ମୁମ୍ବାଇ,୧୦ ।୯: କରୋନା ମହାମାରୀ ମଧ୍ୟରେ ସମସ୍ତ ବିଘ୍ନବିନାଶକାରୀ ବିନାୟକଙ୍କ ପୂଜା ଆରମ୍ଭ ହୋଇଛି । ଭାଦ୍ରବ ମାସ ଶୁକ୍ଳପକ୍ଷ ଚତୁର୍ଥୀ ତିଥିରେ ଗଣେଶଙ୍କ ପୂଜାକୁ ଲୋକେ ଏଥର ଗହଳି ନ କରି ସତର୍କତାର ସହ ପାଳନ କରିବାକୁ କୁହାଯାଇଛି । ତେବେ ଗଣେଶଙ୍କ ପୂଜା ପାଇଁ ପ୍ରସିଦ୍ଧ ମହାରାଷ୍ଟ୍ରରେ ଏଥର କିନ୍ତୁ ଏହା ଫିକା ଫିକା ଲାଗିବ । କାରଣ ମୁମ୍ବାଇରେ ପେଣ୍ଡାଲ ଦର୍ଶନକୁ ମନା କରି ଦିଆଯାଇଛି । ଏଠାରେ ୧୪୪ ଧାରା ଲାଗୁ କରାଯିବା ସହ ପ୍ରସେଶନ ବାହାର କରିବାକୁ ମଧ୍ୟ କଟକଣା ଜାରି କରାଯାଇଛି । ମହାରାଷ୍ଟ୍ର ସରକାରଙ୍କ ପକ୍ଷରୁ କୁହାଯାଇଛି କି କରୋନା ମହାମାରୀ ପାଇଁ କେହି ପେଣ୍ଡାଲରେ ଦର୍ଶନ କରିପାରିବେ ନାହିଁ ସେଥିପାଇଁ ଅନ୍ଲାଇନ୍ ଦର୍ଶନର ବ୍ୟବସ୍ଥା କରାଯାଇଛି । ରାଜ୍ୟର ଗୃହ ବିଭାଗ ପକ୍ଷରୁ ପୂର୍ବରୁ କୁହାଯାଇଥିଲା କି ପେଣ୍ଡାଲରେ କେବଳ ଅନ୍ଲାଇନ ଦର୍ଶନ ହୋଇପାରିବ ଓ ଉତ୍ସବ ସମୟରେ ସାମାଜିକ ଦୂରତାକୁ କଡାକଡି ଭାବେ ପାଳନ କରିବାକୁ ପଡିବ । ସେହିପରି ସମସ୍ତ ଶ୍ରଦ୍ଧାଳୁ ମାସ୍କ ପିନ୍ଧିବା ଜରୁରୀ । ବିସର୍ଜନ ସମୟରେ ୧୦ରୁ ଅଧିକ ଲୋକ ଯାଇ ପାରିବେ ନାହିଁ । ବିସର୍ଜନ ସମୟରେ ପ୍ରସେଶନରେ ଭାଗ ନେଇଥିବା ଲୋକେ ୧୫ ଦିନ ପୂର୍ବରୁ କରୋନାର ଦୁଇଟି ଯାକ ଟିକା ନେଇଥିବା ଜରୁରୀ ବୋଲି ସରକାର କହିଛନ୍ତି ।
