ଓଡ଼ିଶାର ନୂତନ ସରକାର ଚାଷୀଙ୍କ ମୁହଁରେ ଆନନ୍ଦର ଝଲକ ସୃଷ୍ଟି କରିଛନ୍ତି। ଓଡ଼ିଶାର ପ୍ରଧାନ କୃଷି ଧାନଚାଷ। ଧାନ କୁଇଣ୍ଟାଲ ୩୧୦୦ ଟଙ୍କା ଦରରେ ସରକାର ଧାନ କିଣିବାକୁ ଘୋଷଣା କରି ଚାଷୀଙ୍କ ମୁହଁରେ ଆଶାତୀତ ଭରସା ଭରି ଦେଇଛନ୍ତି। କାରଣ ପୂର୍ବ ସରକାର ବର୍ଷ ବର୍ଷ ଧରି ଘୋଷିତ ଦରରେ ଧାନ କିଣିବାକୁ ପ୍ରତିଶ୍ରୁତି ଦେଇ ମଧ୍ୟ ବହୁ ବାଧାବନ୍ଧନ ସୃଷ୍ଟି କରି ଯଥାସମୟରେ ମିଲରଙ୍କ ଦ୍ୱାରା ଧାନ କିଣି ନେଉଥିଲେ। ଫଳରେ ଚାଷୀମାନେ ଅଦର ଦରରେ ଅସାଧୁ ବ୍ୟବସାୟୀଙ୍କୁ ଧାନ ବିକ୍ରି କରିବାକୁ ବାଧ୍ୟ ହୋଇ ସର୍ବସ୍ବାନ୍ତ ହେଉଥିଲେ।
ସରକାରୀ ନିୟମ ଚାଲୁ ରହିଆସିଛି। ଧାନ ଅମଳ ହେବା ସଙ୍ଗେ ସଙ୍ଗେ ଚାଷୀମାନେ ଅମଳ କରି ବର୍ଷା, କାକର, ମୂଷାଦାଉରୁ ରକ୍ଷା ପାଇବା ପାଇଁ ବିଲରେ, ରାସ୍ତାକଡ଼ରେ ବସ୍ତା କରି ପକାଇ ନ ରଖି ଧାନମଣ୍ଡିରେ ପଇଠ କରିବେ। ମିଲର ଯଥାଶୀଘ୍ର ଧାନ ଉଠାଇନେବେ। ସେବା ସମବାୟ ସମିତିରେ ନିଜସ୍ବ ଗୋଦାମ ଘର ନ ଥିବାରୁ ସମିତି କର୍ମଚାରୀମାନେ ମିଲର ନ ଆସିବା ପର୍ଯ୍ୟନ୍ତ ଧାନ ପଇଠ ନିଅନ୍ତି ନାହିଁ। ଚାଷୀମାନେ ଅଭାବୀ ବିକ୍ରିରେ ହତାଶ ହୁଅନ୍ତି।
ଏଫ୍ଏକ୍ୟୁ ଧାନରେ ଆର୍ଦ୍ରତା ୧୭% ସହ ଜୈବିକ, ଅଜୈବିକ ପଦାର୍ଥ ୧୬% ପ୍ରଭୃତି ମୋଟ ୩୩% ମିଶିବା ଅନିବାର୍ଯ୍ୟ ହୋଇ ପଡ଼ିଥାଏ। ଏପରିକି ମିଲର ଯଥା ସମୟରେ ନ ଆସିଲେ ଧାନ ଖରାଖାଇ ହରିକାଠ ପାଲଟିଯାଏ ଏବଂ ଆର୍ଦ୍ରତା ୧୭%ରୁ ୫/୬%କୁ ଖସିଆସେ। ୩୩% ସରକାରୀ ରିହାତି ଥିଲେ ମଧ୍ୟ ପୂର୍ବରୁ ମିଲରମାନେ ୯/୧୦ କିଲୋ କଟ୍ନିଛଟ୍ନି କରିବା, ଅଖାମୂଲ୍ୟ ନ ଦେବା, ଟୋକନରେ ଧାର୍ଯ୍ୟ ତାରିଖରେ ନ କିଣିବାର ଦୌରାମତ୍ୟ ବର୍ଷ ବର୍ଷ ଧରି ଚାଷୀକୁଳ ସହି ଆସିଛନ୍ତି। ଚଳିତ ସରକାର ସେହି ଦୌରାମତ୍ୟରୁ ରକ୍ଷା କରିବାର ପ୍ରତିଶ୍ରୁତି ଦେଇ ଚାଷୀକୁଳକୁ ଆଶ୍ୱାସନା ଦେଇଛନ୍ତି।
ବହୁ ଆନନ୍ଦର କଥା, ନୂଆ ସରକାର ପଡ଼ୋଶୀ ରାଜ୍ୟର ସୀମାକୁ ସିଲ୍ କରି ବାହାର ଧାନକୁ ପ୍ରବେଶ କରିବାକୁ ବିରୋଧ କରିଛନ୍ତି। କେବଳ ଓଡ଼ିଶା ଚାଷୀଙ୍କ ଧାନକୁ କିଣେଇ ନେବାର ନିଷ୍ପତ୍ତି ନେଇଛନ୍ତି। ଚାଷୀ କହିଲେ ବୃହତ୍ ଚାଷୀ, ମଧ୍ୟମ ଚାଷୀ, କ୍ଷୁଦ୍ରଚାଷୀ, ଭାଗଚାଷୀ। ଏମାନଙ୍କ ମଧ୍ୟରୁ ଯେଉଁମାନେ ଜମି ମାଲିକ, ସେମାନେ ଧାନ ବିକିବାକୁ ଜମି ରେଜିଷ୍ଟ୍ରେଶନ କରିଥିବେ। ତେବେ ସେମାନଙ୍କ ନାମରେ ଟୋକନ ଆସିବ। ବର୍ତ୍ତମାନ ସୁଦ୍ଧା ଜମି ମାଲିକମାନେ ଜମି ରେଜିଷ୍ଟ୍ରେଶନ କରିବାରେ ନିରାଶ ହୋଇ ଆସିଛନ୍ତି। ଚଳିତ ଖରିଫ ଚାଷରେ ଜମି ମାଲିକମାନେ ଜମି ରେଜିଷ୍ଟ୍ରେଶନ କରିନାହାନ୍ତି। ବର୍ଷବର୍ଷ ଧରି ଧାନଚାଷରେ ବହୁ ଖର୍ଚ୍ଚାନ୍ତ ହୋଇ ଜମି ମାଲିକମାନେ ଉପଯୁକ୍ତ ମୂଲ୍ୟରେ ବିକ୍ରି କରି ପାରୁନାହାନ୍ତି, ଫଳରେ ଭାଗଚାଷୀମାନଙ୍କୁ ଜମି ଭାଗ ଦେଇ ଦେଉଛନ୍ତି। ଯୁଗ ଯୁଗ ଧରି ଯେଉଁ ମୂଲିଆମାନେ ଜମି ମାଲିକ ପାଖରେ ମୂଲ ଲାଗୁଥିଲେ, ସେମାନେ ଅଧା ଫସଲ ଭାଗ ଦେଇ ମଧ୍ୟ ଜମିକୁ ହାତକୁ ଆଣି ମହାଖୁସି। କିନ୍ତୁ ବାତ୍ୟା, ବନ୍ୟା, ମରୁଡ଼ିର କ୍ଷତି ଭରଣା କେବଳ ଜମି ମାଲିକ ପାଉଥିବାରୁ ଘରୋଇ ଋଣ ଶୁଝି ନ ପାରି ଭାଗଚାଷୀ ସର୍ବସ୍ବାନ୍ତ ହୋଇ ଆମତ୍ହତ୍ୟା କରୁଛନ୍ତି। ଫଳରେ ଭାଗଚାଷୀଙ୍କ ପିଲାମାନେ ଦାଦନ ଖଟିବାକୁ ବାହାର ରାଜ୍ୟକୁ ପଳାଇବାକୁ ବାଧ୍ୟ ହେଉଛନ୍ତି। ଏଥିଯୋଗୁ ଶିଳ୍ପ ବିହୀନ ବିଭିନ୍ନ ଜିଲାରେ କୃଷି ଶ୍ରମିକ ସଂଖ୍ୟା ଦ୍ରୁତ ହ୍ରାସ ପାଇଚାଲିଛି।
ପୃଥିବୀ ପ୍ରସିଦ୍ଧ କୃଷି ବିଶେଷଜ୍ଞ ସ୍ବାମୀ ନାଥନ୍ଙ୍କ ରିପୋର୍ଟ ଅନୁଯାୟୀ ଭାଗଚାଷୀ ଉତ୍ପାଦନର ଦୁଇଭାଗ ଓ ଜମି ମାଲିକ ଏକ ଭାଗ ପାଇବା ପାଇଁ ହକ୍ଦାର ହୋଇଥିଲେ ମଧ୍ୟ ଶ୍ରମିକ ଅଭାବରୁ ଭାଗଚାଷୀ ଜମି ଭାଗ ନେବାକୁ ଅନିଚ୍ଛୁକ। ଏକର ପିଛା ହାରାହାରି ୨୦ କୁଇଣ୍ଟାଲରୁ ଊର୍ଦ୍ଧ୍ୱ ଅମଳ ହେଉଥିଲେ ମଧ୍ୟ ୭ କୁଇଣ୍ଟାଲ ଜମି ମାଲିକକୁ ଦେବାକୁ ଅରାଜି। ଫଳରେ ଜମି ପଡ଼ିଆ ପଡ଼ିବା ପରିବର୍ତ୍ତେ ଅଢ଼େଇ କୁଇଣ୍ଟାଲ, ତିନି କୁଇଣ୍ଟାଲ ଭାଗରେ ଜମି ମାଲିକମାନେ ଜମି ଭାଗଦେବାକୁ ବାଧ୍ୟ ହେଉଛନ୍ତି। ଏଥିଯୋଗୁ ଜମି ମାଲିକଙ୍କ ହାତରେ ମଣ୍ଡିରେ ବିକ୍ରି କରିବାକୁ ଧାନ ରହୁ ନ ଥିବାରୁ ପୂର୍ବ ସରକାର ସମୟରେ ଜମି ରେଜିଷ୍ଟ୍ରେଶନ କରିବାରୁ ବିରତ ରହିବାକୁ ବାଧ୍ୟ ହୋଇ ଆସିଛନ୍ତି। ଚାଷୀଙ୍କ ମଧ୍ୟରେ ପ୍ରଶ୍ନ ଉଠୁଛି, ସରକାର ୩୧୦୦ ଟଙ୍କାରେ କେଉଁମାନଙ୍କଠାରୁ ଧାନ କିଣିବେ। ଉତ୍ପାଦନର ମୂଳକର୍ତ୍ତା ଅନ୍ନଦାତା ଭାଗଚାଷୀମାନେ କିପରି ବିକ୍ରି କରିପାରିବେ ତାହା ନିର୍ଦ୍ଦିଷ୍ଟ ଭାବେ ନିଷ୍ପତ୍ତି ହେବା ଆବଶ୍ୟକ, ନଚେତ୍ ପଡ଼ିଶା ରାଜ୍ୟର ସୀମାକୁ ସିଲ୍ କରି ଓଡ଼ିଶାର ଉତ୍ପାଦିତ ଧାନକୁ କ’ଣ କରାଯିବ ଏବଂ ଅସାଧୁ ବ୍ୟବସାୟୀଙ୍କ ପାଇଁ ସରକାର କି କଟକଣା କରୁଛନ୍ତି ସେଥିପ୍ରତି ସମସ୍ତଙ୍କର ଦୃଷ୍ଟି ରହିଛି।
ଅପରପକ୍ଷରେ ନିରାଶ ହୋଇ ଜମି ରେଜିଷ୍ଟ୍ରେଶନରୁ ବିରତ ରହି ଟୋକନ ପାଇ ନ ଥିବା ଜମି ମାଲିକମାନଙ୍କୁ ଜିଲାପାଳଙ୍କ ଜରିଆରେ ସେମାନଙ୍କ ଜମିପଟ୍ଟା ନେଇ ଧାନ କିଣିବା ପୂର୍ବରୁ ଟୋକନ ପ୍ରଦାନର ବ୍ୟବସ୍ଥା କରାଯାଉ। ଫଳରେ ଓଡ଼ିଶାର ଜମି ମାଲିକଙ୍କ ଉତ୍ପାଦିତ ଧାନ ବିକ୍ରି ହୋଇପାରିବ। ଏହା ଫଳରେ ସରକାରଙ୍କର ଚାଷୀ ରକ୍ଷାକାରୀ ମହତ୍ ଉଦ୍ଦେଶ୍ୟ ସାଧିତ ହୋଇପାରିବ। ଜମି ମାଲିକମାନେ ଅଧିକ ଅର୍ଥ ଲାଭ କରି ଶ୍ରମିକମାନଙ୍କୁ ଅଧିକ ମଜୁରି ଦେଇ ପାରିଲେ ଦାଦନ ଶ୍ରମିକମାନେ ଅଧିକ ମଜୁରି ଆଶାରେ ଓଡ଼ିଶାକୁ ଫେରିଆସିବେ। ଏଣୁ ଓଡ଼ିଶାରେ ନିଶ୍ଚିତ କୃଷିର ନୂତନ ଅଭ୍ୟୁଦୟ ଘଟିବ। ଦାଦନ ଶ୍ରମିକମାନେ ଓଡ଼ିଶାକୁ ଫେରିଆସି ବାରମାସି କାମରେ ନିୟୋଜିତ ହୋଇ ପରିବାରକୁ ସ୍ବଚ୍ଛଳତାରେ ଚଳାଇ ଓଡ଼ିଶାକୁ ପ୍ରଥମ କୃଷି ରାଜ୍ୟରେ ପରିଣତ କରିପାରିବେ। ଘୋଷଣା ପ୍ରଚାର ସର୍ବସ୍ବ ନ ହୋଇ ବାସ୍ତବତାରେ ପରିଣତ ହେଲେ ଓଡ଼ିଶାବାସୀ ଆମତ୍ହରା ହେବେ, ଏହି ଅପେକ୍ଷାରେ ଚାଷୀକୁଳ।
ମୋ: ୯୭୭୭୯୭୭୯୫୮
