ଭୁବନେଶ୍ବର, ୨୩ା୮(ବ୍ୟୁରୋ):ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଏନ୍ଡିଏରେ ସାମିଲ ହେବା ଲାଗି ସିଧାସଳଖ ପ୍ରସ୍ତାବ ମିଳିିଛି। ଦୀର୍ଘଦିନ ହେବ ବିଭିନ୍ନ ପ୍ରସଙ୍ଗରେ ଏନ୍ଡିଏକୁ ବିଜେଡି ସମର୍ଥନ କରିଆସୁଛି। ତେଣୁ ବିଜେଡି ଓ ଭାଜପା ମଧ୍ୟରେ ଏକ ଭିତିରି ବୁଝାମଣା ରହିଥିବା ନେଇ କଂଗ୍ରେସ ଅଭିଯୋଗ କରିଆସୁଛି। ରାଷ୍ଟ୍ରପତି ଏବଂ ଉପରାଷ୍ଟ୍ରପତି ନିର୍ବାଚନରେ ବିଜେଡି ଏନ୍ଡିଏକୁ ସମର୍ଥନ କରିଛି। ଏଭଳି ସ୍ଥିତିରେ ବିଜେଡି ଉଭୟ ଲୋକ ସଭା ଏବଂ ରାଜ୍ୟ ସଭାରେ ବିଭିନ୍ନ ବିଲ୍ ଆସିବା ବେଳେ ଏନ୍ଡିଏକୁ ସମର୍ଥନ କରୁଥିବା ନେଇ ଖୋଦ୍ ଜଣେ କେନ୍ଦ୍ରମନ୍ତ୍ରୀ କହିବା ପରେ ରାଜନୈତିକ ମହଲରେ ଭିନ୍ନ ପ୍ରକାର ଆଲୋଚନା ଆରମ୍ଭ ହୋଇଯାଇଛି। ଏକ ନିର୍ଦ୍ଦିଷ୍ଟ କାର୍ଯ୍ୟକ୍ରମରେ ଯୋଗଦେବା ଲାଗି ଓଡ଼ିଶା ଗସ୍ତରେ ଆସିଥିବା କେନ୍ଦ୍ର ସାମାଜିକ ନ୍ୟାୟ ଓ ସଶକ୍ତୀକରଣ ରାଷ୍ଟ୍ରମନ୍ତ୍ରୀ ରାମଦାସ ଅଠଓ୍ବାଲା ରାଜ୍ୟ ଅତିଥି ଭବନରେ ଏକ ଖବରଦାତା ସମ୍ମିଳନୀରେ ଯୋଗଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଏନ୍ଡିଏରେ ସାମିଲ ହେବା ଲାଗି ଅନୁରୋଧ କରିଛନ୍ତି। ଏହାଦ୍ୱାରା ନବୀନ ଲାଭରେ ରହିବେ ବୋଲି ସେ କହିଛନ୍ତି। କେନ୍ଦ୍ରମନ୍ତ୍ରୀ ଆହୁରି କହିଛନ୍ତି, ଉଭୟ ଲୋକ ସଭା ଏବଂ ରାଜ୍ୟ ସଭାରେ ଅନେକ ଗୁରୁତ୍ୱପୂର୍ଣ୍ଣ ବିଲ୍ ପାସ୍ ହେବା ସମୟରେ ଏନ୍ଡିଏ ସରକାରକୁ ବିଜେଡି ସହଯୋଗ କରିଆସୁଛି। ୨୦୨୪ ନିର୍ବାଚନ ବେଳକୁ ଏନ୍ଡିଏ ସହ ଯୋଡି ହେଲେ ବିଜେଡି ଅଧିକ ଲାଭରେ ରହିବ। ଓଡ଼ିଶାକୁ ମଧ୍ୟ ମୋଦି ସରକାର ଅଧିକ ଅନୁଦାନ ଦେଇପାରନ୍ତି। ୨୦୨୪ରେ ଏନ୍ଡିଏ ୨୦୧୯ର ରେଜଲ୍ଟର ରେକର୍ଡ ଭାଙ୍ଗିବ। ନବୀନ ତାଙ୍କ ଶାସନ ଆରମ୍ଭ ଏନ୍ଡିଏରୁ ହିଁ କରିଥିଲେ। ପରବର୍ତ୍ତୀ ସମୟରେ ସେ ତାଙ୍କ ନିଜ ଦମ୍ରେ ଓଡ଼ିଶାରେ ଜିତି ଆସୁଛନ୍ତି। ଲଗାତର ୨୫ ବର୍ଷ ଲୋକମାନେ ତାଙ୍କୁ ଜିତାଉଛନ୍ତି ବୋଲି ଅଠଓ୍ବାଲା କହିଛନ୍ତି। ତେବେ ନବୀନଙ୍କୁ ଏନ୍ଡିଏରେ ସାମିଲ ହେବା ନେଇ ଅଠଓ୍ବାଲା ଯାଇ ପ୍ରସ୍ତାବ ଦେବେ କି ବୋଲି ପଚାରିବାରୁ ଭାଜପା ନେତାମାନେ ପଚାରିବେ ବୋଲି କେନ୍ଦ୍ରମନ୍ତ୍ରୀ ପ୍ରତିକ୍ରିୟା ରଖିଛନ୍ତି।
ଏଭଳି ମନ୍ତବ୍ୟ ଉପରେ ଭାଜପା ରାଜ୍ୟ ସଭାପତି ସମୀର ମହାନ୍ତି କହିଛନ୍ତି, ଏ ବିଷୟରେ ସେ କିଛି ଜାଣି ନାହାନ୍ତି । ପୁଣି ଅଠାଓ୍ବାଲା କେନ୍ଦ୍ରମନ୍ତ୍ରୀ ଅଛନ୍ତି କି ବୋଲି ମଧ୍ୟ ସମୀର ପାଲଟା ପ୍ରଶ୍ନ କରିଛନ୍ତି। ତାଙ୍କ ଓଡ଼ିଶା ଗସ୍ତ ସମ୍ପର୍କରେ ଖବର ନ ଥିବା ଏବଂ ସେ ଭାଜପାର ନୁହନ୍ତି ବୋଲି ସମୀର କହିଥିଲେ।
