ମୁମ୍ବାଇ,୧୨ ।୯: ବଲିଉଡ୍ ଅଭିନେତା ସୁଶାନ୍ତ ସିଂ ମୃତ୍ୟୁ ମାମଲା ସହ ଜଡିତ ଥିବା ଡ୍ରଗ୍ସ ମାମଲାକୁ ନେଇ ଯାଞ୍ଚ କରୁଥିବା ନାରକୋଟିକ୍ସ କଣ୍ଟ୍ରୋଲ ବ୍ୟୁରୋ(ଏନ୍ସିବି) ଏବେ ପୁରା ଆକ୍ସନ ମୁଡର ରହିଛି । ଡ୍ରଗ୍ସ କାରବାର ସହ ସମ୍ପୃକ୍ତ ଥିବା ଘର ଉପରେ ଲଗାତାର ଭାବେ ଚଢାଉ ଜାରି ରଖିଛି ଏନ୍ସିବି । ଏହି କ୍ରମରେ ଏନ୍ସିବି ମମ୍ବାଇ ଓ ଗୋଆର ପାଖାପାଖି ୭ ସ୍ଥାନରେ ଚଢାଉ କରିବା ସହ ଏକ ଅନ୍ତରାଷ୍ଟ୍ରୀୟ ଡ୍ରଗ୍ସ ର୍ୟାକେଟର ପର୍ଦ୍ଦାଫାଶ କରିଛି ବୋଲି କୁହାଯାଉଛି । ଏହାସହ ବହୁ ପରିମାଣରେ ନିଶାଦ୍ରବ୍ୟ ସହ କେତେଜଣଙ୍କୁ ଗିରଫ କରାଯାଇଥିବା ଆଲୋଚନା ହେଉଛି । ଏହି ମାମଲାର ଅଭିଯୁକ୍ତ କୁହାଯାଉଥିବା ସୁଶାନ୍ତଙ୍କ ବାନ୍ଧବୀ ରିଆ ଚକ୍ରବର୍ତ୍ତି ଏନ୍ସିବିକୁ ପାଖାପାଖି ୧୧ ଜଣ ବଲିଉଡ୍ ସେଲିବ୍ରିଟିଙ୍କ ନାମ କହିଛନ୍ତି । ଯେଉଁମାନେ ଡ୍ରଗ୍ସ ବ୍ୟବହାର କରୁଥିଲେ । ସୂଚନାଯୋଗ୍ୟ, ଶୁକ୍ରବାର ଏହି ଡ୍ରଗ୍ସ ମାମଲାରେ ମୁମ୍ବାଇର ଏକ ସ୍ପେଶାଲ କୋର୍ଟ ଅଭିନେତ୍ରୀ ରିଆ ଚକ୍ରବତ୍ତ;ି, ତାଙ୍କ ଭାଇ ଶୌଭିକ ଚକ୍ରବର୍ତ୍ତି ଓ ଓ ଅନ୍ୟ ୪ ଜଣଙ୍କର ଜାମିନ ଆବେଦନକୁ ଖାରଜ କରିଦେଇଥିଲେ । ଏବେ ଏମାନେ ଜେଲରେ ରହିଛନ୍ତି ।
