ମହାକାଳପଡ଼ା,୬।୭ (ଡି.ଏନ.ଏ.): କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ତୃଣମୂଳ ସ୍ତରରେ ବସବାସ କରୁଥିବା ଅନୁସୂଚିତ ଜନଜାତି ସମ୍ପ୍ରଦାୟର ଅନେକ ଗରିବ ଶ୍ରେଣୀର ଲୋକମାନଙ୍କ ପାଇଁ ବିଭିନ୍ନ ଜନକଲ୍ୟାଣ ମୂଳକ ଯୋଜନା କାର୍ଯ୍ୟକାରୀ କରାଯାଉଛିି। ହେଲେ ସରକାରୀ ଯୋଜନା ଏହି ଅଭାବୀ ଶ୍ରେଣୀର ଲୋକମାନଙ୍କ ପାଖରେ ଅପହଞ୍ଚ ପାଲଟିଛି। ଏମିତି ଲୋକ ଅଛନ୍ତି ସେମାନଙ୍କୁ ଦୁଇ ଓଳି ପେଟକୁ ମୁଠେ ଭାତ ମିଳୁ ନ ଥିବା ବେଳେ ମୁଣ୍ଡ ଗୁଞ୍ଜିବାକୁ ଛାତ ନାହିଁ। ଏହାର ଏକ ଉଦାହରଣ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳ ବଉଳକଣି ପଞ୍ଚାୟତ ଅଧୀନ ୧୩ ନଂ. ୱାର୍ଡ ଆଦିବାସୀ ଅଧ୍ୟୁଷିତ ଅଞ୍ଚଳ ସିଂପଡ଼ା ଗଁାରେ।
ଏହି ଗ୍ରାମର ପାର୍ବତୀ ସିଂ (୭୫)ଙ୍କ ପରିବାର। ଆଖିକୁ ଭଲ ଭାବେ ଦିଶୁନାହିଁ। ସ୍ବାମୀ ୧୯୯୮ରେ ଆରପାରିକୁ ଚାଲିଗଲେ। ହେଲେ ସବୁଦିନ ପାଇଁ ପାର୍ବତୀଙ୍କୁ ଜୀବନ ସାରା ଦୁଃଖ ଦେଇଗଲେ। ସ୍ବାମୀଙ୍କ ମୃତ୍ୟୁର ୨୪ବର୍ଷ ବିତିଯାଇଥିଲେ ମଧ୍ୟ ଅଦ୍ୟାବଧି ପାର୍ବତୀଙ୍କୁ ବିଧବା ଭତ୍ତା ମିଳୁନି। ସେହିପରି ପାର୍ବତୀ ସିଂଙ୍କ ପାଖରେ ସାନ ଭଉଣୀ ଫୁଲ ସିଂ (୭୨) ରହୁଛନ୍ତି। ଫୁଲ ସିଂଙ୍କ ସ୍ବାମୀ ବୁଦ୍ଧିଆ ସିଂ ୩୦ ବର୍ଷ ପୂର୍ବେ ବାଲେଶ୍ୱରକୁ କାମ କରିବାକୁ ଯାଇ ଅଦ୍ୟାବଧି ଫେରି ନାହାନ୍ତି। ଏମାନେ ଓଳିଏ ଖାଇଲେ ଆର ଓଳିକୁ ଉପବାସ ରହିଥାନ୍ତି। ଏମାନଙ୍କ ଲାଗି ଆବାସ ଯୋଜନାରେ ଗୃହ ମିଳି ନ ଥିବା ବେଳେ ରାଶନ କାର୍ଡ ମଧ୍ୟ ମିଳିନାହିଁ। ଫଳରେ ନୁଆଁଣିଆ ଚାଳଘରେ ଏମାନେ ଦିନ କାଟୁଛନ୍ତି। ଘରକୁ ବିଦ୍ୟୁତ୍ ସଂଯୋଗ, ଶୌଚାଳୟ, ବିଧବା ଭତ୍ତା କିଛି ମିଳିନାହିଁ। ପର ଘରେ ମୂଲ ମଜୁରି ଲାଗି ପରିବାର ବହୁ କଷ୍ଟରେ ପ୍ରତିପୋଷଣ କରିଥାନ୍ତି ବୋଲି ସ୍ଥାନୀୟ ଲୋକେ କହିଛନ୍ତି। ଅପରପକ୍ଷରେ ଏହି ପରିବାରରେ ସା ହେଲେ ଖାଇଥାନ୍ତି। ଡିବିରି ଆଲୁଅ ପାଇଁ କିରୋସିନ କେଉଁଠୁ ପାଇବେ ବୋଲି ଦୁଇ ଭଉଣୀ ପ୍ରଶ୍ନ କରିଛନ୍ତି। ଏବେ ବର୍ଷାଦିନ ହୋଇଥିବାରୁ ନୁଆଁଣିଆ ଚାଳ ଘରେ କିଭଳି ରହିବେ ସେହି ଚିନ୍ତା ଘାରିଛି। ପାର୍ବତୀ ସିଂ କହିଛନ୍ତି, ବହୁବାର ଆବାସ ଓ ରାଶନ କାର୍ଡ ପାଇଁ ଆବେଦନ କରିଥିଲେ ହେଁ ଗୃହ କି ଖାଦ୍ୟ ସାମଗ୍ରୀ କିଛି ମିଳୁନାହିଁ। ସତେ ଯେମିତି ଯୋଜନାଗୁଡିକ କେବଳ ଥିଲା ବାଲାଙ୍କ ପାଇଁ ହୋଇଛି। ଆମ ଭଳି ଅଭାବୀ ଆଦିବାସୀ ପରିବାରକୁ କିଏ ପଚାରେ। ଯଦି ମୁଖ୍ୟମନ୍ତ୍ରୀ ଏବଂ ମହାକାଳପଡ଼ା ବିଧାୟକ ତଥା ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ଅତନୁ ସବ୍ୟସାଚୀ ନାୟକ ଆମ ପ୍ରତି ଟିକେ ଦୟା କରିନ୍ତେ ଆମେ ଆବାସ, ରାଶନ କାର୍ଡ ପାଇ ପାରନ୍ତୁ ବୋଲି ଆକୁଳ ନିବେଦନ କରିଛନ୍ତି। ଏ ସମ୍ପର୍କରେ ଜିଲାପାଳ ଅମ୍ରିତ ଋତୁରାଜଙ୍କୁ ପଚାରିବାରେ ଏଭଳି ଯଦି ପରିବାର ଅଛନ୍ତି, ତେବେ ସେମାନଙ୍କୁ ତୁରନ୍ତ ରାଶନ, ଭତ୍ତା ଓ ରେଡକ୍ରସ ପକ୍ଷରୁ ସହାୟତା ପ୍ରାଥମିକ ପର୍ଯ୍ୟାୟରେ ଯୋଗାଇ ଦିଆଯିବ। ସର୍ଭେ ପରେ ଯଦି ସେମାନେ ଆବାସ ପାଇ ନ ଥିବେ ଯୋଗାଇ ଦିଆଯିବ ବୋଲି ଜିଲାପାଳ ଋତୁରାଜ କହିଛନ୍ତି।
