ବଅଁରପାଳ, ୨୬ା୧୧(ଉପେନ୍ଦ୍ର ରାଉତ): ପ୍ରତିବର୍ଷ ଧୁମଧାମରେ ଅନୁଷ୍ଠିତ ହେଉଥିବା ଅନୁଗୋଳ ଜିଲା ବଅଁରପାଳ ବ୍ଲକ ଗଡସନ୍ତ୍ରୀ ଓ ତୁଳସୀପାଳ ଗ୍ରାମର ଅଧିଷ୍ଠାତ୍ରୀ ଦେବୀ ମା’ ଲୋଭୀଙ୍କ ଯାତ୍ରା ଚଳିତ ବଷର୍ର୍ ଆୟୋଜନ ହେବନି। ୪ ଦିନ ଧରି ଯାତ୍ରା ଯୋଗୁ ଉତ୍ସବମୁଖର ରହୁଥିବା ପୀଠ ଏ ବର୍ଷ ଚଳଚଞ୍ଚଳ ହୋଇଉଠିବନି। କରୋନା କଟକଣା ଯୋଗୁ କେବଳ ବିଧିରକ୍ଷା ନିମନ୍ତେ ଦୁଇ ଦିନରେ ମା’ଙ୍କ ଯାତ୍ରା ଶେଷ କରାଯିବ ବୋଲି ନିଷ୍ପତ୍ତି ହୋଇଛି।
୭ ଦିନ ପୂର୍ବରୁ ଯାତ୍ରା ପାଇଁ ପ୍ରସ୍ତୁତି ଆରମ୍ଭ ହୋଇଯାଇଥାଏ। ଏଥିପାଇଁ ଲକ୍ଷାଧିକ ଟଙ୍କାର ବ୍ୟୟ ଅଟକଳ କରାଯାଇଥାଏ। ହେଲେ ଚଳିତ ବର୍ଷ କରୋନା ସଂକ୍ରମଣକୁ ଦୃଷ୍ଟିରେ ରଖି ଦୁଇ ଗ୍ରାମ ପକ୍ଷରୁ ଏ ଦିଗରେ କୌଣସି ପ୍ରସ୍ତୁତି କରାଯାଇନାହିଁ। ଆସନ୍ତା ୩୦ ତାରିଖରେ କେବଳ ଦୁଇ ଦିନ ମା’ଙ୍କ ପୂଜା ପାଳନ କରାଯିବ। ତୁଳସୀପାଳ ସ୍ଥିତ ଆଲମଘରୁ ୭ ଭକ୍ତ ମା’ଙ୍କୁ ଗଡସନ୍ତ୍ରୀ ଦେବୀପୀଠକୁ ଆଣିବେ। ପୂଜାସ୍ଥଳକୁ କୌଣସି ଶ୍ରଦ୍ଧାଳୁଙ୍କୁ ଆସିବାକୁ ବାରଣ କରାଯାଇଛି। ଏଥିସହ କୌଣସି ବ୍ୟବସାୟୀ ମଧ୍ୟ ଯାତ୍ରାସ୍ଥଳରେ ପସରା ନ ମେଲାଇବାକୁ ସ୍ଥିର ହୋଇଛି। ବିନା ବାଦ୍ୟବାଜଣାରେ ସମ୍ପୂର୍ଣ୍ଣ ନିରାଡମ୍ବର ଭାବେ ପୂଜା ସମ୍ପନ୍ନ ହେବ। ଶୋଭାଯାତ୍ରା କିମ୍ବା କୌଣସି ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ହେବନି। ଏଥିରେ କେହି ଶ୍ରଦ୍ଧାଳୁ ସେମାନଙ୍କ ଶିଶୁଙ୍କ ମୁଣ୍ଡନ ମଧ୍ୟ କରିପାରିବେନି ବୋଲି ନିଷ୍ପତ୍ତି ହୋଇଛି।
ପାଳନ ହେବ କଟକଣା
କରୋନା କଟକଣା ପୂଜା ଆୟୋଜନରେ ବାଧକ ସାଜିଛି। ଚଳିତ ବର୍ଷ ୪ ଦିନ ବଦଳରେ କେବଳ ବିଧିରକ୍ଷା ପାଇଁ ଦୁଇଦିନ ପୂଜା କରାଯିବ। ଗୋଟିଏ ଦିନ ତୁଳସୀପାଳରୁ ଠାକୁରାଣୀ ଆସି ରାତିରେ ମନ୍ଦିରରେ ରହିବା ପରେ ପରଦିନ ଦିଅଁଘରକୁ ବାହୁଡିବେ। ଜନହିତ ପାଇଁ କଟକଣା ପାଳନ ହେବ।
-ସୁନୀଲ କୁମାର ମାଝି, ପୂଜା ଟ୍ରଷ୍ଟ ବୋର୍ଡ ଅଧ୍ୟକ୍ଷ
ଜନଶୂନ୍ୟ ରହିବ ଯାତ୍ରାସ୍ଥଳ
ମା’ଙ୍କ ପୂଜାକୁ ଶ୍ରଦ୍ଧାର ସହ ଅପେକ୍ଷା କରିଥାନ୍ତି ଶ୍ରଦ୍ଧାଳୁ। କିନ୍ତୁ ଚଳିତ ବର୍ଷ ସେମାନେ ମା’ଙ୍କ ଦର୍ଶନ ପାଇବେନି। ଶୋଭାଯାତ୍ରାରେ ବାଦ୍ୟବାଜଣା ବାଜିବନି। ହାତଗଣତି ଲୋକଙ୍କ ଉପସ୍ଥିତିରେ କେବଳ ନୀତି ଅନୁଯାୟୀ ପୂଜା କରାଯିବ। ଯାତ୍ରାସ୍ଥଳ ବି ଜନଶୂନ୍ୟ ରହିବ।
– ପୂଜକ ରଞ୍ଜନ ଗଡନାୟକ
ଜଳିବନି ରଙ୍ଗିନ ଆଲୋକ
ରଙ୍ଗିନ ଆଲୋକ ସାଜସଜ୍ଜାରେ ଯାତ୍ରାସ୍ଥଳ ଆଲୋକିତ ହୋଇଉଠେ। ହେଲେ ଚଳିତ ବର୍ଷ ଏ ନେଇ କୌଣସି ପ୍ରସ୍ତୁତି ହୋଇନି। କେବଳ ବିଧି ଅନୁସାରେ କିପରି ସୁରୁଖୁରରେ ପୂଜା ପାଳନ ହେବ ସେ ଉପରେ ଗୁରୁତ୍ୱ ଦିଆଯାଇଛି। ଲୋକଙ୍କ ସ୍ବାସ୍ଥ୍ୟକୁ ପ୍ରାଧାନ୍ୟ ଦିଆଯାଇ ସମସ୍ତ ନିୟମ ପାଳନ କରାଯିବ।
-ନର୍ମଦା ମାଝି, ଗଡ଼ସନ୍ତ୍ରୀ ସରପଞ୍ଚ
