ନୂଆଦିଲ୍ଲୀ,୩୦ା୩: ବର୍ତ୍ତମାନ ଖୁବ୍ଶୀଘ୍ର ଭାରତୀୟ ରାସ୍ତାରେ ହାଇଡ୍ରୋଜେନ କାରକୁ ଦେଖିବାକୁ ମିଳିବ। ବହୁ ପ୍ରତୀକ୍ଷିତ ପ୍ରଥମ ହାଇଡ୍ରୋଜେନ କାର ଭାରତରେ ନିଜର ଯାତ୍ରା ଆରମ୍ଭ କରିଛି। ଏହାର ପ୍ରଥମ ଶୁଭାରମ୍ଭ କରିଛନ୍ତି କେନ୍ଦ୍ର ସଡ଼କ ପରିବହନ ଏବଂ ରାଜପଥ ମନ୍ତ୍ରୀ ନୀତିନ ଗଡକରୀ। ବୁଧବାର ଏହି ଉନ୍ନତ ଧରଣର କାରରେ କେନ୍ଦ୍ର ମନ୍ତ୍ରୀ ସଂସଦ ପର୍ଯ୍ୟନ୍ତ ଯାତ୍ରା କରିଛନ୍ତି। ଏହି ସମୟରେ ସ୍ବଚ୍ଛ ଇନ୍ଧନରେ ଚାଲୁଥିବା ଏହି କାରଟି ଲୋକଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲା। ଟୟୋଟା କମ୍ପାନୀର ପାଇଲଟ ପ୍ରୋଜେକ୍ଟ ଅଧୀନରେ ଏହି କାର୍ ତିଆରି କରାଯାଇଛି ଏବଂ ଏଥିରେ ଉନ୍ନତ ଇନ୍ଧନ ସେଲ୍ ଲଗାଯାଇଥିବା ଜଣାପଡ଼ିଛି। ଏହି ଉନ୍ନତ ସେଲ୍ ଅକ୍ସିଜେନ ଓ ହାଇଡ୍ରୋଜେନର ମିଶ୍ରଣରୁ ବିଦ୍ୟୁତ୍ ଉତ୍ପାଦନ କରିଥାଏ। ଏହାଦ୍ୱାରା କାର ପରିଚାଳିତ ହୋଇଥାଏ। ଅନ୍ୟପଟେ ଏହି କାରଟି ପରିବେଶ ପାଇଁ ବେଶ୍ ଅନୁକୂଳ ହେବା ସହ କୌଣସି ପ୍ରକାର ପ୍ରଦୂଷଣ ବିସ୍ତାର କରେ ନାହିଁ ବୋଲି ନୀତିନ ଗଡକରି କହିଛନ୍ତି। ଏତଦ୍ ବ୍ୟତୀତସେ କହିଛନ୍ତି, ଏହି କାର ହେଉଛି ଭାରତର ଭବିଷ୍ୟତ। ପେଟ୍ରୋଲ ଏବଂ ଡିଜେଲ ଇଞ୍ଜିନ ଥିବା କାରଗୁଡିକ ଅନେକ ପ୍ରଦୂଷଣର କାରଣ ହୋଇଥାଏ। କିନ୍ତୁ ହାଇଡ୍ରୋ ଇନ୍ଧନ ସେଲ୍ କାର ଦ୍ୱାରା ପ୍ରଦୂଷଣ ହୋଇ ନ ଥାଏ। ସୂଚନାଯୋଗ୍ୟ, ଟୟୋଟା କିର୍ଲୋସ୍କର ମୋଟର୍ସ (ଟୟୋଟା) ନିକଟରେ ଏହି ହାଇଡ୍ରୋଜେନ କାର ଟୟୋଟା ମିରାଇକୁ ଭାରତୀୟ ବଜାରରେ ଲଞ୍ଚ କରିଛି। ହାଇଡ୍ରୋଜେନ ଇନ୍ଧନ ସେଲ୍ରେ ଚାଲୁଥିବା ଦେଶର ପ୍ରଥମ ଏହି କାର୍କୁ ଗଡକରୀ ଲଞ୍ଚ କରିଥିଲେ।
