ଦୁବାଇ,୨୫।୧୦: ୧୦ ଉଇକେଟରେ ବିଜୟ ସହ ବିଶ୍ୱକପ୍ ଇତିହାସରେ ଭାରତର ଅପରାଜେୟ ଧାରାରେ ପୂର୍ଣ୍ଣଚ୍ଛେଦ ପକାଇଛି ପାକିସ୍ତାନ। ମ୍ୟାଚ୍ର ଏଭଳି ଫଳାଫଳ ସହ ‘ମୌକା ମୌକା’ ବିଜ୍ଞାପନ ଉପରେ ଅନେକ ମିମ୍ସ ଭାଇରାଲ ହେଉଛି। ‘ମୌକା ମୌକା’ ବିଜ୍ଞାପନ ମୁଖ୍ୟତଃ ବିଶ୍ୱକପ୍ରେ ଭାରତ-ପାକିସ୍ତାନ ମ୍ୟାଚ୍ ପୂର୍ବରୁ ପ୍ରକାଶ ପାଇଥାଏ।
ବହୁ ପ୍ରତିକ୍ଷିତ ମ୍ୟାଚ୍ ପୂର୍ବରୁ ଆଇସିସି ପୁରୁଷ ଟି୨୦ ବିଶ୍ୱକପ୍ ପ୍ରସାରଣକାରୀ ଚ୍ୟାନେଲ ଷ୍ଟାର ସ୍ପୋଟର୍ସ ପକ୍ଷରୁ ମୌକା ମୌକା ବିଜ୍ଞାପନ ପ୍ରକାଶ ପାଇଥିଲା। ବିଶ୍ୱକପ୍ ଇତିହାସରେ ପାକିସ୍ତାନ ବିପକ୍ଷରେ ଅପରାଜେୟ ଥିବା ଭାରତ ଏଥର ମଧ୍ୟ ପାକିସ୍ତାନୀ ପ୍ରଶଂସକଙ୍କୁ ଉତ୍ସବ ମନାଇବାର ମୌକା (ସୁଯୋଗ) ଦେବ ନାହିଁ। କିନ୍ତୁ ରବିବାର ଖେଳାଯାଇଥିବା ମ୍ୟାଚ୍ ସବୁ କିଛି ବଦଳି ଦେଇଛି। ଏଣୁ ‘ମୌକା ମୌକା’ ବିଜ୍ଞାପନର ଆଉ ଉପଯୋଗୀତା ନାହିଁ ବୋଲି ଅନେକ ପ୍ରଶଂସକ ସୋସିଆଲ ମିଡିଆରେ ଜଣାଇଛନ୍ତି।
ଜଣେ ୟୁଜର ଲେଖିଛନ୍ତି, ଆଗାମୀ ବର୍ଷ ଠାରୁ କୌଣସି ‘ମୌକା ମୌକା’ ବିଜ୍ଞାପନ ଆସିବ ନାହିଁ। ସେହିଭଳି ଅନ୍ୟ ଜଣେ ୟୁଜର ଲେଖିଛନ୍ତି, ବିଜ୍ଞାପନରେ ପାକିସ୍ତାନୀ ପ୍ରଶଂସକଙ୍କ ଚରିତ୍ରରେ ଅଭିନୟ କରୁଥିବା ଅଭିନେତା କାନ୍ଦିବେ ନା ହସିବେ ଜାଣିପାରୁ ନାହାନ୍ତି। ଅନ୍ୟ କିଛି ମିମ୍ସରେ ପାକିସ୍ତାନର ବିଜୟ ସହ ମୌକା ମୌକା ଅଭିନେତାଙ୍କ କ୍ୟାରିୟର ଶେଷ ହୋଇଯାଇଥିବା ଉଲ୍ଲେଖ କରିଛନ୍ତି।
