ଗାଜିଆବାଦ, ୪।୭- ଉତ୍ତର ପ୍ରଦେଶ ଗାଜିଆବାଦସ୍ଥିତ ଆରକେ ପୁରମ ଅଞ୍ଚଳରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ବିବାହର ୪ ଦିନ ମଧ୍ୟରେ ସନ୍ଦିଗ୍ଧ ଅବସ୍ଥାରେ ନବଦମ୍ପତିଙ୍କ ଶବ ଉଦ୍ଧାର କରାଯାଇଛି। ଗୋବିନ୍ଦପୁରରେ କୋଚିଂ ସେଣ୍ଟର ଖୋଲି ଶିକ୍ଷକତା କରୁଥିବା ବିଶାଳ ଓ ଏକ ପ୍ରତିଷ୍ଠିତ କମ୍ପାନୀରେ ଉଚ୍ଚପଦସ୍ଥ ଅଧିକାରୀ ଥିବା ନିଶାଙ୍କ ମଧ୍ୟରେ ଗତ ଜୁନ ୨୯ରେ ବିବାହ ଅନୁଷ୍ଠିତ ହୋଇଥିଲା। ଉଭୟ ଭିନ୍ନ ଜାତିର ହୋଇଥିଲେ ମଧ୍ୟ ପରିବାରଙ୍କ ସହମତିରେ ବିବାହ କରିଥିଲେ। ବିବାହର ଦୁଇ ତିନିଦିନ ପର୍ଯ୍ୟନ୍ତ ବିଶାଳଙ୍କ ଘରେ ଉତ୍ସବର ମାହୋଲ ଲାଗି ରହିଥିଲା। ତେବେ ଜୁଲାଇ ୨ ସକାଳେ ବିଶାଳ କୋଚିଂ ସେଣ୍ଟରକୁ ଯାଇଥିଲେ ମଧ୍ୟ ବିଳମ୍ବିତ ରାତି ପର୍ଯ୍ୟନ୍ତ ଆଉ ଘରକୁ ଫେରି ନ ଥିଲେ। ଏହାପରଦିନ ତାଙ୍କ ମୃତଦେହ ସ୍ଥାନୀୟ ରେଳ ଲାଇନ କଡ଼ରୁ ମିଳିଥିଲା। ଏହାପରେ ବିଶାଳଙ୍କ ଅନ୍ତିମ ସଂସ୍କାର ଶେଷହେବା ପରେ ନିଶାଙ୍କ ପରିବାର ତାଙ୍କୁ ଘରକୁ ନେଇଆସିଥିଲେ। କିନ୍ତୁ ଶନିବାର ସକାଳେ ପଙ୍ଖାରେ ଝୁଲୁଥିବା ଅବସ୍ଥାରେ ନିଶାଙ୍କ ଶବ ଘରୁ ମିଳିଥିଲା। କିନ୍ତୁ ୪ ଦିନ ମଧ୍ୟରେ କାହିଁକି ନବ ଦମ୍ପତି ଆତ୍ମହତ୍ୟା କରିବାକୁ ନିଷ୍ପତ୍ତି ନେଲେ ତାହା ଏବେ ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଉଭୟ ପରିବାର ଲୋକଙ୍କୁ ପୃଥକ ପୃଥକ ଜେରା ସରିଯାଇଥିଲେ ମଧ୍ୟ ସ୍ଥାନୀୟ ପୋଲିସ ସ୍ବାମୀ-ସ୍ତ୍ରୀଙ୍କ ଆତ୍ମହତ୍ୟାର କିଛି ଠୋସ୍ କାରଣ ଖୋଜିପାରିନାହିଁ। ତେବେ ଉଭୟଙ୍କ ଫୋନକୁ ଜବତ କରି ପୋଲିସ ବର୍ତ୍ତମାନ କଲ୍ ରେକଡର୍ସ, ମେସେଜ ଇତ୍ୟାଦି ଯାଞ୍ଚ କରୁଥିବା ଜଣାପଡ଼ିଛି।
