ବରଗଡ଼,୧୨।୨(ପ୍ରେମାନନ୍ଦ ଖମାରୀ)- ନୂଆ ସରକାର ଆସିବା ପରେ ବରଗଡ଼ ସହରର ନବକଳେବର ହେଉଛି। ଧନୁଯାତ୍ରା ମହୋତ୍ସବରେ ନୂତନତ୍ତ୍ୱ ଆସିଥିବାବେଳେ ସହରର ପ୍ରମୁଖ ସମସ୍ୟା ଯାତାୟାତ, ନର୍ଦ୍ଦମା ଜଳ ନିଷ୍କାସନ(ଡ୍ରେନେଜ୍) ଏବଂ ଅନ୍ୟ ସମସ୍ୟାକୁ ଏଡ଼ାଇବା ପାଇଁ ଅଧିକ ଗୁରୁତ୍ୱ ଦିଆଯାଉଛି। ଏହି କ୍ରମରେ ଧନୁଯାତ୍ରା ମଞ୍ଚ, ତୋରଣଠାରୁ ଆରମ୍ଭକରି ସହରରେ ରାସ୍ତା ପ୍ରଶସ୍ତୀକରଣ ଚାଲିଛି। ସହର ମଧ୍ୟରେ ରହିଥିବା ଅନେକ ରାସ୍ତା ପ୍ରଶସ୍ତ ହୋଇଛି। ରାସ୍ତାପାର୍ଶ୍ୱରେ ଡ୍ରେନ କାର୍ଯ୍ୟ ନିର୍ମାଣାଧୀନ ରହିଛି। ଅନ୍ୟପଟେ ରାସ୍ତା ପ୍ରଶସ୍ତୀକରଣ ଏବଂ ଡ୍ରେନ୍ ନିର୍ମାଣ ଯୋଗୁ ସହର ରାସ୍ତାପାର୍ଶ୍ୱରେ ରହିଥିବା ଅନେକ ଦୋକାନୀ, ଉଠା ଦୋକାନୀ ସେମାନଙ୍କ ଦୋକାନ ଏବଂ ଜୀବିକା ହରାଇଛନ୍ତି। ତେବେ ବିସ୍ଥାପିତ ହୋଇଥିବା କେହି ବି ଜଣେ ଦୋକାନୀ କିମ୍ବା ଉଠାଦୋକାନୀ ଜୀବିକା ନ ହରାଇବେ, ତାକୁ ଅଧିକ ଗୁରୁତ୍ୱ ଦିଆଯାଇଛି। ସେମାନଙ୍କୁ ଥଇଥାନ କରିବା ପାଇଁ ଯୋଜନା ପ୍ରସ୍ତୁତ ହୋଇସାରିଛି।
ଏହି ପରିପ୍ରେକ୍ଷୀରେ ସହର ମଧ୍ୟରେ ନୂତନ ସୁପର ମାର୍କେଟ୍ କମ୍ପ୍ଲେକ୍ସ ପ୍ରକ୍ରିୟା ଆରମ୍ଭ ହୋଇଛି। ବୁଧବାର ବରଗଡ଼ ବିଧାୟକ ଅଶ୍ୱିନୀ କୁମାର ଷଡ଼ଙ୍ଗୀ ନିୟନ୍ତ୍ରିତ ବଜାର କମିଟି(ଆର୍ଏମ୍ସି) ଅଧୀନରେ ୩ କୋଟି ୮୪ ଲକ୍ଷ ଟଙ୍କା ବ୍ୟୟ ଅଟକଳରେ ନିର୍ମାଣ ହେବାକୁଥିବା ସୁପର ମାର୍କେଟ୍ କମ୍ପ୍ଲେକ୍ସର ଭିତ୍ତିପ୍ରସ୍ତର ସ୍ଥାପନ କରିଛନ୍ତି। ଏହି ମାର୍କେଟ୍ କମ୍ପ୍ଲେକ୍ସର ତଳ ମହଲାର ଉଭୟ ପାର୍ଶ୍ୱରେ ୨୨ କୋଠାଘର ହେବା ସହିତ ଉପର ମହଲାରେ ଏକ ହଲ୍ ହେବ ଏବଂ ସେହି ହଲ୍ ସାଧାରଣ ଜନତା ତଥା ବ୍ୟାଙ୍କ ସୁବିଧା ପାଇଁ ଉପଲବ୍ଧ ହେବ। ବିସ୍ଥାପିତଙ୍କୁ ଥଇଥାନ ପାଇଁ ଏହା ଏକ ସୁଯୋଗ ସୃଷ୍ଟି କରାଯାଇଛି। ତେବେ ଯେଉଁମାନଙ୍କ ତ୍ୟାଗ ପାଇଁ ଆଜି ରାସ୍ତା ପ୍ରଶସ୍ତୀକରଣ ହେବା ସହିତ ବରଗଡ଼ ସହର ନୂଆଁରୂପ ନେଇଛି, ସେମାନଙ୍କୁ ଥଇଥାନ ପାଇଁ ଏଠାରେ ପ୍ରାଥମିକତା ଦିଆଯିବ ବୋଲି ବିଧାୟକ ଷଡ଼ଙ୍ଗୀ କହିଛନ୍ତି। ଏଭଳି ଥଇଥାନ ବ୍ୟବସ୍ଥାକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।
ତେବେ ଏହି ନୂତନ ମାର୍କେଟ୍ କମ୍ପ୍ଲେକ୍ସର ଭିତ୍ତିପ୍ରସ୍ତର ସ୍ଥାପନ ଅବସରରେ ବୁଧବାର ସନ୍ଧ୍ୟାରେ ଏକ ସମାରୋହ ହୋଇଥିଲା। ଏହି ଅବସରରେ ସ୍ଥାନୀୟ ଗାନ୍ଧୀଛକ ନିକଟ କଲ୍ୟାଣ ମଣ୍ଡପରୁ ପ୍ରସ୍ତାବିତ ନୂତନ ମାର୍କେଟ୍ କମ୍ପ୍ଲେକ୍ସକୁ ଏକ ବିଶାଳ ଶୋଭାଯାତ୍ରା ହୋଇଥିଲା। ଶୋଭାଯାତ୍ରାରେ ସ୍ଥାନୀୟ ଲୋକେ ବରଗଡ଼ ବିଧାୟକ ଷଡ଼ଙ୍ଗୀଙ୍କୁ ସେଠାକୁ ପାଛୋଟି ନେଇଥିଲେ। ବିଧାୟକ ଷଡ଼ଙ୍ଗୀ ସେଠାରେ ପହଞ୍ଚିବା ପରେ ଭିତ୍ତିପ୍ରସ୍ତର ସ୍ଥାପନ କରିଥିଲେ। ଭିତ୍ତିପ୍ରସ୍ତର ସ୍ଥାପନ ସମୟରେ ଅତିରିକ୍ତ ଜିଲାପାଳ ତଥା ନିୟନ୍ତ୍ରିତ ବଜାର କମିଟି ଅଧ୍ୟକ୍ଷା ମଧୁଛନ୍ଦା ସାହୁ, ସମ୍ପାଦକ ଗୋବିନ୍ଦ ନାଗ, ସଭ୍ୟ ସୁକାନ୍ତ ମିଶ୍ର ପ୍ରମୁଖ ଉପସ୍ଥିତ ଥିଲେ। ରାସ୍ତା ପ୍ରଶସ୍ତୀକରଣ ଏବଂ ଡ୍ରେନ୍ ନିର୍ମାଣରେ ଯେଉଁମାନେ ବିସ୍ଥାପିତ ହେଉଛନ୍ତି, ସେମାନଙ୍କୁ ନିଶ୍ଚିତଭାବେ ଥଇଥାନ କରାଯିବ ଏବଂ ବରଗଡ଼ ସହରର ବିକାଶରେ ସମସ୍ତେ ସହଯୋଗ କରିବା ପାଇଁ ବିଧାୟକ ଷଡ଼ଙ୍ଗୀ ସମସ୍ତଙ୍କୁ ନିବେଦନ କରିଛନ୍ତି।
