ବାଲେଶ୍ୱର, ୫।୪(ମାନସ ବିଶ୍ୱାଳ):ବାଲେଶ୍ୱର ଜିଲା ରେମୁଣା ବିଧାନସଭା ନିର୍ବାଚନମଣ୍ଡଳୀ ପାଇଁ ଭାଜପା ପ୍ରାର୍ଥୀ ଘୋଷଣା କରିଥିବା ବେଳେ ବିଜେଡି ପ୍ରାର୍ଥୀ ତାଲିକା ପ୍ରକାଶ ନ ପାଇବାରୁ ଆଶାୟୀମାନେ ଆଶଙ୍କାରେ ରହି ଛଟପଟ ହେଉଛନ୍ତି। ଏସ୍ସି ବର୍ଗଙ୍କ ପାଇଁ ସଂରକ୍ଷିତ ଏହି ଆସନ ୨୦୦୯ରେ ପୁର୍ନଗଠନ ହୋଇଥିଲା। ସେତେବେଳେ ଅନୁଷ୍ଠିତ ସାଧାରଣ ନିର୍ବାଚନରେ ବିଜେଡିର ସୁଦର୍ଶନ ଜେନା ବିଜୟୀ ହୋଇ ପ୍ରଥମ ବିଧାୟକ ହୋଇଥିଲେ। ୨୦୧୪ରେ ଭାଜପା ପ୍ରାର୍ଥୀ ଗୋବିନ୍ଦ ଚନ୍ଦ୍ର ଦାସ ବାଜି ମାରିନେଇଥିବା ବେଳେ ୨୦୧୯ରେ ପୁଣି ବିଜେଡି ପ୍ରାର୍ଥୀ ସୁଧାଂଶୁ ଶେଖର ପରିଡ଼ା ବିଜୟୀ ହୋଇଥିଲେ। ଏହି ନିର୍ବାଚନ ମଣ୍ଡଳୀ ବାଲେଶ୍ୱର ସହରକୁ ଲାଗିଛି। ୨୦୨୪ ସୁଦ୍ଧା ସରକାରୀ ତଥ୍ୟ ଅନୁସାରେ ଏହି ନିର୍ବାଚନମଣ୍ଡଳୀରେ ପୁରୁଷ ଭୋଟରଙ୍କ ସଂଖ୍ୟା ୧ଲକ୍ଷ ୧୪ହଜାର ୬୯୯, ମହିଳାଙ୍କ ସଂଖ୍ୟା ୧ଲକ୍ଷ ୧୧ହଜାର ୨୫ ଓ ଅନ୍ୟାନ୍ୟ ୨୮ ଜଣଙ୍କ ସହ ମୋଟ୍ ୨ଲକ୍ଷ ୨୫ହଜାର ୭୫୨ଜଣ ଭୋଟର ଅଛନ୍ତି।
ତା’ର ପ୍ରାର୍ଥୀ ଭାବେ ଗୋବିନ୍ଦ ଚନ୍ଦ୍ର ଦାସଙ୍କ ନାମ ଘୋଷଣା କରିଥିବା ବେଳେ ଅନ୍ୟ ଦୁଇ ପ୍ରମୁଖ ଦଳ ବିଜେଡି ଓ କଂଗ୍ରେସ ଅଦ୍ୟାବଧି ପ୍ରାର୍ଥୀ ଘୋଷଣା କରିନାହାନ୍ତି। ବିଜେଡିରେ ଆଶାୟୀଙ୍କ ସଂଖ୍ୟା ଏକାଧିକ ଥିବାବେଳେ କଂଗ୍ରେସକୁ ପ୍ରାର୍ଥୀ ଯୋଗାଡରେ ବିଳମ୍ବ ହେଉଥିବା ପାରିପାର୍ଶ୍ୱିକ ରାଜନୈତିକ ପରିସ୍ଥିତିରୁ ଜଣାପଡୁଛି। ବିଜେଡି ବିଧାୟକ ସୁଧାଂଶୁ ଶେଖର ପରିଡ଼ା ଦଳରୁ ନିଲମ୍ବିତ ହେବା ପରେ ଏହି ଆସନ ପାଇଁ ଟିକେଟ ଆଶାୟୀଙ୍କ ସଂଖ୍ୟା ବଢ଼ି ଯାଇଛି। ସାମାଜିକ କର୍ମୀ ବଂଶୀଧର ଦଳେଇ, ଇଂ. ଦୀପକ ମଲ୍ଲିକ, ସମିତିସଭ୍ୟା ଶାନ୍ତା ଦାସ, ଯୁବନେତା ଚନ୍ଦନ ମଲ୍ଲିକ, ପ୍ରଫେସର ଶତ୍ରୁଘ୍ନ ମଲ୍ଲିକ, ଭାରତୀ ଦଣ୍ଡପାଟ ଟିକେଟ ଆଶାୟୀ ଥିବା ଚର୍ଚ୍ଚା ହେଉଛି। ବିଜେଡି ଦ୍ୱିତୀୟ ପର୍ଯ୍ୟାୟ ସୁଦ୍ଧା ବସ୍ତା, ଜଳେଶ୍ୱର ଏବଂ ସୋର ନିର୍ବାଚନମଣ୍ଡଳୀରେ ପ୍ରାର୍ଥୀଙ୍କ ନାମ ଘୋଷଣା କରିଥିବା ବେଳେ ଭାଜପା ଜଳେଶ୍ୱର, ବାଲେଶ୍ୱର, ରେମୁଣା, ସୋର, ସିମୁଳିଆ ନିର୍ବାଚନମଣ୍ଡଳୀରେ ପ୍ରାର୍ଥୀଙ୍କ ନାମ ଘୋଷଣା କରିଛି। ଅନ୍ୟ ନିର୍ବାଚନମଣ୍ଡଳୀରେ ଟିକେଟ ଆଶାୟୀ ନେତାମାନେ ନାମ ଘୋଷଣାକୁ ନେଇ ଛଟପଟ ହେଉଥିବା ବେଳେ ସମର୍ଥକମାନେ ଟେନସନରେ ରହୁଥିବାର ଦେଖିବାକୁ ମିଳିଛି।
