କଟକ ଅଫିସ, ୮ା୪: ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ(ଏନ୍ଜିଟି)ଙ୍କ ନିର୍ଦ୍ଦେଶରେ ଗଠିତ ୫ଜଣିଆ କମିଟି ବୁଧବାର ମହାନଦୀ ଶଯ୍ୟା ସମେତ ହାଡ଼ିଆ ପଠା ପରିଦର୍ଶନ କରିଛନ୍ତି। ଏହି କମିଟି ଅପରାହ୍ନ ୩.୩୦ରେ ସ୍ଥାନୀୟ ମ୍ୟାରିଟାଇମ୍ ମ୍ୟୁଜିୟମ ସମ୍ମୁଖରେ ନିର୍ମିତ ହୋଇଥିବା ବୁରୁଜ ଉପରକୁ ଯାଇ ମହାନଦୀ ଶଯ୍ୟାର ବର୍ତ୍ତମାନର ପରିସ୍ଥିତି ଅନୁଧ୍ୟାନ କରିଥିଲେ। ବନ୍ୟା ସମୟରେ ମହାନଦୀରେ ଜଳସ୍ତର ସର୍ବାଧିକ କେତେ ଉଚ୍ଚତା ପର୍ଯ୍ୟନ୍ତ ଆସିଥିଲା ଉକ୍ତ ରିପୋର୍ଟକୁ ତର୍ଜମା କରିଥିଲେ। ପରେ କମିଟି ସ୍ଥାନୀୟ ହାଡ଼ିଆ ପଠା ଠାରେ ପହଞ୍ଚତ୍ ମହାନଦୀର ସ୍ଥିତି ଦେଖିବା ସହ ସରକାରଙ୍କ ପକ୍ଷରୁ ଚାଲିଥିବା ବରଫି ପ୍ରକଳ୍ପ ସମ୍ବନ୍ଧରେ ଏନ୍ଜିଟିରେ ଆବେଦନ କରିଥିବା ଆବେଦନକାରୀ ପ୍ରଦୀପ ପଟ୍ଟନାୟକଙ୍କ ନିକଟରୁ ବୁଝିଥିଲେ।
ସୂଚନାଯୋଗ୍ୟ, ମହାନଦୀରୁ ଆଇଓସିଏଲ୍ ଜଳ ନେବା ପ୍ରସଙ୍ଗରେ ହାଇକୋର୍ଟରେ ଏକ ମାମଲା ଦାୟର ହୋଇଥିଲା। ଉଚ୍ଚ ଅଦାଲତ ଉକ୍ତ ମାମଲାର ଶୁଣାଣି କରି କଟକ ସହରର ଉନ୍ନତି ନିମନ୍ତେ ଆଇଓସିଏଲ୍କୁ ୨୯୮କୋଟି ଟଙ୍କା ପ୍ରଦାନ କରିବାକୁ କହିଥିଲେ। ଏପରି କି ଉକ୍ତ ଅର୍ଥରାଶିକୁ ସହରବାସୀଙ୍କ ପାନୀୟ ଜଳ ସମସ୍ୟା ଦୂର ସହ ବିଭିନ୍ନ ମୌଳିକ ସମସ୍ୟାର ସମାଧାନ ନିମନ୍ତେ ବ୍ୟବହାର କରିବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିଲେ। ଏଥିସହ ଆଇଓସିଏଲର ମହାନଦୀ ଖନନ ଦ୍ୱାରା ଯେଉଁ ବାଲି ଓ ମାଟି ବାହାରିବ ତାକୁ ବନ୍ଧର ସୁଦୃଢ଼ୀକରଣ କରିବା ସହ ସହରର ନିମ୍ନ ଅଞ୍ଚଳଗୁଡ଼ିକୁ ପୋତି ସମତଳ କରିବାରେ ବ୍ୟବହାର କରିବାକୁ ସ୍ପଷ୍ଟ ନିର୍ଦ୍ଦେଶ ଦେଇଥିଲେ। ତେବେ ରାଜ୍ୟ ସରକାର ହାଇକୋର୍ଟଙ୍କ ଉକ୍ତ ନିର୍ଦ୍ଦେଶକୁ ପାଳନ କରୁ ନ ଥିବା ଦର୍ଶାଇ ଏନ୍ଜିଟିରେ ୨୦୨୦ରେ ଆଇନଜୀବୀ ପ୍ରଦୀପ ପଟ୍ଟନାୟକ ଏକ ଆବେଦନ କରିଥିଲେ। ମହାନଦୀରୁ ଉଠିଥିବା ବାଲିକୁ ଅନ୍ୟତ୍ର ନ ନିଆଯାଇ ସେହି ହାଡ଼ିଆ ପଠାରେ ପକାଯାଇ ପୋତାଯାଇଛି। ଏପରି କି ସରକାର ମହାନଦୀର କିସମ ପରିବର୍ତ୍ତନ କରି ଏହାକୁ ପତିତ କିସମରେ ପରିଣତ କରିଛନ୍ତି। ରାଜ୍ୟ ସରକାର ବିଭିନ୍ନ ନିୟମ ଉଲ୍ଲଂଘନ କରିଥିବା ଆବେଦନକାରୀ ଦର୍ଶାଇଥିଲେ। ଏନ୍ଜିଟି ପକ୍ଷରୁ ଉକ୍ତ ଆବେଦନର ଶୁଣାଣି କରାଯାଇ ମହାନଦୀର ପ୍ରକୃତ ଅବସ୍ଥା ଜାଣିବା ପାଇଁ ସେଣ୍ଟ୍ରାଲ ୱାଟର କମିଶନ(ସିଡବ୍ଲ୍ୟୁସି), ସେଣ୍ଟ୍ରାଲ ପଲ୍ୟୁଶନ କଣ୍ଟ୍ରୋଲ ବୋର୍ଡ(ସିପିସିବି), ଷ୍ଟେଟ୍ ପଲ୍ୟୁଶନ କଣ୍ଟ୍ରୋଲ ବୋର୍ଡ(ଏସ୍ପିସିବି), ମିନିଷ୍ଟ୍ରି ଅଫ୍ ଫରେଷ୍ଟର ପ୍ରତିନିଧିଙ୍କ ସମେତ ଆଇଆଇଟି ରୁର୍କିର ଜଣେ ପ୍ରଫେସରଙ୍କୁ ନେଇ ଏକ ୫ଜଣିଆ କମିଟି ଗଠନ କରାଯାଇଥିଲା। ବୁଧବାର ଉକ୍ତ କମିଟି ଘଟଣାସ୍ଥଳ ପରିଦର୍ଶନ କରିଥିଲେ।
