ବୁଗୁଡ଼ା,୪ା୯(କାଳି ଚରଣ ଦାଶ): ସ୍ବାଧୀନତାର ୭୬ ବର୍ଷ ପରେ ବି ଗାଁକୁ ଭଲ ରାସ୍ତାଟିଏ ନାହିଁ। ଫଳରେ ଛାତ୍ରୀଛାତ୍ରଙ୍କ ସମେତ ଗ୍ରାମବାସୀ ଯାତାୟାତରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏଭଳି ସ୍ଥିତି ଦେଖିବାକୁ ମିଳିଛି ବୁଗୁଡ଼ା ବ୍ଲକ ଗୋଲିଆ ପଞ୍ଚାୟତରେ।
ଗୋଲିଆ ପଞ୍ଚାୟତର ତାଳସର, ଡାହାଣୀପଲ୍ଲୀ, ମରେଇପଲ୍ଲୀ ଆଦି ଗାଁକୁ ସଂଯୋଗ କରୁଥିବା ରାସ୍ତା ଏବେ ମରଣଯନ୍ତା ପାଲଟିଛି। ଫଳରେ ଷଷ୍ଠରୁ ଦଶମ ଯାଏ ପଢୁଥିବା ଛାତ୍ରୀଛାତ୍ରମାନେ ଗୋଲିଆ ହାଇସ୍କୁଲ ଏବଂ ଲୋକେ ଭତ୍ତା ଟଙ୍କା ଓ ରାଶନ ପାଇଁ ପଞ୍ଚାୟତ ଅଫିସକୁ ଯିବା ଆସିବାରେ ନାନାଦି ଅସୁବିଧାର ସମ୍ମୁଖୀନ ହେଉଛନ୍ତି। ବିପଦ ସମୟରେ ଆମ୍ବୁଲାନ୍ସ ମରେଇପଲ୍ଲୀ ଗାଁ ପାଖକୁ ଯାଇପାରୁଥିବା ବେଳେ ଅନ୍ୟ ଗାଁଗୁଡ଼ିକୁ ଯାଇ ପାରୁ ନ ଥିବାରୁ ଲୋକେ ରୋଗୀକୁ ଆମ୍ବୁଲାନ୍ସ ପାଖକୁ ଆଣିବାକୁ ବାଧ୍ୟ ହେଉଛନ୍ତି।
ଏ ନେଇ ସମ୍ପୃକ୍ତ ଗ୍ରାମବାସୀ ଜନପ୍ରତିନିଧିଙ୍କ ନିକଟରେ ଗୁହାରି କଲେ ମଧ୍ୟ ପ୍ରତିଶ୍ରୁତି ଛଡ଼ା କୌଣସି ସୁଫଳ ମିଳୁ ନ ଥିବା ଅଭିଯୋଗ ହେଉଛି। ତେବେ ମହିଳା ଓ ପୁରୁଷ ସମସ୍ୟା ସମାଧାନ ପାଇଁ ଏକ ଅଭିଯୋଗ ପତ୍ର ବିଡିଓ ବାସୁଦେବ ନାୟକଙ୍କୁ ପ୍ରଦାନ କରିଛନ୍ତି। ରାସ୍ତା ସମସ୍ୟାର କୌଣସି ସମାଧାନ ନ ହେଲେ ଆଗାମୀ ଦିନରେ ଗ୍ରାମବାସୀ ସମୂହ ଭୋଟ ବର୍ଜନ କରିବାକୁ ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି।
ବିଡିଓ ଅଭିଯୋଗକୁ ଭିତ୍ତି କରି ଆସନ୍ତାକାଲି ସେଠାକୁ ଯାଇ ରାସ୍ତା ଅବସ୍ଥା ଦେଖି ମୋରମ୍ କିମ୍ବା କ୍ରଶର ଗୁଣ୍ଡ ପକାଇ ଆବାଶ୍ୟକ ବ୍ୟବସ୍ଥା କରିବାକୁ ପ୍ରତିଶ୍ରୁତି ଦେଇଛନ୍ତି। ଏପରିକି ରାସ୍ତାକୁ ଗ୍ରାମ୍ୟ ଉନ୍ନୟନ ବିଭାଗକୁ ହସ୍ତାନ୍ତର କରାଯାଇଛି ଏବଂ ପକ୍କା ରାସ୍ତା ନିର୍ମାଣ ପାଇଁ ଟେଣ୍ଡର ପ୍ରକ୍ରିୟା ପରେ ରାସ୍ତା କାମ ହେବ ବୋଲି ବିଡିଓ ଗ୍ରାମବାସୀଙ୍କୁ ଆଶ୍ୱାସନା ଦେଇଥିଲେ।
