ନୂଆଦିଲ୍ଲୀ,୨୮ା୨:ଆସନ୍ତା ମାସ ୫ରେ ହେବାକୁ ଥିବା ଜାତୀୟ ଯୋଗ୍ୟତା ତଥା ପ୍ରବେଶିକ ପରୀକ୍ଷା(ଏନ୍ଇଇଟି)-ପିଜି ୨୦୨୩ ସ୍ଥଗିତ ରହିବ ନାହିଁ। ସ୍ଥଗିତାଦେଶ ଲାଗି ହୋଇଥିବା ଆବେଦନ ଉପରେ ହସ୍ତକ୍ଷେପ ନ କରିବାକୁ ସୁପ୍ରିମକୋର୍ଟ ସୋମବାର କହିଛନ୍ତି। ଉକ୍ତ ପ୍ରବେଶିକା ପରୀକ୍ଷା ପାଇଁ ସୋମବାର ଆଡମିଟ୍ କାର୍ଡ ଇସ୍ୟୁ ହୋଇସାରିଛି ଏବଂ ଧାର୍ଯ୍ୟ କାର୍ଯ୍ୟସୂଚୀ ଅନୁଯାୟୀ ଜୁଲାଇ ୧୫ରୁ କାଉନ୍ସେଲିଂ ଆରମ୍ଭ ହୋଇପାରେ ବୋଲି ଜାତୀୟ ପରୀକ୍ଷା ବୋର୍ଡ (ଏନ୍ବିଇ) ତରଫରୁ ଅତିରିକ୍ତ ସଲିସିଟର ଜେନେରାଲ ଐଶ୍ୱର୍ଯ୍ୟା ଭଟି କୋର୍ଟଙ୍କୁ କହିଥିଲେ। ଜଷ୍ଟିସ୍ ଏସ୍.ଆର୍. ଭଟ୍ଟ ଏବଂ ଦୀପଙ୍କର ଦତ୍ତଙ୍କ ଖଣ୍ଡପୀଠଙ୍କୁ ଐଶ୍ୱର୍ଯ୍ୟା କହିଥିଲେ, ପରୀକ୍ଷା ପରିଚାଳନା ଲାଗି ଆମ ବୈଷୟିକ ସହଯୋଗୀଙ୍କୁ ନିକଟ ଭବିଷ୍ୟତରେ ସମୟ ମିଳିବ ନାହିଁ। ଅନ୍ୟ ପକ୍ଷରେ ଇଣ୍ଟର୍ନଶିପ୍ ପାଇଁ କଟ୍-ଅଫ୍ ତାରିଖକୁ ଅଗଷ୍ଟ ୧୧ ଯାଏ ବଢ଼ାଯାଇଥିବାରୁ ପରୀକ୍ଷା ସ୍ଥଗିତ ରଖିବା ସହ ଉକ୍ତ ତାରିଖ ପରେ କାଉନସେଲିଂ କରାଇବାକୁ ପିଟିଶନର ଖଣ୍ଡପୀଠଙ୍କୁ ନିବେଦନ କରିଥିଲେ। ପ୍ରାୟ ୨.୦୯ ଲକ୍ଷ ପିଲା ପରୀକ୍ଷା ପାଇଁ ପଞ୍ଜୀକୃତ ହୋଇଥିବାରୁ ଏହାକୁ ସ୍ଥଗିତ ରଖାଗଲେ ନିକଟ ଭବିଷ୍ୟତରେ ବିକଳ୍ପ ତାରିଖ ଧାର୍ଯ୍ୟ ହୋଇପାରିବ ନାହିଁ ବୋଲି ଗତ ୨୪ ତାରିଖରେ ଏନ୍ବିଇ କୋର୍ଟଙ୍କୁ ଜଣାଇଥିଲେ। ଉଭୟ ପକ୍ଷଙ୍କୁ ଶୁଣିବା ପରେ ଖଣ୍ଡପୀଠ ହସ୍ତକ୍ଷେପ କରିବାକୁ ମନା କରିଦେଇଛନ୍ତି।
