ନୂଆଦିଲ୍ଲୀ,୨୦।୧ : କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଶନିବାର କହିଛନ୍ତି ସରକାର ଭାରତ-ମ୍ୟାନମାର ସୀମାରେ ତାରବାଡ଼ ନିର୍ମାଣ କରିବେ। ଦୁଇ ଦେଶ ମଧ୍ୟରେ ସହଜ ଗମନାଗମନକୁ ରୋକିବା ପାଇଁ ଏହି ପଦକ୍ଷେପ ନିଆଯିବ। ଶାହାଙ୍କ ଘୋଷଣା ଏପରି ଏକ ସମୟରେ ଆସିଛି ଯେତେବେଳେ ବହୁ ସଂଖ୍ୟାରେ ମ୍ୟାନମାର ସୈନିକ ଜାତିଗତ ବିବାଦରୁ ରକ୍ଷା ପାଇବା ପାଇଁ ଭାରତକୁ ପଳାଇ ଆସିଛନ୍ତି।
ଖବର ଅନୁଯାୟୀ, ଗତ ତିନି ମାସ ମଧ୍ୟରେ ପ୍ରାୟ ୬୦୦ ମ୍ୟାନମାର ସୈନିକ ସୀମା ପାର କରି ଭାରତକୁ ଆସିଛନ୍ତି। ପଶ୍ଚିମ ମ୍ୟାନମାରର ଆରାକାନ ଆର୍ମି ନାମକ ଏକ ଗୋଷ୍ଠୀ ସେମାନଙ୍କ ଶିବିରକୁ କାବୁ କରିଥିଲେ। ପରେ ସେମାନେ ମିଜୋରାମର ଲଙ୍ଗଟଲାଇ ଜିଲାରେ ଆଶ୍ରୟ ନେଇଥିଲେ। ସୀମା ଫେନସିଂ ଦୁଇ ଦେଶ ମଧ୍ୟରେ ମୁକ୍ତ ଯାତାୟାତ ବ୍ୟବସ୍ଥାକୁ ସମାପ୍ତ କରିବ ଏବଂ ଭିସା ବାଧ୍ୟତାମୂଳକ ହେବ।
୨୦୧୮ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କ ଦ୍ୱାରା ମାଗଣା ଯାତାୟାତ ବ୍ୟବସ୍ଥା (ଏଫଏମଆର) କାର୍ଯ୍ୟକାରୀ କରାଯାଇଥିଲା। ଏହା ଅଧୀନରେ ଲୋକଙ୍କୁ କୌଣସି ଅସୁବିଧା ବିନା ଦୁଇ ଦେଶ ମଧ୍ୟରେ୧୬ କିଲୋମିଟର ପର୍ଯ୍ୟନ୍ତ ଯିବାକୁ ଅନୁମତି ଦିଆଯାଇଥିଲା। ଏବେ ଏହି ବ୍ୟବସ୍ଥା ସମାପ୍ତ ହେବା ପରେ ସୀମାରେ ରହୁଥିବା ଲୋକଙ୍କୁ ଯାତ୍ରା ପାଇଁ ଭିସା ଆବଶ୍ୟକ ହେବ। ଭାରତ ଏବଂ ମ୍ୟାନମାର ମଧ୍ୟରେ ପ୍ରାୟ ୧୬୦୦ କିଲୋମିଟର ଲମ୍ବା ସୀମା ରହିଛି।
ଏହି ପ୍ରଣାଳୀ ଅଧୀନରେ ଲୋକମାନେ ସୀମା ପାସ ଦେଖାଇ ସୀମା ପାର ହୋଇ ଅନ୍ୟ ଦେଶରେ ଦୁଇ ସପ୍ତାହ ରହିପାରିବେ। ଏହି ପାସ ବୈଧତା ଏକ ବର୍ଷ ହେବ। ମ୍ୟାନମାରର ସୀମା ଭାରତର ଚାରୋଟି ରାଜ୍ୟକୁ ଛୁଇଁଛି। ଏହି ରାଜ୍ୟଗୁଡ଼ିକ ହେଉଛି ମିଜୋରାମ, ମଣିପୁର, ନାଗାଲାଣ୍ଡ ଏବଂ ଅରୁଣାଚଳ ପ୍ରଦେଶ। ଏହି ବ୍ୟବସ୍ଥାକୁ ଶେଷ କରି ସରକାର ବେଆଇନ ଇମିଗ୍ରେଶନ ବନ୍ଦ କରିବା ସହ ଉତ୍ତର ପୂର୍ବ ଭାରତରେ ଡ୍ରଗ୍ସ ଏବଂ ଅନୁପ୍ରବେଶ ବନ୍ଦ କରିବାକୁ ଚାହୁଁଛନ୍ତି।
