ନୂଆଦିଲ୍ଲୀ,୨୩।୪: ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା ବୁଧବାର ଦିନ ବଡ଼ ଘୋଷଣା କରିଛନ୍ତି । ଯାନବାହନ ଦ୍ୱାରା ହେଉଥିବା ବାୟୁ ପ୍ରଦୂଷଣକୁ ରୋକିବା ପାଇଁ କଠୋର ପଦକ୍ଷେପ ନିଆଯିବ ବୋଲି କହିଛନ୍ତି। ଦିଲ୍ଲୀ ସରକାରଙ୍କ ଅନୁଯାୟୀ, ଜାତୀୟ ରାଜଧାନୀର କୌଣସି ପେଟ୍ରୋଲ ପମ୍ପରେ ବୈଧ ପ୍ରଦୂଷଣ ପ୍ରମାଣପତ୍ର (PUC) ପ୍ରମାଣପତ୍ର ନଥିବା ଯାନଗୁଡ଼ିକୁ ଆଉ ପେଟ୍ରୋଲ କିମ୍ବା ଡିଜେଲ ଯୋଗାଇ ଦିଆଯିବ ନାହିଁ ।
ଏହି ପରିପ୍ରେକ୍ଷୀରେ, ମୁଖ୍ୟମନ୍ତ୍ରୀ ରେଖା ଗୁପ୍ତା କହିଛନ୍ତି ଯେ ଯାନବାହନ ପ୍ରଦୂଷଣ ଉପରେ ଲଗାମ ଲଗାଇବା ଏବଂ ଦିଲ୍ଲୀରେ ବାୟୁ ଗୁଣବତ୍ତା ଉନ୍ନତ କରିବା ପାଇଁ ଏହି ନିୟମ ସ୍ଥାୟୀ ଭାବରେ କାର୍ଯ୍ୟକାରୀ କରାଯିବ । ସେ କହିଥିଲେ ଯେ ଦିଲ୍ଲୀର ବାସିନ୍ଦାଙ୍କୁ ଏକ ସ୍ୱଚ୍ଛ ଏବଂ ସୁସ୍ଥ ପରିବେଶ ଯୋଗାଇବା ପାଇଁ ସରକାର ସମ୍ପୂର୍ଣ୍ଣ ପ୍ରତିବଦ୍ଧ। ସରକାର ସ୍ପଷ୍ଟ କରିଛନ୍ତି ଯେ ବାୟୁ ପ୍ରଦୂଷଣର ଗମ୍ଭୀର ସମସ୍ୟାର ମୁକାବିଲା ପାଇଁ ଏପରି କଠୋର ପଦକ୍ଷେପ ନେବା ଜରୁରୀ ହୋଇପଡ଼ିଛି ।
କେନ୍ଦ୍ରୀୟ ମୋଟର ଯାନ ନିୟମ, ୧୯୮୯ ର ନିୟମ ୧୧୫ (ଉପ-ନିୟମ ୭) ଅନୁଯାୟୀ, ପଞ୍ଜୀକରଣର ଗୋଟିଏ ବର୍ଷ ପରେ ଯାନବାହାନଗୁଡ଼ିକର ଏକ ବୈଧ PUC ପ୍ରମାଣପତ୍ର ରଖିବା ଏବଂ ଆବଶ୍ୟକ ହେଲେ ତାହା ଉପସ୍ଥାପନ କରିବା ବାଧ୍ୟତାମୂଳକ । ତଥାପି, ଅନେକ ଯାନ ବୈଧ ପ୍ରମାଣପତ୍ର ବିନା ଚାଲିବା ଜାରି ରଖିଛି, ଯାହା ଫଳରେ ପ୍ରଦୂଷଣ ସ୍ତର ବୃଦ୍ଧି ପାଉଛି। ଏହାର ଜବାବରେ, ସରକାର ସମସ୍ତ ପେଟ୍ରୋଲ ପମ୍ପ ଏବଂ ଏଜେନ୍ସିଗୁଡ଼ିକୁ ନିର୍ଦ୍ଦେଶନାମା ଜାରି କରିଛନ୍ତି, କଡ଼ା କାର୍ଯ୍ୟାନୁଷ୍ଠାନର ଆବଶ୍ୟକତା ଉପରେ ଗୁରୁତ୍ୱାରୋପ କରିଛନ୍ତି।