ବୁଗୁଡ଼ା, ୨୨ା୩(ଡି.ଏନ୍.ଏ.): ‘ସଭିଏଁ ପଢ଼ିବେ, ସଭିଏଁ ବଢ଼ିବେ’ର ସ୍ଲୋଗାନ ଏବେ ବୁଗୁଡ଼ା ଅଞ୍ଚଳରେ ଫେଲ୍ ମାରିଥିବା ଦେଖବବାକୁ ମିଳିଛି। ୩ ରୁ ୧୪ ବର୍ଷ ପିଲାଙ୍କ ପାଇଁ ଶିକ୍ଷା ବାଧ୍ୟତାମୂଳକ କରାଯାଇଛି। ଗୋଟିଏ ବି ଶିଶୁ ଯେମିତି ବିଦ୍ୟାଳୟ ଯିବାରୁ ବଞ୍ଚତ୍ତ ନହେବେ ସେଥିପ୍ରତି ବିଭିନ୍ନ ଅଧିକାରୀଙ୍କୁ ନିୟୋଜିତ କରାଯାଇଛି। ହେଲେ ଏତେ ସବୁ ବ୍ୟବସ୍ଥା ସତ୍ତ୍ୱେ ବି ସବୁ ଫେଲ୍ ମାରୁଛି, ଯାହାର ନିଛକ ଚିତ୍ର ଦେଖିବାକୁ ମିଳିଛି ଗଞ୍ଜାମ ଜିଲା ବୁଗୁଡ଼ା ବ୍ଲକ କରଚୁଲି ପଞ୍ଚାୟତ ଅନ୍ତର୍ଗତ ମାଧପଲ୍ଲୀ ଆଦିବାସୀ ଗ୍ରାମରେ। ଏହି ଗ୍ରାମର ୨ଟି ପିଲାଙ୍କୁ ଛାଡି ଦେଲେ ଅନ୍ୟମାନେ ସ୍କୁଲ କି ଅଙ୍ଗନୱାଡି କେନ୍ଦ୍ର ଦେଖିନାହାନ୍ତି। କାରଣ ବୁଝିବାରେ ଜଣାପଡିଲା ଗାଁରେ ଅଙ୍ଗନବାଡି କେନ୍ଦ୍ର ନାହିଁ କି ସ୍କୁଲ ନାହିଁ। ଫଳରେ ଶିଶୁଙ୍କୁ ୩ କିଲୋମିଟର ଦୂର କରଚୁଲି କିମ୍ବା ଜେଏକ ଗ୍ରାମକୁ ଯିବାକୁ ପଡେ। ହେଲେ ମାଟି ରାସ୍ତା ସାଙ୍ଗକୁ ରାସ୍ତାରେ ହାତୀ ଭୟ ଯୋଗୁଁ ଏତେ ବାଟ ଚାଲି ଚାଲି ଯିବା ଶିଶୁମାନଙ୍କ ପକ୍ଷେ କଷ୍ଟସାଧ୍ୟ ହେଉଥିବାରୁ ଏହି ଗ୍ରାମର ଶିଶୁମାନେ ଅଙ୍ଗନୱାଡି କେନ୍ଦ୍ର ଦେଖିନଥିବା ବେଳେ କିଛି ପିଲା ସ୍କୁଲ ମଧ୍ୟ ଦେଖିନାହାନ୍ତି। ଏହି ଗ୍ରାମରେ ରହୁଛନ୍ତି ସମୁଦାୟ ୧୮ ଆଦିବାସୀ ପରିବାର। ଗ୍ରାମର ସମସ୍ତେ ଗରିବ ଆଦିବାସୀ। ବଣ ଜଙ୍ଗଲରୁ କାଠ, ମହୁଲ ସଂଗ୍ରହ କରିବା ସହ ମୂଲ ଲାଗିଲେ ସେମାନଙ୍କ ପରିବାର ଚଳୁଛି। ପିଲାଙ୍କୁ ଏତେ ଦୂର ସ୍କୁଲ ଓ ଅଙ୍ଗନୱାଡି କେନ୍ଦ୍ରକୁ ନେବା ଆଣିବା କରିବା ପାଇଁ ସେମାନଙ୍କ ପାଖରେ ସମୟ ନାହିଁ। ଆବାସ ଯୋଜନା ବି ଏମାନଙ୍କ ପାଇଁ ସାତ ସପନ। ଫଳରେ ଅଧିକାଂଶ ଆଦିବାସୀ ପରିବାର ଭଙ୍ଗା ଚାଳ କୁଡିଆରେ ଜୀବନ ଅତିବାହିତ କରୁଛନ୍ତି। ପିଲାମାନେ ସ୍କୁଲ ଯିବା ପାଇଁ କୌଣସି ବ୍ୟବସ୍ଥା ନଥିବାରୁ ଅଧିକାଂଶ ପିଲା ଅଧାରୁ ପାଠ ଛାଡି ଥିବା ବେଳେ ବହୁତ ପିଲା ସ୍କୁଲ ବାରଣ୍ଡା ଦେଖିନାହାନ୍ତି। ଏହି ଗ୍ରାମର ସାଇରମ ମଳିକ, ପୂଜା ମଳିକ, ପ୍ରଦୀପ ମଳିକ, ମନୋଜ ଜାନି, ସନ୍ତୋଷିନୀ ଜାନି ଆଜି ପର୍ଯ୍ୟନ୍ତ ସ୍କୁଲ କି ଅଙ୍ଗନୱାଡି ପିଣ୍ଡା ମାଡ଼ି ନଥିବା ବେଳେ ଦେବରାଜ ମଳିକଙ୍କ ପୁଅ ଶିବ ମଳିକ, ନାରାୟଣ ମଳିକଙ୍କ ପୁଅ ଗରୁଡ଼ ଛାଡ଼ିଦେଲେ ବସନ୍ତ ନାୟକଙ୍କ ପୁଅ ନରେନ୍ଦ୍ର ନାୟକ, ନାରାୟଣ ମଳିକଙ୍କ ପୁଅ ସାଗର ମଳିକ, ଆକାଶ ମଳିକ, ରାଜେଶ ନାୟକ, ୫ ଶ୍ରେଣୀରୁ ପାଠ ଛାଡ଼ି ଘରେ ବସିଛନ୍ତି। ସେମାନଙ୍କୁ ବୁଝାଇ ଶୁଝାଇ ସ୍କୁଲ କିମ୍ବା ଅଙ୍ଗନୱାଡି କେନ୍ଦ୍ରକୁ ନେବା ପାଇଁ ଆଜି ପର୍ଯ୍ୟନ୍ତ ଶିକ୍ଷାବିଭାଗର କୌଣସି ଅଧିକାରୀ କି ଅଙ୍ଗନୱାଡି କର୍ମୀ ଗ୍ରାମକୁ ଆସି ନଥିବା କହିଛନ୍ତି ଗାଁ ସଭାପତି ବିପ୍ର ଚରଣ ମଳିକ।
