ବେଙ୍ଗାଲୁରୁ, ୫।୯(ଆଇଏଏନ୍ଏସ୍): ଅଲ୍-ହିନ୍ଦ୍ ମଡ୍ୟୁଲ୍ ମାମଲାର ତଦନ୍ତ କରୁଥିବା ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) ଜଣେ ଇସ୍ଲାମିକ ଷ୍ଟେଟ୍ (ଆଇଏସ୍) ଆତଙ୍କବାଦୀଙ୍କ ବିରୋଧରେ ସ୍ବତନ୍ତ୍ର କୋର୍ଟରେ ଅତିରିକ୍ତ ଚାର୍ଜଶିଟ୍ ଦାଖଲ କରିଛି। ଅଭିଯୁକ୍ତ ଶିହାବୁଦ୍ଦିନଙ୍କ ବିରୋଧରେ ଆଇପିସିର ଧାରା ୧୨୦ବି, ଅସ୍ତ୍ରଶସ୍ତ୍ର ଆଇନର ଧାରା ୨୫(୧)(ଏ) ଏବଂ ବେଆଇନ କାର୍ଯ୍ୟକାଳପ ନିରୋଧୀ ଆଇନର ଧାରା ୧୮, ୨୦, ୩୮ ଓ ୩୯ରେ ଶୁକ୍ରବାର ଅଭିଯୋଗ ଫର୍ଦ୍ଦ ଦାଖଲ ହୋଇଛି। ପୂର୍ବରୁ ବେଙ୍ଗାଲୁରୁର ଏକ ଥାନାରେ ମେହବୁବ୍ ପାଶା ଓ ଅନ୍ୟ ୧୬ ଜଣଙ୍କ ବିରୋଧରେ ମାମଲା ରୁଜୁ ହୋଇଥିଲା। ଅଭିଯୁକ୍ତ ପାଶା ହିନ୍ଦୁ ନେତାମାନଙ୍କ ହତ୍ୟାକାଣ୍ଡ ସହ ଜଡିତ ଖାଜା ମୋଇଦିନ୍ଙ୍କ ସହ ମିଶି ଆତଙ୍କବାଦୀ ସଂଗଠନ ଗଢ଼ିଥିଲେ। ସେମାନେ ଦକ୍ଷିଣ ଭାରତରୁ ମୁସଲମାନ ଯୁବକମାନଙ୍କୁ ଉକ୍ତ ସଂଗଠନରେ ନିଯୁକ୍ତ କରାଉଥିଲେ। ସେମାନେ ଆଇଏସ୍ ଆତଙ୍କବାଦୀ ସଂଗଠନର ନୀତି ଆଦର୍ଶର ପ୍ରଚାର କରୁଥିଲେ। ପୋଲିସ ଅଫିସର ଓ ହିନ୍ଦୁ ନେତାମାନଙ୍କୁ ହତ୍ୟା କରିବା ପାଇଁ ସେମାନେ ଅସ୍ତ୍ରଶସ୍ତ୍ର ଏବଂ ବିସ୍ଫୋରକ ସଂଗ୍ରହ କରୁଥିଲେ। ୨୦୨୦ ଜାନୁୟାରୀ ୨୩ରେ ଏନ୍ଆଇଏ ସାନି ମାମଲା ରୁଜୁ କରିବା ସହ ତଦନ୍ତ ଆରମ୍ଭ କରିଥିଲା। ଶିହାବୁଦ୍ଦିନ ଏକ ବଡ଼ ଷଡ଼ଯନ୍ତ୍ର ସହ ସମ୍ପୃକ୍ତ ଥିଲେ। ମୋଇଦିନଙ୍କ ନିର୍ଦ୍ଦେଶକ୍ରମେ ସେ ଅସ୍ତ୍ରଶସ୍ତ୍ର ସଂଗ୍ରହ କରି ଏହାକୁ ମୁମ୍ବାଇର କେତେଜଣ ଅଭିଯୁକ୍ତଙ୍କୁ ହସ୍ତାନ୍ତର କରୁଥିଲେ। ତାମିଲନାଡୁ ପୋଲିସ ଏସ୍ଏସ୍ଆଇ ଓ୍ବିଲସନ ହତ୍ୟାକାଣ୍ଡରେ ଉକ୍ତ ଅସ୍ତ୍ର ବ୍ୟବହୃତ ହୋଇଥିବା ତଦନ୍ତରୁ ଜଣାପଡ଼ିଥିଲା।
