛନ୍ତି। ସିଂ କହିଥିଲେ ଯେ ଆସନ୍ତା ବର୍ଷ ସୁଦ୍ଧା ଯୁବ ନେତା ମୁଖ୍ୟମନ୍ତ୍ରୀ ହେବେ। ଏହି ବିବୃତ୍ତି ନେଇ ନୀତୀଶ କୁମାରଙ୍କ ଦଳର କିଛି ନେତା ଅସନ୍ତୋଷ ହୋଇଛନ୍ତି। ଜଗଦାନନ୍ଦ କହିଥିଲେ ଯେ ନୀତୀଶ କୁମାର ୨୦୨୩ ସୁଦ୍ଧା ନିଜକୁ ଜାତୀୟ ରାଜନୀତିରେ ଉତ୍ସର୍ଗ କରିବେ। ସେତେବେଳେ ତେଜସ୍ବୀ ତାଙ୍କ ଉତ୍ତରାଧିକାରୀ ଭାବରେ ଦାୟିତ୍ୱ ଗ୍ରହଣ କରିବେ।
