ନୂଆଦିଲ୍ଲୀ,୨୫।୧୧(ପି.ଟି.): ଦେଶର ବିଭିନ୍ନ ଭାଗରେ ହିଂସାକାଣ୍ଡ ଏବଂ ସମ୍ବେଦନଶୀଳ ଅପରାଧ ଘଟାଇବା ଲାଗି ଆତଙ୍କବାଦୀ ସଂଗଠନ ଏବଂ ଅପରାଧ ସିଣ୍ଡିକେଟ୍ ସହ ଷଡ଼ଯନ୍ତ୍ର ଚଳାଇବା ମାମଲାରେ ପଞ୍ଜାବ ଜେଲ୍ରେ ଥିବା ଗ୍ୟାଙ୍ଗ୍ଷ୍ଟର ଲରେନ୍ସ ବିଷ୍ଣୋଇଙ୍କୁ ତଦନ୍ତକାରୀ ସଂସ୍ଥା (ଏନ୍ଆଇଏ) ଗୁରୁବାର ଗିରଫ କରିଛି। ଜେଲ ଭିତରେ ଥାଇ ସେ ବିଭିନ୍ନ ଅପରାଧ ଲାଗି ଷଡ଼ଯନ୍ତ୍ର କରୁଥିବା ଜଣାପଡ଼ିବା ପରେ ତାଙ୍କୁ ବଠିଣ୍ଡା ଜେଲ୍ରୁ ଗିରଫ କରାଯାଇଛି। ଉକ୍ତ ଷଡ଼ଯନ୍ତ୍ରକୁ ଏକ ସଂଗଠିତ ଆପରାଧିକ ନେଟ୍ଓ୍ବର୍କ ଦେଶ ତଥା ଦେଶ ବାହାରେ କାର୍ଯ୍ୟକାରୀ କରୁଥିଲା ବୋଲି ଏନ୍ଆଇଏ କହିଛି। ପଞ୍ଜାବ, ହରିୟାଣା, ଚଣ୍ଡିଗଡ଼, ହିମାଚଳପ୍ରଦେଶ, ରାଜସ୍ଥାନ ଏବଂ ଦିଲ୍ଲୀରେ ଗତ ୧୦ ବର୍ଷରୁ ଊର୍ଦ୍ଧ୍ୱ ସମୟ ମଧ୍ୟରେ ବିଷ୍ଣୋଇ ବହୁ ଟାର୍ଗେଟେଡ୍ ଏବଂ ସମ୍ବେଦନଶୀଳ ହତ୍ୟା ମାମଲାରେ ସମ୍ପୃକ୍ତ ବିଷ୍ଣୋଇ ମୋଷ୍ଟ ଓ୍ବାଣ୍ଟେଡ୍ ଥିଲେ। ୨୦୧୪ରେ ରାଜସ୍ଥାନ ପୋଲିସର ଏନ୍କାଉଣ୍ଟ ବେଳେ ବିଷ୍ଣୋଇଙ୍କୁ ଗିରଫ କରାଯାଇଥିଲା। ଗତବର୍ଷ ତାଙ୍କୁ ଦିଲ୍ଲୀର ତିହାର ଜେଲକୁ ସ୍ଥାନାନ୍ତର କରାଯାଇଥିଲା। ଗତ ମେ’ ୨୯ରେ ପଞ୍ଜାବୀ ଗାୟକ ସିଦ୍ଧୁ ମୂସଓ୍ବୋଲା ହତ୍ୟା ମାମଲାରେ ତାଙ୍କୁ ପଞ୍ଜାବ ଜେଲକୁ ନିଆଯାଇଥିଲା।
