ଯାଜପୁର ଅଫିସ,୨୧ା୯:ଯାଜପୁର ଜିଲାରେ ଓଡ଼ିଶା ମିନେରାଲ ବିୟରିଂ ଏରିଆ ଡେଭଲପମେଣ୍ଟ କର୍ପୋରେଶନ (ଓଏମ୍ବିଏଡିସି) ପାଣ୍ଠିରେ ଖର୍ଚ୍ଚ ହେଉଥିବା ମୋ ସ୍କୁଲ ଅଭିଯାନରେ ବ୍ୟାପକ ଅନିୟମିତତା ହେଉଥିବା ଅଭିଯୋଗ ହୋଇଛି। ଏହି ଯୋଜନାରେ ଜିଲାର ବ୍ୟାସନଗର ପୌର ପରିଷଦର ଶଶିଭୂଷଣ ବାଳିକା ବିଦ୍ୟାଳୟରେ ୬ଟି ଗାତ ଖୋଳି ସାରିବା ପରେ ଠିକାଦାର ନିର୍ମାଣ ସାମଗ୍ରୀ ଧରି ଫେରାର ହୋଇଯାଇଥିବା ସ୍କୁଲ କର୍ତ୍ତୃପକ୍ଷଙ୍କଠାରୁ ସୂଚନା ମିଳିଛି। ଯାଜପୁର ଓଏମ୍ବିଏଡିସି ସେଲ୍ରୁ ମିଳିଥିବା ସୂଚନା ଅନୁଯାୟୀ ମୋ ସ୍କୁଲ ଅଭିଯାନରେ ଜିଲାର ୬୫ଟି ସ୍ମାର୍ଟ ସ୍କୁଲ ନିର୍ମାଣ ପାଇଁ ୬୦ ଲକ୍ଷ ଟଙ୍କା ଲେଖାଏ ଅନୁଦାନ ମଞ୍ଜୁର ହୋଇଛି। ତେବେ କୌଣସି ଟେଣ୍ଡର ନ କରି ବିଡିଓଙ୍କ ଜରିଆରେ ବ୍ୟୟ ଅଟକଳ ବାହାରେ ଯେନତେନ ପ୍ରକାରେ ପୁରୁଣା କାନ୍ଥରେ ନୂଆ ନିର୍ମାଣ କରି ସିଂହଭାଗ ଅର୍ଥ ଚଳୁ କରିବାକୁ ଉଦ୍ୟମ ହେଉଥିବା ଚର୍ଚ୍ଚା ହେଉଛି।
ମିଳିଥିବା ସୂଚନାନୁଯାୟୀ, ଯାଜପୁର ଓଏମ୍ବିଏଡିସି ସେଲ୍ ପକ୍ଷରୁ ବଡ଼ଚଣା ବ୍ଲକରେ ୭, ବରୀରେ ୫, ବିଞ୍ଝାରପୁରରେ ୬, ଦାନଗଦିରେ ୪, ଦଶରଥପୁରରେ ୫, ଧର୍ମଶାଳାରେ ୬, ଯାଜପୁରରେ ୬, କୋରେଇରେ ୮, ରସୁଲପୁରରେ ୮ ଓ ସୁକିନ୍ଦା ବ୍ଲକରେ ୫ ଏବଂ ଯାଜପୁର ମ୍ୟୁନିସିପାଲିଟିରେ ୩ ଏବଂ ବ୍ୟାସନଗର ମ୍ୟୁନିସିପାଲିଟିରେ ୨ଟି ସ୍ମାର୍ଟ ସ୍କୁଲ ମୋ ସ୍କୁଲ ଅଭିଯାନରେ ନିର୍ମାଣ ହେଉଛି। ଆସନ୍ତା ଅକ୍ଟୋବର ୨ ସୁଦ୍ଧା ଏହିସବୁ ପ୍ରକଳ୍ପ ସମ୍ପୂର୍ଣ୍ଣ କରିବାକୁ ନିର୍ଦ୍ଦେଶ ହୋଇଛି। ବ୍ୟୟ ଅଟକଳ ଅନୁଯାୟୀ ୫ ଲକ୍ଷ ଟଙ୍କା ଲେଖାଏଁ ୨ଟି ସ୍ମାର୍ଟ କ୍ଲାସ୍ରୁମ୍, ୧୦ ଲକ୍ଷ ଟଙ୍କାର ଫର୍ନିଚର, ୫ ଲକ୍ଷ ଟଙ୍କାରେ ଇ-ଲାଇବ୍ରେରି, ୪ ଲକ୍ଷ ଟଙ୍କାରେ ସାଇନ୍ସ ଲାବରେଟୋରି, ୩ ଲକ୍ଷ ଟଙ୍କାରେ ପାନୀୟ ଜଳ ସୁବିଧା, ଖେଳ ସାମଗ୍ରୀ ଓ ଇନ୍ଡୋର ଗେମ୍ ପାଇଁ ୨ ଲକ୍ଷ ଟଙ୍କା, ପରିସ୍ରାଗାର, ଖେଳପଡିଆର ଉନ୍ନତୀକରଣ, ବଗିଚା, କିଚେନ ଗାର୍ଡେନ, ପାଥୱେ ଇତ୍ୟାଦି ବାବଦକୁ ଖର୍ଚ୍ଚ ହେବ ବୋଲି ଦର୍ଶାଯାଇଛି। ତେବେ କ୍ଷେତ୍ରପାଳ ହାଇସ୍କୁଲ, ଖଣ୍ଡିତର, ମଧୁପୁର, ଆଦମପୁର ଆଦି ହାଇସ୍କୁଲରେ ପୁରୁଣା କାନ୍ଥରେ ସ୍ମାର୍ଟ କ୍ଲାସରୁମ୍ ନିର୍ମାଣ ହେଉଥିବା ଅଞ୍ଚଳବାସୀଙ୍କଠାରୁ ସୂଚନା ମିଳିଛି। ବ୍ୟାସନଗର ମ୍ୟୁନିସିପାଲିଟିର ଶଶିଭୂଷଣ ବାଳିକା ବିଦ୍ୟାଳୟରେ ଗତ ୫ ତାରିଖରେ ଯାଜପୁର ଜିଲାପାଳ ଚକ୍ରବର୍ତ୍ତୀ ସିଂ ରାଠୋର ପରିଦର୍ଶନ କରି ସ୍ମାର୍ଟ ସ୍କୁଲ ନିର୍ମାଣ କରିବାକୁ ନିର୍ଦ୍ଦେଶ ଦେଇଥିଲେ। ଏହିକ୍ରମରେ ନଡିଆ ଗଛ କାଟି ପିଲର ପାଇଁ ଗାତ ଖୋଲା ହୋଇଥିଲା। ବାଲି, ଗେଟି, ମେଟାଲ ଆଦି ନିର୍ମାଣ ସାମଗ୍ରୀ ମଧ୍ୟ ସ୍କୁଲ ପରିସରରେ ସାଇତି ରଖାଯାଇଥିଲା। ହଠାତ୍ କୌଣସି ସୂଚନା ନ ଦେଇ ସୋମବାର ସମ୍ପୃକ୍ତ ଠିକାଦାର ଜଣକ ନିର୍ମାଣ ସାମଗ୍ରୀଗୁଡିକୁ ଟ୍ରାକ୍ଟର ଯୋଗେ ଅନ୍ୟତ୍ର ସ୍ଥାନାନ୍ତର କରି ନେଇଥିବା ସ୍କୁଲ କର୍ତ୍ତୃପକ୍ଷଙ୍କ ଠାରୁ ସୂଚନା ମିଳିଛି। ଏ ସଂକ୍ରାନ୍ତରେ ଯାଜପୁର ଜିଲାପାଳ ରାଠୋରଙ୍କୁ ପଚାରିବାରେ ସେ କହିଛନ୍ତି, କେଉଁ କାରଣରୁ ସେଠାରୁ ନିର୍ମାଣ ସାମଗ୍ରୀ ଉଠାଇ ନିଆଯାଇଛି ତାହା ସେ ଜାଣି ନାହାନ୍ତି। କିନ୍ତୁ ଯେଉଁଠାରେ ସ୍ମାର୍ଟ ସ୍କୁଲ ନିର୍ମାଣ ହେବାକୁ ନିଷ୍ପତ୍ତି ହୋଇଛି ସେଠାରେ ନିଶ୍ଚିତ ଭାବେ ନିର୍ମାଣ କରାଯିବ। ସୂଚନାଯୋଗ୍ୟ, ଓଏମ୍ବିଏଡିସି ଅର୍ଥକୁ ପାନୀୟ ଜଳ ଯୋଗାଣ, ଶିକ୍ଷା(ପ୍ରଶିକ୍ଷଣ ଏବଂ କୌଶଳ ବିକାଶ), ସ୍ବାସ୍ଥ୍ୟ(ଅଙ୍ଗନଓ୍ବାଡି କେନ୍ଦ୍ର ସମେତ), ଜୀବନ ଜୀବିକା, ଗ୍ରାମ୍ୟ ସଂଯୋଗୀକରଣ, ପରିବେଶ ସୁରକ୍ଷା ଓ ପ୍ରଦୂଷଣ ନିୟନ୍ତ୍ରଣ, ଜଳ ସଂରକ୍ଷଣ ଓ ଭୂତଳ ଜଳ ରିଚାର୍ଜ କ୍ଷେତ୍ରରେ ଖର୍ଚ୍ଚ କରାଯାଉଛି।
