ପାଟଣା,୧୪ା୯(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ଥାନା ଏଏସ୍ଆଇ ସରୋଜ କୁମାର ସେଠୀଙ୍କୁ ବିବାଦୀୟ ଆଇଟମ ଗର୍ଲ ନିଶା ମହାରଣାଙ୍କ ସହ ଫଟୋ ଉଠାଇବା ମହଙ୍ଗା ପଡ଼ିଛି। ସୁରକ୍ଷା ଦାୟିତ୍ୱରେ ନିୟୋଜିତ ଥାଇ ଫଟୋ ଉଠାଇବାକୁ ନେଇ ଏସ୍ପି ନୀତିନ କୁଶଲକର ଡାଗୁଡ କାର୍ଯ୍ୟାନୁଷ୍ଠାନ ଗ୍ରହଣକରି ବଦଳି କରିଥିବା ଜଣାପଡ଼ିଛି। ତାଙ୍କର ହେଡ୍କ୍ୱାର୍ଟର୍ସକୁ ବଦଳି ହୋଇଥିବା ବେଳେ ତାଙ୍କ ବିରୋଧରେ ତଦନ୍ତ ଚାଲିଛି।
ପ୍ରକାଶ ଯେ, ପାଟଣା ଥାନା ଅଧୀନ ତେଣ୍ଡରା ଗ୍ରାମ ହାଟ ପଡ଼ିଆରେ ମା’ ବିଶେଇପାଟ ଯାତ୍ରା କମିଟି ଆନୁକୂଲ୍ୟରେ ଅପେରା ମଞ୍ଚସ୍ଥ ହେଉଥିଲା। ଯାତ୍ରା ପାର୍ଟି ତରଫରୁ ଆଇଟମ ଗର୍ଲ ନିଶା ମହାରଣା ନୃତ୍ୟ ପ୍ରଦର୍ଶନ କରିଥିଲେ। ଏହି ସମୟରେ ସେ ଅଶ୍ଳୀଳ ନୃତ୍ୟ କରିଥିବାରୁ କେତେଜଣ ଦର୍ଶକ ବିରୋଧକରିବା ସହ ଅସନ୍ତୋଷ ପ୍ରକାଶ ପାଇଥିଲା। ନିଶାଙ୍କ ଅଶ୍ଳୀଳ ନୃତ୍ୟ ସାମାଜିକ ଗଣମାଧ୍ୟମରେ ମଙ୍ଗଳବାର ଭାଇରାର ହୋଇଥିଲା। ଅପେରା ସମୟରେ ଶାନ୍ତିଶୃଙ୍ଖଳା ରକ୍ଷା କରିବାକୁ ଯାଇଥିବା ପାଟଣା ଥାନାର ଏଏସ୍ଆଇ ସରୋଜ ସେଠୀ ନିଶାଙ୍କ ସହ ଗ୍ରୀନ୍ରୁମ୍ ଓ ଅପେରା ପଡ଼ିଆ ବାହାରେ ଫଟୋ ଉଠାଇବା ସହ ଭିଡିଓ କରିଥିଲେ। ତାହା ଶୁକ୍ରବାର ପାଟଣା ଥାନା ଅଞ୍ଚଳରେ ମୋବାଇଲରୁ ମୋବାଇଲ ଘୂରିବୁଲିଥିଲା। ପରେ ଜିଲା ଆରକ୍ଷୀ ଅଧୀକ୍ଷକ କାର୍ଯ୍ୟାନୁଷ୍ଠନ ଗ୍ରହଣକରି ଏଏସ୍ଆଇ ସେଠୀଙ୍କୁ ହେଡ୍କ୍ୱାର୍ଟର୍ସକୁ ବଦଳି କରିଥିଲେ। ଜିଲା ଆରକ୍ଷୀ ଅଧୀକ୍ଷକ ଡାଗୁଡ କହିଛନ୍ତି, ରିପୋର୍ଟ ଅନୁଯାୟୀ ତାଙ୍କ ବିରୋଧରେ ତଦନ୍ତ ଚାଲିଛି। ଏବେ ତାଙ୍କୁ ପାଟଣା ଥାନାରୁ ବଦଳି କରାଯାଇଛି। ଏଏସ୍ଆଇ ସରୋଜ କୁମାର ସେଠୀ କହିଛନ୍ତି, ଏସବୁ ଫଟୋ ବର୍ଷେ ତଳର। ସେ ଅପରେଶନ ହୋଇ ଛୁଟିରେ ଥିବା ବେଳେ ବଡ଼ବିଲ କିରିବୁର ଛକରେ ପଡ଼ିଥିବା ଅପେରା ଶୋ ବେଳେ ଫଟୋ ଉଠାଇଥିଲେ। କେହି ତାଙ୍କ ବିରୋଧରେ ଚକ୍ରାନ୍ତକରି ବଦନାମ କରିବା ଉଦ୍ଦେଶ୍ୟରେ ଇନ୍ଷ୍ଟା ଆଇଡିରୁ ଫଟୋ ନେଇ ଏଡିଟିଂକରି ଭାଇରାଲ କରିଛି।
