ବିଜେଡି, କଂଗ୍ରେସ ପ୍ରାର୍ଥୀଙ୍କ ଗାଡ଼ି ନାହିଁ, ଇନୋଭା ଚଢୁଛନ୍ତି ଭାଜପା ପ୍ରାର୍ଥୀ
10:51 amNovember 19, 2022November 19, 2022 / 41

ପଦ୍ମପୁର,୧୯।୧୧(ଡି.ଏନ.ଏ.): ପଦ୍ମପୁର ବିଧାନସଭା ଉପନିର୍ବାଚନ ପାଇଁ ପ୍ରାର୍ଥୀମାନଙ୍କ ସତ୍ୟପାଠକୁ ସାର୍ବଜନୀନ କରିଛନ୍ତି ନିର୍ବାଚନ ଅଧିକାରୀ। ନିର୍ବାଚନ ଅଧିକାରୀଙ୍କ ସୂଚନା ମୁତାବକ, ବିଜେଡି ପ୍ରାର୍ଥତ୍ନୀ ବର୍ଷା ସିଂ ବରିହା ଓ କଂଗ୍ରେସ ପ୍ରାର୍ଥୀ ସତ୍ୟଭୂଷଣ ସାହୁଙ୍କ ପାଖରେ କୌଣସି ଦୁଇ ଚକିଆ କିମ୍ବା ଚାରି ଚକିଆ ଯାନ ନ ଥିବାବେଳେ ଭାଜପା ପ୍ରାର୍ଥୀ ପ୍ରଦୀପ ପୁରୋହିତଙ୍କ ପାଖରେ ଇନୋଭା କାର୍‌ ରହିଛି। ଭାଜପା ପ୍ରାର୍ଥୀ ପୁରୋହିତଙ୍କ ନାମରେ ମୋଟ୍‌ ୫୫ଲକ୍ଷ ୬୭ ହଜାର ଟଙ୍କାର ସମ୍ପତ୍ତି ଥିବାବେଳେ ତାଙ୍କ ସ୍ତ୍ରୀ ପ୍ରତିମାଙ୍କ ନାମରେ ୩୮ଲକ୍ଷ ୫୧ ହଜାର ଟଙ୍କାର ସ୍ଥାବର ସମ୍ପତ୍ତି ଓ ୪୪ ଲକ୍ଷ ଟଙ୍କାର ଅସ୍ଥାବର ସମ୍ପତ୍ତି ରହିଛି। ସେହିପରି ବିଜେଡି ପ୍ରାର୍ଥତ୍ନୀ ବର୍ଷା ସିଂ ବରିହାଙ୍କ ପାଖରେ ୧୦ ଲକ୍ଷ ୯୪ ହଜାର ଟଙ୍କାର ଗହଣା ରହିଛି । ବର୍ଷାଙ୍କ ମୋଟ ସ୍ଥାବର ସମ୍ପତ୍ତିର ମୂଲ୍ୟ ୧୨ ଲକ୍ଷ ୩୬ ହଜାର ଟଙ୍କା ଏବଂ ଅସ୍ଥାବର ସମ୍ପତ୍ତିର ମୂଲ୍ୟ ୯୦ ଲକ୍ଷ ଟଙ୍କା ହେବ। ବର୍ଷାଙ୍କ ସ୍ବାମୀ ସ୍ମୃତିସୌରଭ ବଳିୟାର ସିଂଙ୍କର ମୋଟ୍‌ ୪୨ ଲକ୍ଷ ୫୦ ହଜାର ଟଙ୍କାର ସ୍ଥାବର ସମ୍ପତ୍ତି ଥିବା ତାଙ୍କ ନାମରେ କୌଣସି ଅସ୍ଥାବର ସମ୍ପତ୍ତି ନାହିଁ। ସେହିପରି କଂଗ୍ରେସ ପ୍ରାର୍ଥୀ ସତ୍ୟଭୂଷଣ ସାହୁଙ୍କ ଅସ୍ଥାବର ସମ୍ପତ୍ତି ଅନ୍ୟ ଦୁଇ ପ୍ରାର୍ଥୀଙ୍କଠାରୁ ଅଧିକ। ସତ୍ୟଭୂଷଣଙ୍କ ନାମରେ ୪କୋଟି ୩୦ ଲକ୍ଷ ଟଙ୍କାର ଅସ୍ଥାବର ସମ୍ପତ୍ତି ଏବଂ ୨ଲକ୍ଷ ୫୦ହଜାର ଟଙ୍କାର ସ୍ଥାବର ସମ୍ପତ୍ତି ରହିଛି। ସେହିପରି ତାଙ୍କ ସ୍ତ୍ରୀଙ୍କ ନାମରେ ୪ ଲକ୍ଷ ୧୦ ହଜାର ଟଙ୍କା ରହିଥିବା ବେଳେ ସତ୍ୟଭୂଷଣଙ୍କର ଭୁବନେଶ୍ୱରରେ ଏକ କୋଠାଘର ରହିଛି। ଭାଜପା ପ୍ରାର୍ଥୀଙ୍କ ନାମରେ ବିଭିନ୍ନ ଥାନାରେ ୧୦ଟି ଫୌଜଦାରୀ ମାମଲା ଓ କଂଗ୍ରେସ ପ୍ରାର୍ଥୀଙ୍କ ନାମରେ ୨ଟି ଫୌଜଦାରୀ ମାମଲା ରହିଛି । ମାତ୍ର ବିଜେଡି ପ୍ରାର୍ଥୀଙ୍କ ନାମରେ କୌଣସି ମାମଲା ନାହିଁ। ସେହିପରି ସତ୍ୟଭୂଷଣ ବିଜ୍ଞାନରେ ସ୍ନାତକୋତ୍ତର, ବର୍ଷା ଆଇନ ଡିଗ୍ରୀ ହାସଲ କରିଥିବା ବେଳେ ପ୍ରଦୀପ ମାଟ୍ରିକ ପାଶ୍‌ କରିଥିବା ସତ୍ୟପାଠରେ ଦର୍ଶାଯାଇଛି।