ଜେରୁଜେଲମ୍, ୯ା୮: ଗାଜା ଯୁଦ୍ଧକୁ ନେଇ ଆମେରିକା ରାଷ୍ଟ୍ରପତିଙ୍କ ପ୍ରସ୍ତାବିତ ୧୫-ସୂତ୍ରୀ ‘ବୋର୍ଡ ଅଫ୍ ପିସ୍’ ଯୋଜନାକୁ ନେଇ ଇସ୍ରାଏଲ୍ ପକ୍ଷରୁ ଆପତ୍ତି ସାମ୍ନାକୁ ଆସିଛି। ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ସ୍ପଷ୍ଟ କରିଛନ୍ତି ଯେ, ହମାସ୍ ସମ୍ପୂର୍ଣ୍ଣ ଭାବେ ଅସ୍ତ୍ର ତ୍ୟାଗ ନକରିବା ପର୍ଯ୍ୟନ୍ତ ଗାଜାରୁ ଇସ୍ରାଏଲୀ ସେନା ପଛକୁ ହଟିବ ନାହିଁ। ଇସ୍ରାଏଲୀ ମିଡିଆ ଅନୁସାରେ, ନେତନ୍ୟାହୁ କହିଛନ୍ତି ଯେ ଇସ୍ରାଏଲ୍ ହମାସ୍ର ‘ବାସ୍ତବ ଏବଂ ସମ୍ପୂର୍ଣ୍ଣ ଅନ୍ତ’ ଚାହୁଁଛି। କେବଳ ଦେଖାଇବା ପାଇଁ ସଂଗଠନକୁ ଦୁର୍ବଳ କରିଦେଲେ ସମସ୍ୟାର ସମାଧାନ ହେବ ନାହିଁ।
ଗାଜା ପ୍ରସଙ୍ଗରେ ଆମେରିକା ସହ ଆଲୋଚନା ଜାରି ରହିଥିବା ନେତନ୍ୟାହୁ କହିଛନ୍ତି । ଟ୍ରମ୍ପ ପ୍ରଶାସନର କିଛି ପ୍ରସ୍ତାବକୁ ଇସ୍ରାଏଲ୍ ସମର୍ଥନ କରୁଥିବା ବେଳେ ଅନ୍ୟ କିଛି ପ୍ରସଙ୍ଗରେ ଦେଶ ସହମତ ନୁହେଁ ବୋଲି ସେ ସ୍ପଷ୍ଟ କରିଛନ୍ତି । ଗତ ସପ୍ତାହରେ ଆମେରିକା ନେତୃତ୍ୱାଧୀନ ‘ବୋର୍ଡ ଅଫ୍ ପିସ୍’ର ନିର୍ଦ୍ଦେଶକ ନିକୋଲାୟ ମ୍ଲାଦେନୋଭ୍ ଓ ନେତନ୍ୟାହୁଙ୍କ ମଧ୍ୟରେ ବୈଠକ ହୋଇଥିବା ଜଣାପଡ଼ିଛି । ଏହି ବୈଠକ ପରେ ବୋର୍ଡ ପକ୍ଷରୁ କୁହାଯାଇଥିବା ଅନୁସାରେ, ହମାସ୍ର ସମସ୍ତ ଅସ୍ତ୍ର ଜବତ ହେବା ପରେ ହିଁ ଗାଜାରୁ ଇସ୍ରାଏଲୀ ସେନା ପ୍ରତ୍ୟାହାର କରିବ। ଏହା ପୂର୍ବରୁ ଟ୍ରମ୍ପ ଗତ ମାସରେ ଗାଜା ଯୁଦ୍ଧ ଶେଷ କରିବା ପାଇଁ ତାଙ୍କ ଯୋଜନାରେ ବଡ଼ ସଫଳତା ମିଳିଥିବା ଦାବି କରିଥିଲେ। ତାଙ୍କ ଯୋଜନାକୁ ଇସ୍ରାଏଲ୍ ଓ ହମାସ୍ ପୂର୍ବରୁ ସମ୍ମତି ଦେଇଥିବା କୁହାଯାଇଥିଲା ଏବଂ ଏହାର ଆରମ୍ଭ ଯୁଦ୍ଧବିରତିରୁ ହୋଇଥିଲା।
ଟ୍ରମ୍ପଙ୍କ ଦାବି ଅନୁସାରେ, ହମାସ୍ ଅସ୍ତ୍ର ତ୍ୟାଗ କରିବାକୁ ରାଜି ହୋଇଥିଲା। ତେବେ ଯୁଦ୍ଧବିରତି ସତ୍ତ୍ୱେ ଗାଜାରେ ଇସ୍ରାଏଲୀ ସାମରିକ କାର୍ଯ୍ୟାନୁଷ୍ଠାନକୁ ନେଇ ବିବାଦ ଜାରି ରହିଛି। ଇସ୍ରାଏଲ୍ ଓ ପାଲେଷ୍ଟାଇନ୍ ମଧ୍ୟରେ ଦୀର୍ଘଦିନ ଧରି ଜମିର ଅଧିକାର, ସାର୍ବଭୌମତ୍ୱ ଓ ସୁରକ୍ଷାକୁ ନେଇ ବିବାଦ ଚାଲିଆସୁଛି। ୧୯୪୮ରେ ଇସ୍ରାଏଲ୍ ଗଠନ ସମୟରେ ବହୁ ସଂଖ୍ୟକ ପାଲେଷ୍ଟିନୀୟ ବିସ୍ଥାପିତ ହୋଇଥିଲେ ଏବଂ ସେମାନଙ୍କ ମଧ୍ୟରୁ ଅନେକେ ଗାଜା ପଟିରେ ଆଶ୍ରୟ ନେଇଥିଲେ। ଏହି ଐତିହାସିକ ଓ ରାଜନୈତିକ ବିବାଦ ଆଜି ମଧ୍ୟ ଏହି ଅଞ୍ଚଳରେ ତୀବ୍ର ତଣାପୋଡ଼ର ମୁଖ୍ୟ କାରଣ ହୋଇରହିଛି।