ଥୁଆମୂଳ ରାମପୁର, ୮ା୫ (ଦୁର୍ଗା କୀର୍ତ୍ତି) : ଓଡ଼ିଶା ପୋଲିସର ମହିଳା ଓ ଶିଶୁ ଅପରାଧ ନିରାକରଣ ଶାଖା ଏବଂ ୟୁନିସେଫ୍ର ମିଳିତ ପ୍ରୟାସରେ ଶୁକ୍ରବାର ଥୁଆମୂଳ ରାମପୁର ଥାନାରେ ‘ଜୁଭେଣ୍ଟିକା’ – କିଶୋର କିଶୋରୀଙ୍କ ସହ ପୋଲିସର ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କଳାହାଣ୍ଡି ଏସପିଙ୍କ ନିର୍ଦ୍ଦେଶକ୍ରମେ ଥାନା ଅଧିକାରୀ କୈବଲ୍ୟ ସେଠ୍ଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଆୟୋଜିତ ଏହି କାର୍ଯ୍ୟକ୍ରମରେ କିଶୋରୀମାନଙ୍କ ସୁରକ୍ଷା ଓ ମାନସିକ ସ୍ୱାସ୍ଥ୍ୟ ଭଳି ସମ୍ବେଦନଶୀଳ ପ୍ରସଙ୍ଗରେ ଆଲୋଚନା କରାଯାଇଥିଲା। ଏହି ଅବସରରେ ରାଜ୍ୟ ଆରକ୍ଷୀ ମହାନିର୍ଦ୍ଦେଶକ (DGP) ଶ୍ରୀ ଯୋଗେଶ ବାହାଦୁର ଖୁରାନିଆ ଭର୍ଚୁଆଲ ମାଧ୍ୟମରେ ଉଦ୍ବୋଧନ ଦେଇ ଏକ ଗୁରୁତର ସତର୍କବାଣୀ ଶୁଣାଇଥିଲେ। ସେ କହିଥିଲେ ଯେ, ବର୍ତ୍ତମାନର ଯୁବପିଢ଼ି ସାମାଜିକ ଗଣମାଧ୍ୟମର ନକରାତ୍ମକ ଦିଗ ଏବଂ ସାଇବର ଅପରାଧର ସହଜ ଶିକାର ହେଉଛନ୍ତି। ଏହା ସେମାନଙ୍କ ମାନସିକ ସ୍ୱାସ୍ଥ୍ୟ ଉପରେ ଗୁରୁତର ପ୍ରଭାବ ପକାଉଛି। କିଶୋରୀମାନଙ୍କୁ ସାଇବର ନିରାପତ୍ତା, ବଡି ଇମେଜ୍ (Body Image) ଏବଂ ବୁଲିଇଙ୍ଗ୍ (Bullying) ସମ୍ପର୍କରେ ସଚେତନ କରିବା ପାଇଁ ଥାନା ପରିସରରେ ସ୍ୱତନ୍ତ୍ର ଭିଡିଓ ପ୍ରଦର୍ଶନ କରାଯାଇଥିଲା। ଥୁଆମୂଳ ରାମପୁର, ଜାଗେଶ ପଦର, ଡୁମେର ପଦର ସମେତ ୭ଟି କେନ୍ଦ୍ରରୁ ଆସିଥିବା କିଶୋରୀମାନଙ୍କୁ ଥାନା ଭିତରର କାର୍ଯ୍ୟଶୈଳୀ ବୁଝାଯାଇଥିଲା। ଜଣେ ପୀଡ଼ିତା ବା ଅଭିଯୋଗକାରୀ ଥାନାକୁ ଆସିଲେ କିଭଳି ନିର୍ଭୟରେ ଶିଶୁ କଲ୍ୟାଣ ପୋଲିସ ଅଧିକାରୀ (CWPO)ଙ୍କୁ ଭେଟିବେ, DCO ରେଜିଷ୍ଟ୍ରେସନ ଏବଂ ମାମଲା ରୁଜୁ ହେବାର ପ୍ରକ୍ରିୟା ସମ୍ପର୍କରେ ବିସ୍ତୃତ ଧାରଣା ଦିଆଯାଇଥିଲା। କାର୍ଯ୍ୟକ୍ରମକୁ ଆଗେଇ ନେବାରେ SI ସୁଶାନ୍ତ ପଣ୍ଡା, SI ସନ୍ତୋଷ ସେଠୀ, SI ଭାସ୍କର ଖୋସଲା, ASI ନିତାଇପଦ ସରକାର ଏବଂ କନେଷ୍ଟବଳ ଶିବଶଙ୍କର ମାଝୀ, ପ୍ରତାପ ମାଝୀ, ସଙ୍ଗୀତା ଦୁର୍ଗା ପ୍ରମୁଖ ସକ୍ରିୟ ଭୂମିକା ଗ୍ରହଣ କରିଥିଲେ। ଏଥିସହ IRB କର୍ମଚାରୀ ଓ ଅଙ୍ଗନୱାଡି କର୍ମୀମାନେ ମଧ୍ୟ ସହଯୋଗ କରିଥିଲେ। ପୋଲିସ ଏବଂ କିଶୋରୀମାନଙ୍କ ମଧ୍ୟରେ ଥିବା ଦୂରତା କମାଇ ଏକ ସୁରକ୍ଷିତ ସମାଜ ଗଢ଼ିବା ଏହି ଅଭିଯାନର ମୂଳ ଲକ୍ଷ୍ୟ ବୋଲି ଥାନା ଅଧିକାରୀ ଶ୍ରୀ ସେଠ୍ ମତବ୍ୟକ୍ତ କରିଛନ୍ତି।