ନୂଆଦିଲ୍ଲୀ,୨୦।୧୦: ଉତ୍ତର କୋରିଆର ସର୍ବୋଚ୍ଚ ନେତା କିମ୍ ଜୋଙ୍ଗ୍ ଉନ୍ଙ୍କ ସ୍ୱା ସ୍ଥ୍ୟକୁ ନେଇ ସୋସିଆଲ ମିଡିଆରେ ବିଭିନ୍ନ ଗୁଜବ ପ୍ରଚାର ହେଉଛି। ତାଙ୍କୁ ବ୍ରେନ୍ ହାମରେଜ୍ ହୋଇଥିବା, ସେ କୋମାକୁ ଚାଲିଯାଇଥିବା ଏବଂ ଚିକିତ୍ସା ପାଇଁ ଚାଇନାର ରାଜଧାନୀ ବେଜିଂକୁ ନିଆଯାଇଥିବା ଭଳି ଦାବି କରାଯାଉଛି । ଏପରିକି ତାଙ୍କ ମୃତ୍ୟୁକୁ ନେଇ ମଧ୍ୟ କିଛି ପୋଷ୍ଟରେ ଆଲୋଚନା ହେଉଛି । ତେବେ ଏହି ଦାବିଗୁଡ଼ିକର ସମର୍ଥନରେ କୌଣସି ଠୋସ୍ ପ୍ରମାଣ ସାମ୍ନାକୁ ଆସିନାହିଁ।
ଏହି ଗୁଜବ ମଧ୍ୟରେ ଉତ୍ତର କୋରିଆର ସରକାରୀ ସମାଚାର ସଂସ୍ଥା କୋରିଆନ୍ ସେଣ୍ଟ୍ରାଲ୍ ନ୍ୟୁଜ୍ ଏଜେନ୍ସି (KCNA)ର ରିପୋର୍ଟ ଅନୁଯାୟୀ, ସୋମବାର ଅକ୍ଟୋବର ୧୯ରେ କିମ୍ ଜୋଙ୍ଗ୍ ଉନ୍ ନିଜ ଝିଅଙ୍କ ସହ ଏକ ପୋଷାକ ଓ ଜୋତା ପ୍ରଦର୍ଶନୀ ପରିଦର୍ଶନ କରିଥିଲେ। ଏହି ଖବର ସହ ତାଙ୍କର କିଛି ଫଟୋ ମଧ୍ୟ ପ୍ରକାଶ ପାଇଛି। KCNAର ରିପୋର୍ଟ ଅନୁସାରେ, କିମ୍ ଜୋଙ୍ଗ୍ ଉନ୍ ଏକ ପ୍ରତିରକ୍ଷା ସଂଗ୍ରହାଳୟରେ ଆୟୋଜିତ ପ୍ରଦର୍ଶନୀକୁ ଯାଇଥିଲେ। ଏହି ଅବସରରେ ସେ ଦେଶର ବୟନ ଓ ଜୋତା ଶିଳ୍ପର ବିକାଶକୁ ପ୍ରଶଂସା କରିଥିବା ରିପୋର୍ଟରେ କୁହାଯାଇଛି।
ପ୍ରଦର୍ଶନୀରେ ୭୦,୭୦୦ରୁ ଅଧିକ ପୋଷାକ ଏବଂ ୧,୭୦,୦୦୦ରୁ ଅଧିକ ଯୋଡ଼ା ଜୋତା ପ୍ରଦର୍ଶିତ ହୋଇଥିଲା। ଦେଶର ବିଭିନ୍ନ ଅଞ୍ଚଳର କାରଖାନାରେ ଏହି ସାମଗ୍ରୀ ପ୍ରସ୍ତୁତ କରାଯାଇଥିଲା। ସହରାଞ୍ଚଳ ବାହାରେ ଉତ୍ପାଦନ ବୃଦ୍ଧି କରିବା ଏବଂ ଲୋକଙ୍କ ଜୀବନଧାରଣର ମାନରେ ସୁଧାର ଆଣିବା ଉତ୍ତର କୋରିଆର ଆଞ୍ଚଳିକ ବିକାଶ ନୀତିର ଅଂଶ ବୋଲି ରିପୋର୍ଟରେ ଉଲ୍ଲେଖ ରହିଛି।
କିମ୍ ଜୋଙ୍ଗ୍ ଉନ୍ଙ୍କ ସ୍ୱାସ୍ଥ୍ୟକୁ ନେଇ ସୋସିଆଲ ମିଡିଆରେ ଅନେକ ପ୍ରକାରର ଦାବି କରାଯାଇଥିଲା। କିଛି ପୋଷ୍ଟରେ ତାଙ୍କୁ ଗୁରୁତର ବ୍ରେନ୍ ହାମରେଜ୍ ହୋଇଥିବା ଏବଂ ସେ କୋମାକୁ ଚାଲିଯାଇଥିବା କୁହାଯାଇଥିଲା। ଆଉ କିଛି ପୋଷ୍ଟରେ ତାଙ୍କୁ ଜରୁରୀ ଚିକିତ୍ସା ପାଇଁ ବେଜିଂ ନିଆଯାଇଥିବା ଦାବି କରାଯାଇଥିଲା।
କିମ୍ ଜୋଙ୍ଗ୍ ଉନ୍ଙ୍କ ସ୍ୱାସ୍ଥ୍ୟକୁ ନେଇ ଗୁଜବ ପ୍ରଚାର ହେବା ପରେ ତାଙ୍କର ସମ୍ଭାବ୍ୟ ଉତ୍ତରାଧିକାରୀ କିଏ ହେବେ, ସେ ନେଇ ମଧ୍ୟ ଚର୍ଚ୍ଚା ଜୋର ଧରିଛି। ଏହି ଆଲୋଚନାରେ ତାଙ୍କ ଭଉଣୀ କିମ୍ ୟୋ ଜୋଙ୍ଗ୍ ଏବଂ ଝିଅ କିମ୍ ଜୁ ଏଙ୍କ ନାମ ସାମ୍ନାକୁ ଆସୁଛି। କିମ୍ ଜୁ ଏ ଅନେକ ଗୁରୁତ୍ୱପୂର୍ଣ୍ଣ ସରକାରୀ କାର୍ଯ୍ୟକ୍ରମରେ ବାପାଙ୍କ ସହ ନଜର ଆସିଛନ୍ତି। ତେବେ ଗୁରୁତ୍ୱପୂର୍ଣ୍ଣ କଥା ହେଉଛି, କିମ୍ ଜୋଙ୍ଗ୍ ଉନ୍ଙ୍କ ମୃତ୍ୟୁ, କୋମା କିମ୍ବା ବେଜିଂକୁ ଚିକିତ୍ସା ପାଇଁ ନିଆଯିବା ନେଇ ପ୍ରଚାରିତ ଦାବିଗୁଡ଼ିକର ସ୍ୱାଧୀନ ପୁଷ୍ଟି ମିଳିନାହିଁ। ସରକାରୀ ଗଣମାଧ୍ୟମରେ ତାଙ୍କ ସାର୍ବଜନୀନ କାର୍ଯ୍ୟକ୍ରମ ସମ୍ପର୍କିତ ରିପୋର୍ଟ ପ୍ରକାଶ ପାଇଥିଲେ ମଧ୍ୟ, ଏହା ତାଙ୍କ ସ୍ୱାସ୍ଥ୍ୟ ସମ୍ପର୍କିତ ସମସ୍ତ ଗୁଜବର ସ୍ୱତନ୍ତ୍ର ପ୍ରମାଣ ନୁହେଁ ।