ନୂଆଦିଲ୍ଲୀ,୧୯।୬: ଭାରତୀୟ ଦ୍ରୁତ ବୋଲର୍ ମହମ୍ମଦ ଶାମି କ୍ରିକେଟର ତିନୋଟି ଯାକ ଫର୍ମାଟରେ ଉଲ୍ଲେଖନୀୟ ପ୍ରଦର୍ଶନ କରିଛନ୍ତି। ହେଲେ ଗତ କିଛି ସମୟ ଧରି ତାଙ୍କୁ ଟି୨୦ କ୍ରିକେଟ ଖେଳିବାର ସୁଯୋଗ ମିଳୁନାହିଁ। ଏବେ ଏହାକୁ ନେଇ ଭାରତର ପୂର୍ବତନ ଦ୍ରୁତ ବୋଲର୍ ଆଶିଷ ନେହେରା ଭବିଷ୍ୟବାଣୀ କରିଛନ୍ତି। ବିଶ୍ୱକପ୍ ଲାଗି ଚୟନ ହୋଇଥିବା ଟିମ୍ରେ ଶାମି ସାମିଲ ହେବେ ନାହିଁ ବୋଲି ସେ କହିଛନ୍ତି।
କ୍ରିକ୍ବଜ ସହ ସାକ୍ଷାତକାରରେ ନେହେରା କହିଛନ୍ତି, ଏଭଳି ଲାଗୁଛି ଯେ ଶାମି ଟି୨୦ ବିଶ୍ୱକପ୍ ଲାଗି ବର୍ତ୍ତମାନର ଯୋଜନାରେ ଅନ୍ତର୍ଭୁକ୍ତ ନୁହନ୍ତି। ହେଲେ ସମସ୍ତଙ୍କୁ ତାଙ୍କ କ୍ଷମତା ବିଷୟରେ ଜଣା। ସେ ଚଳିତ ବର୍ଷ ଟି-୨୦ ବିଶ୍ୱକପ୍ ନ ଖେଳିଲେ ହେଁ ୨୦୨୩ରେ ହେବାକୁ ଥିବା ବିଶ୍ୱକପ୍ ଲାଗି ତାଙ୍କ ନାମକୁ ବିଚାର କରାଯାଇପାରେ। ଇଂଲଣ୍ଡ ବିପକ୍ଷରେ ଭାରତ ନିଜର ସର୍ବଶ୍ରେଷ୍ଠ ଖେଳାଳିଙ୍କୁ ନେଇ ଖେଳିବାକୁ ଚାହିଁବ। ଶାମି ସେମାନଙ୍କ ମଧ୍ୟରୁ ଜଣେ। ସେ ଆଇପିଏଲ୍ ପରେ ବ୍ରେକ୍ରେ ଅଛନ୍ତି। ଭାରତ ଟେଷ୍ଟ ମ୍ୟାଚ୍ ପରେ ଇଂଲଣ୍ଡ ବିପକ୍ଷ ଦିନିକିଆ ଟିମ୍ରେ ସାମିଲ କରିପାରେ ବୋଲି ସେ କହିଛନ୍ତି।
