କାଠମାଣ୍ଡୁ, ୨୦ା୩: ନେପାଳ ପ୍ରଧାନମନ୍ତ୍ରୀ ପୁଷ୍କ କମଲ ଦହଲ ‘ପ୍ରଚଣ୍ଡ’ ସୋମବାର ପାର୍ଲାମେଣ୍ଟରେ ଆସ୍ଥାଭୋଟ ଜିତିଛନ୍ତି। ନେପାଳରେ ନୂଆ ସରକାର ଗଢ଼ିବାର ୩ ମାସ ମଧ୍ୟରେ ଏହା ପ୍ରଚଣ୍ଡଙ୍କର ଦ୍ୱିତୀୟ ସଂଖ୍ୟାଗରିଷ୍ଠତାର ପ୍ରମାଣ ଥିଲା। ୨୭୫ ସଦସ୍ୟ ବିଶିଷ୍ଟ ପ୍ରତିନିଧି ସଭାରେ ପ୍ରଚଣ୍ଡଙ୍କୁ ୧୭୨ ଭୋଟ ମିଳିଥିବା ବେଳେ ତାଙ୍କ ବିରୋଧରେ ୮୯ ଭୋଟ ଯାଇଥିଲା ଓ ଜଣେ ସଦସ୍ୟ ଅନୁପସ୍ଥିତ ରହିଥିଲେ। ନେପାଳୀ କଂଗ୍ରେସ, ସିପିଏନ୍-ମାଓଇଷ୍ଟ ସେଣ୍ଟର, ରାଷ୍ଟ୍ରୀୟ ସ୍ବତନ୍ତ୍ର ପାର୍ଟି, ଜନତା ସମାଜବାଦୀ ପାର୍ଟି ନେପାଳ, ସିପିଏନ୍-ୟୁନିଫାଏଡ୍ ସୋସିଆଲିଷ୍ଟ, ଲୋକତାନ୍ତ୍ରିକ ସମାଜବାଦୀ ପାର୍ଟି ନେପାଳ, ଜନମତ ପାର୍ଟି, ନାଗରିକ ଉନ୍ମୁକ୍ତି ପାର୍ଟି, ରାଷ୍ଟ୍ରୀୟ ଜନମୋର୍ଚ୍ଚା ଏବଂ ଆମ ଜନତା ପାର୍ଟି ପ୍ରଚଣ୍ଡଙ୍କ ସପକ୍ଷରେ ଭୋଟ ଦେଇଥିଲେ। ସରକାରରୁ ରାଷ୍ଟ୍ରୀୟ ପ୍ରଜାତନ୍ତ୍ର ପାର୍ଟି ଏବଂ ସିପିଏନ୍-ୟୁଏମ୍ଏଲ୍ ସମର୍ଥନ ପ୍ରତ୍ୟାହାର କରିନେବାରୁ ପ୍ରଚଣ୍ଡଙ୍କୁ ଆସ୍ଥାଭୋଟ ଲୋଡ଼ିବାକୁ ପଡ଼ିଥିଲା।
