ବୈଶିଙ୍ଗା,୧୫।୫(ଡି.ଏନ.ଏ.): ମୟୂରଭଞ୍ଜ ଜିଲା ବୈଶିଙ୍ଗା ଡାକ୍ତରଖାନା ପ୍ରତି ସରକାରୀ ଅବହେଳାକୁ ନେଇ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। କର୍ମଚାରୀ ଅଭାବ ସାଙ୍ଗକୁ ବିଭିନ୍ନ ସମସ୍ୟାରେ ଥିବା ଏହି ଡାକ୍ତରଖାନା ଉପରୁ ଲୋକଙ୍କ ଭରସା ତୁଟିବାରେ ଲାଗିଛି। ୧୮ନଂ. ଜାତୀୟ ରାଜପଥ ପାଶର୍ବରେ ଏହି ଡାକ୍ତରଖାନା ଅବସ୍ଥିତ ହୋଇଥିବାରୁ ବହୁ ସଂଖ୍ୟକ ଦୁର୍ଘଟଣା ଜନିତ ରୋଗୀ ପ୍ରତିଦିନ ଏଠାକୁ ଚିକିତ୍ସା ପାଇଁ ଆସିଥାନ୍ତି। ସାଧାରଣ ରୋଗୀଙ୍କଠାରୁ ଆରମ୍ଭ କରି ପ୍ରସୂତି, ବିଷଖିଆ, ସାପ କାମୁଡ଼ା ଆଦି ରୋଗୀ ମଧ୍ୟ ଆସିଥାନ୍ତି। ଏହି ଡାକ୍ତରଖାନାକୁ ଏକ ୧୦୮ ଆମ୍ବୁଲାନ୍ସ ଯୋଗାଇ ଦିଆଯାଇଥିଲା। ମାତ୍ର ତାହା ବୈଶିଙ୍ଗା ଅଞ୍ଚଳବାସୀଙ୍କ ସେବାରେ ନ ଲାଗି ଅଧିକାଂଶ ସମୟ ବାଲେଶ୍ୱର, ବାଲିଆପାଳ, ନୀଳଗିରି, ବାରିପଦା ଓ ରାସଗୋବିନ୍ଦପୁର ଅଞ୍ଚଳରେ ସେବା ଯୋଗାଉଥିବା ଜଣାପଡ଼ିଛି। ବିଳମ୍ବରେ ଅନ୍ୟ ହସ୍ପିଟାଲରୁ ୧୦୮ ଆମ୍ବୁଲାନ୍ସ ଆସିଲା ବେଳକୁ ଅଧିକାଂଶ ସମୟରେ ଗୁରୁତର ରୋଗୀଙ୍କର ପ୍ରାଣ ଚାଲିଯାଉ ଥିବା ଦେଖିବାକୁ ମିଳୁଛି। ଡାକ୍ତରଖାନାରେ ମୁଖ୍ୟ ଡାକ୍ତର ଅମିତ କୁମାର ନାୟକଙ୍କ ସମେତ ଡାକ୍ତର ସତ୍ୟ ପ୍ରକାଶ ଦାସ ଏବଂ ଆୟୂଷ ଡାକ୍ତର ପ୍ରସନ୍ନ ପାତ୍ର ଦାୟିତ୍ୱ ତୁଲାଉଛନ୍ତି। ଏହି ଡାକ୍ତରଖାନା ଉପରେ ନିର୍ଭର କରୁଥିବା ୫୦ ଖଣ୍ଡ ମୌଜାର ଜନସାଧାରଣ ଏଠାରୁ ବିଶେଷଜ୍ଞ ଡାକ୍ତରଙ୍କ ଚିକିତ୍ସା ସୁବିଧା ନ ପାଇ ବାଧ୍ୟ ହୋଇ ବାଲେଶ୍ୱର, ବାରିପଦା ଏବଂ କଟକ ସ୍ଥିତ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ଏହି ଡାକ୍ତରଖାନାକୁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପରିଣତ କରାଯିବା ପାଇଁ ନିର୍ବାଚିତ ଲୋକ ପ୍ରତିନିଧିମାନେ ବାରମ୍ବାର ବିଧାନସଭାରେ ଦୃଷ୍ଟି ଆକର୍ଷଣ କରିଥିଲେ ମଧ୍ୟ ସରକାରଙ୍କ ଉଦାସୀନ ମନୋଭାବ ଯୋଗୁ ଦାବି ପୂରଣ ହୋଇ ପାରୁନାହିଁ। ଡାକ୍ତରଖାନାରେ ଲାଗି ରହିଥିବା ଏଭଳି ବ୍ୟବବସ୍ଥା ସମ୍ପର୍କରେ ମୁଖ୍ୟ ଡାକ୍ତର ନାୟକଙ୍କୁ ପଚାରିବାରୁ ଯେତିକି ଷ୍ଟାଫ ଅଛନ୍ତି ସେମାନଙ୍କୁ ନେଇ କାର୍ଯ୍ୟ କରିବାକୁ ପଡୁଛି। କୌଣସି ଅଭିଯୋଗ ତାଙ୍କ ନଜରକୁ ଆସିନାହିଁ ବୋଲି କହିଛନ୍ତି।
