ଭୁବନେଶ୍ୱର,୩୧।୧୨(ବ୍ୟୁରୋ):ଭୁବନେଶ୍ୱରକୁ ଗତ ୨୯ ତାରିଖ ସୁଦ୍ଧା ବ୍ରଟେନ୍ରୁ ୬୨ଜଣ ଫେରିଛନ୍ତି। ଏମାନଙ୍କ ମଧ୍ୟରୁ ବୁଧବାର ସନ୍ଧ୍ୟା ସୁଦ୍ଧା ୫୮ ଜଣଙ୍କ ସହ ଯୋଗାଯୋଗ ହୋଇପାରିଛି। କିନ୍ତୁ ଏବେବି ଆଉ ୪ଜଣଙ୍କ ଠିକଣା ମିଳୁ ନାହିଁ। କ୍ଷେତ୍ରସ୍ତରୀୟ ଯାଞ୍ଚ କରିବାକୁ ଗଠିତ ହୋଇଥିବା ବିଏମ୍ସି ଟିମ୍ ବ୍ରିଟେନ୍ ଫେରନ୍ତାଙ୍କ ଦ୍ୱାରା ପ୍ରଦତ୍ତ ଠିକଣାରେ ପହଞ୍ଚତ୍ପାରିନାହାନ୍ତି ବୋଲି ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ କହିଛନ୍ତି। ଚିହ୍ନଟ ହୋଇଥିବା ୫୮ ଜଣଙ୍କର ନମୁନା ସଂଗ୍ରହ ହୋଇଥିବାବେଳେ ସେମାନଙ୍କ କଣ୍ଟାକ୍ଟ ଟ୍ରେସିଂ ଆରମ୍ଭ ହୋଇଥିବା ସେ ସୂଚନା ଦେଇଛନ୍ତି। ଗତ ୨୯ ତାରିଖରେ ବିଏମ୍ସି ନିକଟକୁ ଆସିଥିବା ଦ୍ୱିତୀୟ ପର୍ଯ୍ୟାୟ ଫେରନ୍ତାଙ୍କ ତାଲିକାରେ ମୋଟ ୮୮ ଜଣଙ୍କ ନାମ ଉଲ୍ଲେଖ ଥିଲା। କିନ୍ତୁ ଉକ୍ତ ତାଲିକାରେ ୯ ଜଣଙ୍କ ନାମ ଦୁଇଥର ଉଲ୍ଲେଖ ରହିଥିବାବେଳେ ୧୭ଜଣ ଅଣ ବିଏମ୍ସି ଅଞ୍ଚଳର ଓ ବାକି ୬୨ଜଣ ଭୁବନେଶ୍ୱରର ଥିଲେ। ଭୁବନେଶ୍ୱରର ଏହି ୬୨ଜଣଙ୍କ ମଧ୍ୟରୁ ୪ ଜଣଙ୍କୁ ୨୪ ଘଣ୍ଟା ମଧ୍ୟରେ ସମ୍ପର୍କ କରାଯିବାକୁ ପ୍ରୟାସ ଜାରି ରହିଛି। ଏନେଇ ଆର୍ଆର୍ଟି ଟିମ୍ ଅଧିକ ସକ୍ରିୟ ଥିବାବେଳେ ଖୁବ୍ଶୀଘ୍ର ଏନେଇ ଗଣମାଧ୍ୟମକୁ ସୂଚନା ପ୍ରଦାନ କରାଯିବ ବୋଲି କମିଶନର କହିଛନ୍ତି।
ସୂଚନାଯୋଗ୍ୟ, ବ୍ରିଟେନ୍ରୁ ଭୁବନେଶ୍ୱରକୁ ଫେରିଥିବା ବ୍ୟକ୍ତିଙ୍କ ଫୋନ୍ ନମ୍ବର ବନ୍ଦ ଥିବାରୁ ସେମାନଙ୍କୁ ଯୋଗାଯୋଗ ହୋଇପାରି ନ ଥିଲା। ସେମାନଙ୍କୁ ଟ୍ରେସ୍ କରିବା ପାଇଁ ବିଏମ୍ସି ଜୋନ୍ସ୍ତରୀୟ ଟିମ୍ ଗଠନ କରି କ୍ଷେତ୍ରସ୍ତରୀୟ ଯାଞ୍ଚ କରିବା ଆରମ୍ଭ କରିଥିଲା। ମଙ୍ଗଳବାର ଏହି ଟିମ୍ ମାତ୍ର ୨୪ ଘଣ୍ଟାରେ ଯୋଗାଯୋଗ ହୋଇପାରି ନ ଥିବା ଅଧାରୁ ଅଧିକ ଫେରନ୍ତାଙ୍କୁ ଭେଟି ସେମାନଙ୍କ ନମୁନା ପରୀକ୍ଷା କରାଇଥିଲା। ଏଥିସହ ସେମାନଙ୍କୁ ଘରେ ଏକାକୀ ରହିବାକୁ ପରାମର୍ଶ ଦେଇଥିବା ଜଣାପଡ଼ିଛି।
