ନୂଆଦିଲ୍ଲୀ,୧୧।୯: UPI ବ୍ୟବହାର କରୁଥିବା ଲକ୍ଷ ଲକ୍ଷ ଲୋକଙ୍କ ପାଇଁ ଆସିଛି ବଡ଼ ଅପଡେଟ୍। କିଛି ଦିନ ତଳେ UPI ଉପରେ ଚାର୍ଜ ଲାଗିବ ବୋଲି ଖବର ଆସିଥିଲା। ତେବେ ସରକାର ଏଭଳି ଖବରକୁ ଖଣ୍ଡନ କରିଥିଲେ ଏବଂ UPI ଉପରେ କୌଣସି ଅତିରିକ୍ତ ଚାର୍ଜ ଲାଗିବ ନାହିଁ ବୋଲି ସ୍ପଷ୍ଟ କରିଥିଲେ।
କିନ୍ତୁ ଏବେ ନୀତି ଆୟୋଗର ଉପାଧ୍ୟକ୍ଷ ଅଶୋକ ଲହିରୀଙ୍କ ବୟାନ ଏହି ପ୍ରସଙ୍ଗକୁ ପୁଣି ଚର୍ଚ୍ଚାକୁ ଆଣିଛି। ତାଙ୍କ କହିବା ଅନୁସାରେ, UPI ସବୁବେଳ ପାଇଁ ମାଗଣା ରହିପାରିବ ନାହିଁ। ଭବିଷ୍ୟତରେ ଏହା ଉପରେ ଚାର୍ଜ ଲାଗିବାର ସମ୍ଭାବନା ରହିଛି।
ମୁମ୍ବାଇରେ ଚାଲିଥିବା ଗ୍ଲୋବାଲ ଫିନଟେକ ଫେଷ୍ଟ ୨୦୨୬ ସମୟରେ ଅଶୋକ ଲହିରୀ ଏକ ସାକ୍ଷାତକାରରେ UPI ଚାର୍ଜକୁ ନେଇ ମତ ରଖିଥିଲେ। ବ୍ୟବସାୟ ପେମେଣ୍ଟ ପାଇଁ UPI ଚାର୍ଜ କେବେଠାରୁ ଲାଗୁ ହୋଇପାରେ ବୋଲି ପଚରାଯିବାରୁ ସେ କୌଣସି ନିର୍ଦ୍ଦିଷ୍ଟ ସମୟସୀମା କହିପାରିବେ ନାହିଁ ବୋଲି କହିଥିଲେ।
ତେବେ ତାଙ୍କ ମତରେ, UPI ପରି ବ୍ୟବସ୍ଥା ଚଳାଇବାରେ ଅପରେଟିଂ ଏବଂ ସେଟଅପ ଖର୍ଚ୍ଚ ରହିଛି। ତେଣୁ ସବୁକିଛିକୁ ଦୀର୍ଘ ସମୟ ଧରି ମାଗଣା ରଖିବା ସମ୍ଭବ ନୁହେଁ। ଫିନଟେକ କମ୍ପାନୀଗୁଡ଼ିକର ଏକ ସ୍ଥାୟୀ ଆର୍ଥିକ ମଡେଲ ରହିବା ଆବଶ୍ୟକ ବୋଲି ସେ କହିଛନ୍ତି।
UPI ମାଧ୍ୟମରେ ଲୋକଙ୍କଠାରୁ ଚାର୍ଜ ନିଆଯିବ କି, ବ୍ୟବସାୟୀଙ୍କଠାରୁ ଚାର୍ଜ ଲାଗିବ କି, ନା ବ୍ୟବସାୟ-ବ୍ୟବସାୟ କାରବାରରେ ଶୁଳ୍କ ରହିବଏସବୁ ନିଷ୍ପତ୍ତି ବିଶେଷଜ୍ଞମାନେ ନେବେ ବୋଲି ସେ କହିଛନ୍ତି। ତେବେ UPI ନିଜର ଖର୍ଚ୍ଚ ନିଜେ ବହନ କରିପାରୁଥିବା ବ୍ୟବସ୍ଥା ହେବା ଉଚିତ ବୋଲି ତାଙ୍କ ମତ।