ବାଲେଶ୍ୱର ଅଫିସ, ୭ା୫ ବାଲେଶ୍ୱର ସହର ଅଙ୍ଗାରଗଡ଼ିଆଠାରେ ରହୁଥିବା ଦିନମଜୁରିଆ ସପନ ବିନ୍ଧାଣିଙ୍କ ୫ବର୍ଷର ଝିଅ ଶୁଭଲକ୍ଷ୍ମୀ। ହସିଖେଳି ସାଙ୍ଗମାନଙ୍କ ସହ ଦିନ କଟାଇବା ସମୟରେ ଦୁଇଟି ଟ୍ୟୁମରରେ ସେ ଆକ୍ରାନ୍ତ। ତାଙ୍କ ବ୍ରେନରେ ଏକ ଟ୍ୟୁମର ହୋଇଥିବା ବେଳେ କାନ୍ଧ ପାଖରେ ମଧ୍ୟ ଏକ ଟ୍ୟୁମର ହୋଇଛି। ବ୍ରେନ୍ ପାଖରେ ହୋଇଥିବା ଟ୍ୟୁମର ଶିର ସହ ଯୋଡ଼ି ହୋଇଯାଇଥିବା ଡାକ୍ତରଙ୍କ ପକ୍ଷରୁ ଜଣାପଡ଼ିଛି।
ଅସ୍ତ୍ରୋପଚାର ପାଇଁ ବାଲେଶ୍ୱରରେ ସୁବିଧା ନ ଥିବାରୁ ସେମାନେ କଟକ ବଡ଼ ଡାକ୍ତରଖାନାକୁ ରେଫର କରିଦେଇଥିଲେ। ଶୁଭଲକ୍ଷ୍ମୀଙ୍କ ପରିବାର କଟକ ବଡ଼ ଡାକ୍ତରଖାନାକୁ ବାରମ୍ବାର ଯିବା ପରେ ବି ସେଠାରେ ଅସ୍ତ୍ରୋପଚାର କରାଯାଇ ନ ଥିଲା। ତେଣୁ ବାପା ସପନ ନିଜ ଝିଅର ଅସ୍ତ୍ରୋପଚାର ପାଇଁ ବିଜୁ ସ୍ବାସ୍ଥ୍ୟ କଲ୍ୟାଣ ବୀମା ଯୋଜନାରେ ଘରୋଇ ହସ୍ପିଟାଲ ଯାଇଥିଲେ। ମାତ୍ର ଝିଅର ବୟସ ଏବେ ୫ବର୍ଷ ହୋଇଥିବାରୁ ଝିଅ ଶୁଭଲକ୍ଷ୍ମୀଙ୍କ ନାମ ରାଶନ କାର୍ଡ଼ରେ ନ ଥିଲା। ତେଣୁ ବିଜୁ ସ୍ବାସ୍ଥ୍ୟକାର୍ଡ଼ରେ ଅପରେଶନ ସମ୍ଭବ ହୋଇପାରି ନ ଥିଲା। ସପନଙ୍କ ନିକଟରେ ଅର୍ଥ ନ ଥିବାରୁ କୁନି ଝିଅର ଅସ୍ତ୍ରୋପଚାର କରିବା ଅସମ୍ଭବ ହୋଇପଡ଼ିଛି। ଆଶା ହରାଇ ସେ ଘରେ ବସି ରହିଛନ୍ତି। ଏସ୍ଆର୍ବି ସ୍ବସ୍ତିକ ପଭର୍ଟି ଫାଉଣ୍ଡେଶନ ଅଧ୍ୟକ୍ଷା ସଂଯୁକ୍ତାରାଣୀ ବେହେରା ଏବଂ ଆଚ୍ଛା ସଙ୍ଗଠନ ସଭାପତି ବିସ୍ମିତ ରଞ୍ଜନ ଦାସ ଖବରପାଇ ସପନଙ୍କ ଘରେ ପହଞ୍ଚିଥିଲେ। ସମସ୍ତ ଘଟଣା ବୁଝିବା ପରେ ସପନଙ୍କ ପରିବାରରେ ଥିବା ରାଶନକାର୍ଡ଼ରେ ଝିଅର ନାମ ଉଠାଇବା ପାଇଁ ଜିଲା ଯୋଗାଣ ବିଭାଗ ଅଧିକାରୀଙ୍କ ସହ ଆଲୋଚନା କରି ନିରାଶ ହୋଇଥିଲେ। ପରେ ଜିଲା ଜରୁରୀକାଳୀନ ଅଫିସ୍କୁ ଯାଇ ସହାୟତା ପାଇଁ ଆଲୋଚନା କରି ବିଫଳ ହେବାରୁ ଶୁଭଲକ୍ଷ୍ମୀଙ୍କ ଅସ୍ତ୍ରୋପଚାରର ଆଶା ମଉଳିଯାଇଛି।
ଜିଲା ଜରୁରୀକାଳୀନ ଅଧିକାରିଣୀ ରିଜୱାନା କୱକବ କହିଛନ୍ତି, ଉକ୍ତ ନାମଧାରୀ କୌଣସି ବ୍ୟକ୍ତି ଶିଶୁକନ୍ୟାର ସମସ୍ୟା ନେଇ ଆସିନାହାନ୍ତି। ତାଙ୍କୁ ରାଷ୍ଟ୍ରୀୟ ବାଲ୍ ସୁରକ୍ଷା କାର୍ଯ୍ୟକ୍ରମ (ଆର୍ବିଏସ୍) ଯୋଜନାରେ ଭଲ କରି ଚିକିତ୍ସା କରାଯାଇପାରିବ। ଏହାପରେ ମଧ୍ୟ ତାଙ୍କୁ ରେଡ଼କ୍ରସ୍ ଭଳି ବିଭିନ୍ନ ସଂସ୍ଥାରୁ ଆର୍ଥିକ ସହାୟତା ଯୋଗାଇ ଦିଆଗଲେ ଚିକିତ୍ସା ହୋଇପାରିବ ବୋଲି ପ୍ରକାଶ କରିଛନ୍ତି।
