ଭୁବନ, ୧୩।୬(ଡି.ଏନ୍.ଏ.): ଢେଙ୍କାନାଳ ଜିଲା ଭୁବନ ବ୍ଲକ ଏନ୍ଏସିର ପୁରାତନ ବ୍ୟବସାୟିକ ପେଣ୍ଠସ୍ଥଳୀ ନୂଆବଜାରରେ ସୃଷ୍ଟି ହୋଇଛି ଜଳସଙ୍କଟ। ଦୀର୍ଘ ୧୦ବର୍ଷ ତଳେ ଏଠାରେ ସ୍ଥାପିତ ଥଣ୍ଡା ପାନୀୟ ଜଳ ପ୍ରକଳ୍ପ ଏବଂ ଏକମାତ୍ର ନଳକୂପ ଅଚଳ ହୋଇପଡ଼ିବା ପରେ ପାଣି ମୁନ୍ଦାଏ ପାଇଁ ଦହଗଞ୍ଜ ହେଉଛନ୍ତି ବ୍ୟବସାୟୀ, ଗ୍ରାହକ ଏବଂ ବସ୍ଯାତ୍ରୀ। ଏହାକୁ ନେଇ ପୁଞ୍ଜିଭୂତ ଅସନ୍ତୋଷ ଉଗ୍ର ହେଉଥିବାବେଳେ ଆନ୍ଦୋଳନ ଏକମାତ୍ର ବିକଳ୍ପ ବୋଲି ଖୋଲାଖୋଲି ଚେତାବନୀ ଦେଇଛନ୍ତି ବ୍ୟବସାୟୀ।
ଅଭିଯୋଗ ଅନୁଯାୟୀ, ନୂଆବଜାର ଉପରେ ନିର୍ଭର କରନ୍ତି ଭୁବନ ବ୍ଲକ ସମେତ ପଡ଼ୋଶୀ କେନ୍ଦୁଝର ଏବଂ ଯାଜପୁର ଜିଲାର ବ୍ୟବସାୟୀ। ରାତି ପାହିଲେ ଏଠାରେ ଦୋକାନ ଖୋଲନ୍ତି ୭୦୦ରୁ ଊର୍ଦ୍ଧ୍ୱ ବ୍ୟବସାୟୀ। ନିକଟରେ ବସ୍ଷ୍ଟାଣ୍ଡ ରହିଛି। ଦୈନିକ ୪୦ରୁ ଊର୍ଦ୍ଧ୍ୱ ବସ୍ ଯାତାୟତ କରୁଥିବାବେଳେ ବିଭିନ୍ନ କାର୍ଯ୍ୟରେ ଆସନ୍ତି ସହସ୍ରାଧିକ ଯାତ୍ରୀ। ଏହାକୁ ଦୃଷ୍ଟିରେ ରଖି ୧୦ ବର୍ଷ ତଳେ ସ୍ଥାପନ କରାଯାଇଥିଲା ଥଣ୍ଡା ପାନୀୟ ଜଳ ପ୍ରକଳ୍ପ। ତେବେ ପୁରୁଣା ହୋଇଯାଇଥିବାରୁ ଏହା ବାରମ୍ବାର ଅକାମୀ ହୋଇପଡୁଛି। ୩ଦିନ ହେଲା ଏକମାତ୍ର ନଳକୂପ ଅଚଳ ହୋଇପଡ଼ିବା ପରେ ସମସ୍ୟା ଆହୁରି ବଢ଼ିଯାଇଛି। ଏନ୍ଏସି ପକ୍ଷରୁ ଜଳଛତ୍ର ବ୍ୟବସ୍ଥାର ଠିକ୍ ପରିଚାଳନା ହେଉନାହିଁ। ଆଗକୁ ରଜ ମହୋତ୍ସବ ଥିବାରୁ ବଜାରରେ ଅସମ୍ଭାଳ ଭିଡ଼ ହେଉଛି। ହେଲେ ଏଭଳି ଏକ ବୃହତ୍ ବ୍ୟବସାୟିକ ପେଣ୍ଠସ୍ଥଳୀରେ ପାଣି ମୁନ୍ଦାଏ ନ ମିଳିବା ଚିନ୍ତାର ବିଷୟ ହୋଇଛି।
ସେହିପରି ନବନିର୍ମିତ ଶୌଚାଳୟ ତାଲା ଖୋଲୁ ନ ଥିବାରୁ ଯାତ୍ରୀମାନେ ଅସ୍ବାଭାବିକ ପରିସ୍ଥିତିର ସମ୍ମୁଖୀନ ହେଉଛନ୍ତି। ସେମାନେ ଖୋଲାଜାଗାରେ ଶୌଚ କରୁଛନ୍ତି। ବସ୍ଷ୍ଟାଣ୍ଡରେ ଯାତ୍ରୀ ବିଶ୍ରାମାଗାର ନ ଥିବାରୁ ଦୋକାନ ବାରଣ୍ଡାରେ ମୁଣ୍ଡ ଗୁଞ୍ଜୁଛନ୍ତି। ବାରମ୍ବାର ଅଭିଯୋଗ ସତ୍ତ୍ୱେ ଏନ୍ଏସି କର୍ତ୍ତୃପକ୍ଷ କିମ୍ବା ଜିଲା ପ୍ରଶାସନ ଏହାର ସମାଧାନ ପ୍ରତି ଗୁରୁତ୍ୱ ଦେଉ ନ ଥିବା ବ୍ୟବସାୟୀମାନେ ଉଦ୍ବେଗ ବ୍ୟକ୍ତ କରିଛନ୍ତି।
ଏ ସଂକ୍ରାନ୍ତରେ ଏନ୍ଏସି ନିର୍ବାହୀ ଅଧିକାରୀ ଶ୍ୟାମସୁନ୍ଦର ସାହୁ କୁହନ୍ତି, କିଛିଦିନ ତଳେ ଥଣ୍ଡା ପାନୀୟ ଜଳ ପ୍ରକଳ୍ପର ଫ୍ରିଜର ମରାମତି କରାଯାଇଥିଲା। ଏହା ପୁଣି ଅଚଳ ହୋଇଯାଇଥିବା ନେଇ ତାଙ୍କ ନିକଟରେ ଅଭିଯୋଗ ହୋଇନାହିଁ। ଖୁବ୍ଶୀଘ୍ର ଏହାର ମରାମତି କରାଯିବ। ଶୌଚାଳୟ କାର୍ଯ୍ୟକ୍ଷମ କରିବା ଦିଗରେ ପଦକ୍ଷେପ ନିଆଯିବ। ଜନସ୍ବାସ୍ଥ୍ୟ ବିଭାଗର କନିଷ୍ଠ ଯନ୍ତ୍ରୀ ସୋନାଲି ନାୟକ କୁହନ୍ତି, ନଳକୂପ ଅଚଳ ହୋଇଯାଇଥିବା ସମ୍ପର୍କରେ ତାଙ୍କ ନିକଟରେ ଅଭିଯୋଗ ହୋଇନାହିଁ। ଲୋକମାନଙ୍କ ଆବଶ୍ୟକତାକୁ ଦୃଷ୍ଟିରେ ରଖି ଏହାର ତୁରନ୍ତ ମରାମତି କରାଯିବ।
ସବୁ କାଗଜ କଲମରେ ସୀମିତ
ନୂଆବଜାର ଉପରେ ବ୍ଲକର ହଜାର ହଜାର ବ୍ୟବସାୟୀ ଏବଂ ଗ୍ରାହକ ନିର୍ଭରଶୀଳ। ଏଠାରେ ପାନୀୟ ଜଳର ଅଭାବ ଲାଗି ରହିଛି। ଶୌଚାଳୟ ଥାଇ କାମରେ ଆସୁନାହିଁ। ଏନ୍ଏସି କର୍ତ୍ତୃପକ୍ଷ, ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯାଇଛି। ହେଲେ ସେମାନେ ଦେଇଥିବା ସମାଧାନର ପ୍ରତିଶ୍ରୁତି କାଗଜକଲମରେ ସୀମିତ ହୋଇ ରହିଯାଇଛି।
-ଦୁଷ୍ମନ୍ତ ପୃଷ୍ଟି, ବଜାର କମିଟି ସଭାପତି
ଦୋକାନ ବାରଣ୍ଡା ପାଲଟିଛି ବିଶ୍ରାମସ୍ଥଳୀ
ବଜାରରେ ଯାତ୍ରୀ ଓ ବ୍ୟବସାୟୀଙ୍କ ସାମୟିକ ବିଶ୍ରାମ ଲାଗି କୌଣସି ବ୍ୟବସ୍ଥା ନାହିଁ। ଲୋକମାନେ ଦୟନୀୟ ଅବସ୍ଥାରେ ଦୋକାନ ବାରଣ୍ଡାରେ ବିଶ୍ରାମ ନେଉଛନ୍ତି। ସୁବିଧାରେ ପିଇବା ପାଣି ମିଳୁନାହିଁ। ଏନ୍ଏସି ପକ୍ଷରୁ କରାଯାଇଥିବା ଜଳଛତ୍ରର ଚିହ୍ନବର୍ଣ୍ଣ ନାହିଁ। ଏହାର ସମାଧାନ ନ ହେଲେ ଆନ୍ଦୋଳନ କରାଯିବ। -ଚନ୍ଦ୍ରମଣି ନାଥ, ବ୍ୟବସାୟୀ
