ରାଜକନିକା,୨୬ା୪(ସଞ୍ଜୟ କୁମାର ଦାଶ): କେନ୍ଦ୍ରାପଡ଼ା ଜିଲାର ଶେଷ ସୀମା ହେଉଛି ଆଳି ନିର୍ବାଚନମଣ୍ଡଳୀ। ରାଜକନିକାର ୨୯ଟି ପଞ୍ଚାୟତ ଓ ଆଳିର ୩୪ଟି ପଞ୍ଚାୟତକୁ ମିଶାଇ ଆଳି ନିର୍ବାଚନମଣ୍ଡଳୀ ଗଠିତ। ଏହି ନିର୍ବାଚନମଣ୍ଡଳୀରେ ସବୁବେଳେ ରୋଚକ ପ୍ରତିଦ୍ୱନ୍ଦ୍ୱିତା ଦେଖିବାକୁ ମିଳେ। ତେବେ ଏଠାରେ ମହିଳା ପ୍ରାର୍ଥୀଙ୍କ ଅପେକ୍ଷା ପୁରୁଷ ପ୍ରାର୍ଥୀ ଅଧିକ ଥର ବିଧାୟକ ହୋଇଛନ୍ତି। ୧୯୫୭ରେ ଆଳି ରାଜ ପରିବାରରୁ ମାତା ରାମରାଜ କୁମାରୀ ପ୍ରଥମଥର ପାଇଁ ବିଧାୟିକା ପ୍ରାର୍ଥୀ ହୋଇଥିଲେ। ୧୯୯୦ ଓ ୧୯୯୫ ମସିହାରେ ରାଜମାତା ସୁଶ୍ରୀ ଦେବୀ, ୨୦୦୯ରେ ପ୍ରଭାତି ସାହୁ, ୨୦୧୪ରେ ପ୍ରମିଳା ସାମଲ, ୨୦୧୯ରେ ସୁଜାତା ବାରିକ୍ ପ୍ରମୁଖ ବିଧାନସଭା ନିର୍ବାଚନ ରଣାଙ୍ଗନରେ ବିଧାୟିକା ପ୍ରାର୍ଥୀ ଭାବେ ଅବତ୍ତୀର୍ଣ୍ଣ ହୋଇଥିଲେ। ହେଲେ ସେ ସମୟରେ ରାଜମାତା ସୁଶ୍ରୀ ଦେବୀଙ୍କର ଦବଦବା ଥିଲା। ୨୦୨୪ରେ ବାପାଙ୍କ ସ୍ଥାନରେ ନବାଗତ ପ୍ରତିଭା ଡା. ଦେବସ୍ମିତା ଶର୍ମାଙ୍କୁ କଂଗ୍ରେସ ପ୍ରାର୍ଥୀ କରି ମହିଳା କାର୍ଡ ଖେଳିବାକୁ ଆଶା ରଖିଛି। ତେବେ ଏହି ନିର୍ବାଚନମଣ୍ଡଳୀରେ ସାଧାରଣତଃ କଂଗ୍ରେସ ଓ ବିଜେଡି ମଧ୍ୟରେ ଦ୍ୱିମୁଖୀ ଲଢ଼େଇ ହେଉଥିଲା। ୨୦୧୯ରୁ ତ୍ରିମୁଖୀ ଲଢ଼େଇ ଦେଖିବାକୁ ମିଳିଥିଲା। ସେଥିମଧ୍ୟରୁ ବିଜେଡିର ମନ୍ତ୍ରୀ ପ୍ରତାପ କେଶରୀ ଦେବ ୯୯,୮୩୭ ଖଣ୍ଡ ଭୋଟ ହାତେଇ ଜିତିଥିବା ବେଳେ, କଂଗ୍ରେସର ଦେବେନ୍ଦ୍ର ଶର୍ମା ୪୩,୯୮୬ ଖଣ୍ଡ ଭୋଟ ପାଇ ଦ୍ୱିତୀୟ ସ୍ଥାନ ଏବଂ ପୁରୁଖା ନେତା ତଥା ଭାଜପାର ଦୋଳଗୋବିନ୍ଦ ନାୟକ ୨୬,୪୮୭ ଖଣ୍ଡ ଭୋଟ ପାଇଥିଲେ। ପ୍ରତାପ କେଶରୀ ଦେବ ଅଧିକ ୫୫,୮୫୧ ଖଣ୍ଡ ଭୋଟ ପାଇ ବିଜୟୀ ହୋଇଥିଲେ। ତେବେ ଚଳିତଥର ନୂଆ ବନାମ ଅଭିଜ୍ଞତାର ଲଢ଼େଇ ବଡ଼ ରୋଚକ ପରିସ୍ଥିତିରେ ହେବ। ବିଜେଡିର ୧୯ ବର୍ଷର ବିଧାୟକ ଅଭିଜ୍ଞତାସମ୍ପନ୍ନ ମନ୍ତ୍ରୀ ଦେବ ବିଭିନ୍ନ ଲୋକାଭିମୁଖୀ ଯୋଜନା ସହ ନବୀନଙ୍କ ସ୍ବଚ୍ଛ ଶାସନର ବିଗତ ୫ ପାଳିର ସଫଳତାର ପୂର୍ତ୍ତିକୁ ନେଇ ଲୋକଙ୍କ ପାଖରେ ପହଞ୍ଚୁଛନ୍ତି। କଂଗ୍ରେସ ନୂଆମୁହଁ ଭାବେ ମହିଳା ପ୍ରାର୍ଥୀ ଡା. ଦେବସ୍ମିତାଙ୍କୁ ପ୍ରାର୍ଥୀ କରି ମହିଳା କାର୍ଡ ଖେଳିଛି। ବିଗତ ବର୍ଷରେ ବିଜେଡିର ବିଫଳତା ସହ କଂଗ୍ରେସର ଗ୍ୟାରେଣ୍ଟି କାର୍ଡକୁ ନେଇ ଲୋକଙ୍କ ନିକଟତର ହେବାକୁ ଚେଷ୍ଟା କରୁଛନ୍ତି ଡା. ଦେବସ୍ମିତା ଶର୍ମା। ସେହିପରି ଭାଜପାରୁ ନବାଗତ କୃଷ୍ଣଚନ୍ଦ୍ର ପଣ୍ଡା ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଥିବା ବେଳେ, ମୋଦି ଗ୍ୟାରେଣ୍ଟି ସହ କେନ୍ଦ୍ର ସରକାରଙ୍କ ଜନହିତକର ଯୋଜନାଗୁଡ଼ିକୁ ରାଜ୍ୟ ସରକାର ହାଇଜାକ୍ କରି ନିଜ ନଁାରେ କରି ବାହା ବା ନେଉଛନ୍ତି। ରାଜ୍ୟ ସରକାରଙ୍କୁ ଉଚିତ ଜବାବ ଦେବାକୁ ଜନସାଧାରଣଙ୍କୁ ବୁଝେଇବାକୁ ପ୍ରୟାସ କରୁଛନ୍ତି। ତେବେ ଚତୁର୍ଥ ପ୍ରାର୍ଥୀ ପର୍ଶୁରାମ ଦାସ ସ୍ବାଧୀନ ପ୍ରାର୍ଥୀ ଭାବେ ଉଭା ହେବାର ସମ୍ଭାବନା ଥିବାବେଳେ, ସେ ପରିବର୍ତ୍ତନ ଆହ୍ବାନ ସହ କନିକା ପୁଅ ଓ ନିଃସ୍ବାର୍ଥପର ସେବାର କଥାକୁ ନେଇ ଭୋଟରଙ୍କ ନିକଟତର ହେଉଥିବା ଜଣାପଡିଛି। ୨୦୨୪ ନିର୍ବାଚନରେ ଜନମତ କାହା ସପକ୍ଷରେ ଯାଉଛି ଏବଂ ବିଧାୟକ ଶିରିପା କିଏ ପିନ୍ଧୁଛି, ତାହା ସମୟ ହିଁ କହିବ।
