ନୂଆଦିଲ୍ଲୀ,୧ା୮:ମୁଖ୍ୟ ନିର୍ବାଚନ କମିଶନର (ସିଇସି) ଓ ଅନ୍ୟ ନିର୍ବାଚନ କମିଶନରମାନଙ୍କ ନିଯୁକ୍ତି ପାଇଁ ଏକ ସ୍ବାଧୀନ ଓ ନିରପେକ୍ଷ ପ୍ରକ୍ରିୟା ଜରୁରୀ ବୋଲି ସୁପ୍ରିମକୋର୍ଟ ଗୁରୁବାର କହିଥିଲେ। ନିର୍ବାଚନ କମିଶନ କେବଳ ସ୍ବାଧୀନ ଭାବେ କାର୍ଯ୍ୟ କରିବା ଉଚିତ ନୁହେଁ, ବରଂ ସ୍ବାଧୀନ ଭାବେ କାର୍ଯ୍ୟ କରୁଥିବା ଜଣାପଡ଼ିବା ମଧ୍ୟ ଆବଶ୍ୟକ। ସିଇସି ଏବଂ ଇସିମାନଙ୍କୁ ନିଯୁକ୍ତି ନିମନ୍ତେ ପାର୍ଲାମେଣ୍ଟ ଆଇନ ପ୍ରଣୟନ କଲାବେଳେ ଚୟନ କମିଟିରେ ଭାରତର ପ୍ରଧାନ ବିଚାରପତି (ସିଜେଆଇ)ଙ୍କୁ ନ ନେବାକୁ କ’ଣ ପାଇଁ ନିଷ୍ପତ୍ତି ନେଲେ ବୋଲି ଜଷ୍ଟିସ୍ ଦୀପଙ୍କର ଦତ୍ତ ଏବଂ ସତୀଶ ଚନ୍ଦ୍ର ଶର୍ମାଙ୍କ ଖଣ୍ଡପୀଠ ପ୍ରଶ୍ନ କରିଥିଲେ। ସିବିଆଇ ନିର୍ଦ୍ଦେଶକ ଏବଂ ଲୋକପାଳ ନିଯୁକ୍ତି ପାଇଁ ଚୟନ କମିଟିରେ ସିଜେଆଇ ରହିଥିବାବେଳେ ସିଇସି ଏବଂ ଇସି ନିଯୁକ୍ତି ପାଇଁ ଗଠିତ କମିଟିରୁ ତାଙ୍କୁ ବାଦ୍ ଦେବାର କାରଣ କ’ଣ ବୋଲି ଖଣ୍ଡପୀଠ କହିଥିଲେ। ମାମଲାକୁ ସାମ୍ବିଧାନିକ ପୀଠକୁ ପଠାଯାଉ ବୋଲି ସରକାରଙ୍କ ନିବେଦନକ୍ରମେ ଖଣ୍ଡପୀଠ ରାୟ ସଂରକ୍ଷିତ ରଖିଥିଲେ।
ସମ୍ପ୍ରତି ସିଇସି ଏବଂ ଇସି ନିଯୁକ୍ତି ପାଇଁ ଗଠିତ ୩ ଜଣିଆ ଚୟନ କମିଟିରେ ପ୍ରଧାନମନ୍ତ୍ରୀ, ଜଣେ କେନ୍ଦ୍ରମନ୍ତ୍ରୀ ଓ ବିରୋଧୀ ଦଳ ନେତା ରହିଛନ୍ତି। ସରକାର ବର୍ତ୍ତମାନର ନିଯୁକ୍ତି ପ୍ରକ୍ରିୟା ସପକ୍ଷରେ ଯୁକ୍ତି କରିବା ସହ ଚୟନ ପ୍ରକ୍ରିୟାରେ ପ୍ରଧାନମନ୍ତ୍ରୀଙ୍କ ଭୂମିକା ଉପରେ ସନ୍ଦେହ କରାଯିବାର କୌଣସି କାରଣ ନାହଁି ବୋଲି କହିଛନ୍ତି। ସରକାର ଗଣତାନ୍ତ୍ରିକ ମୂଲ୍ୟବୋଧ ବିରୋଧରେ କାର୍ଯ୍ୟ କରିବେ ବୋଲି ସାମ୍ବିଧାନିକ ଅଦାଲତ ଧରିନେଇପାରିବେ ନାହିଁ ବୋଲି କେନ୍ଦ୍ର ଯୁକ୍ତି ଦର୍ଶାଇଛି। ଚୟନ କମିଟି ଉପରେ ପ୍ରଶ୍ନ ଉଠାଇବା ଉଭୟ ପାର୍ଲାମେଣ୍ଟର ଆଇନଗତ ଜ୍ଞାନ ଏବଂ ନିର୍ବାଚିତ ଅନୁଷ୍ଠାନଗୁଡ଼ିକ ଉପରେ ନ୍ୟସ୍ତ ସାମ୍ବିଧାନିକ ଆସ୍ଥା ଉପରେ ସନ୍ଦେହ କରିବା ସହ ସମାନ ବୋଲି ସରକାର କହିଛନ୍ତି।
Dharitri – Odisha’s No.1 Odia Daily
