ବ୍ରହ୍ମପୁର,୨୮ା୪(ନରସିଂହ ସାହୁ):ଗଞ୍ଜାମ ଜିଲାରୁ ରାଜନୀତି ଆରମ୍ଭ କରିଥିବା ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କ ପାରମ୍ପରିକ ବିଧାନସଭା କ୍ଷେତ୍ର ହିଞ୍ଜିଳିରୁ ଏଥର ଷଷ୍ଠଥର ପାଇଁ ମଇଦାନକୁ ଓହ୍ଲାଇଛନ୍ତି। ସେହିପରି ବର୍ତ୍ତମାନର ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ ଭଞ୍ଜନଗର ଆସନରେ ସପ୍ତମ ଥର ପ୍ରତିଦ୍ୱନ୍ଦ୍ୱିତା କରୁଛନ୍ତି। ଅନ୍ୟପକ୍ଷରେ ପୂର୍ବତନ ମନ୍ତ୍ରୀ ଶ୍ରୀକାନ୍ତ ସାହୁ ପୋଲସରା କ୍ଷେତ୍ରରୁ ହ୍ୟାଟ୍ରିକ ଲକ୍ଷ୍ୟ ରଖି ମଇଦାନରେ ଅଛନ୍ତି। କବିସୂର୍ଯ୍ୟନଗରରୁ ଲତିକା ପ୍ରଧାନ, ଆସିକାରୁ ମଞ୍ଜୁଳା ସ୍ବାଇଁ, ଖଲିକୋଟରୁ ସୂର୍ଯ୍ୟମଣି ବୈଦ୍ୟ ଦ୍ୱିତୀୟ ଥର ଲେଖାଏଁ ଭୋଟ ଲଢ଼େଇ ପାଇଁ ପ୍ରସ୍ତୁତ ହୋଇଛନ୍ତି। ଛତ୍ରପୁରରୁ ସୁବାସ ବେହେରା ମଧ୍ୟ ଦ୍ୱିତୀୟ ଥର ବିଜେଡିରୁ ରିପିଟ ହୋଇଛନ୍ତି।
୨୦୧୯ ନିର୍ବାଚନରେ ବ୍ରହ୍ମପୁର ବିଧାନସଭା କ୍ଷେତ୍ରରୁ ବିଜେଡି ପ୍ରାର୍ଥୀ ଭାବେ ବିପୁଳ ଭୋଟ ବ୍ୟବଧାନରେ ନିର୍ବାଚିତ ହୋଇଥିବା ବିକ୍ରମ କୁମାର ପଣ୍ଡାଙ୍କୁ ଏଥର ଗୋପାଳପୁର ପ୍ରାର୍ଥୀ କରାଯାଇଛି। ସେ ମଧ୍ୟ ଦ୍ୱିତୀୟ ଥର ଶଙ୍ଖ ଦଳରୁ ପ୍ରାର୍ଥୀ ହୋଇଛନ୍ତି। ପୂର୍ବରୁ ୫ ଥର ବିଧାନସଭାକୁ ଜନତା ଦଳ ଓ ବିଜେଡି ବିଧାୟକ ହୋଇଥିବା ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକଙ୍କୁ ବ୍ରହ୍ମପୁର କ୍ଷେତ୍ରରୁ ବିଜେଡି ପ୍ରାର୍ଥୀ କରିଛି। ସେ ଏଥର ପଦ୍ମ ଦଳ ସହ କଡ଼ା ମୁକାବିଲାର ସାମ୍ନା କରୁଛନ୍ତି। ଅନ୍ୟପକ୍ଷରେ ଚିକିଟିରୁ ଉଷା ଦେବୀ ଓହରିଯାଇ ତାଙ୍କ ପୁଅ ଚିନ୍ମୟାନନ୍ଦ ଦେବ ବିଜେଡି ଟିକେଟ ପାଇଛନ୍ତି। ଦିଗପହଣ୍ଡିର ଶଙ୍ଖ ଦଳ ପକ୍ଷରୁ ସୂର୍ଯ୍ୟ ପାତ୍ରଙ୍କ ପୁଅ ବିପ୍ଲବଙ୍କୁ ବିଜେଡି ପ୍ରାର୍ଥୀ କରିଛି। ସୋରଡ଼ା ବିଧାୟକ ପୂର୍ଣ୍ଣଚନ୍ଦ୍ର ସ୍ବାଇଁଙ୍କ ସ୍ତ୍ରୀ ସଂଘମିତ୍ରା ସ୍ବାଇଁ ବିଜେଡି ପ୍ରାର୍ଥୀ ହୋଇଛନ୍ତି। ସେହିପରି ସାନଖେମୁଣ୍ଡି ଆସନରୁ ପୂର୍ବତନ ବିଧାୟିକା ନନ୍ଦିନୀ ଦେବୀଙ୍କ ଝିଅ ସୁଲକ୍ଷଣା ଗୀତାଞ୍ଜଳିଙ୍କୁ ବିଜେଡି ଟିକେଟ ମିଳିଛି।
ବିପ୍ଲବ, ଚିନ୍ମୟାନନ୍ଦ, ସୁଲକ୍ଷଣା ଓ ସଂଘମିତ୍ରା ପ୍ରଥମଥର ନିର୍ବାଚନ ରଣାଙ୍ଗନକୁ ଓହ୍ଲାଇଛନ୍ତି। ଏହି ୪ ଜଣଙ୍କ ମଧ୍ୟରୁ ୩ ଜଣ ଭାଜପା ଓ ଜଣେ କଂଗ୍ରେସର ଟାଣୁଆ ନେତାଙ୍କ ସହ ଲଢ଼େଇ କରିବାର ସ୍ପଷ୍ଟ ହୋଇଛି। ଜିଲାର ୧୩ ବିଧାନସଭା କ୍ଷେତ୍ର ମଧ୍ୟରୁ ୫ ଆସନରେ ଗତ ନିର୍ବାଚନ ଭଳି ବିଜେଡି ମହିଳା ପ୍ରାର୍ଥୀ ଦେଇଥିବା ବେଳେ ଭାଜପା ଜଣେ ବି ମହିଳାଙ୍କୁ ପ୍ରାର୍ଥୀ କରିନାହିଁ। କଂଗ୍ରେସ କେବଳ ଆସିକାରେ ମହିଳା ପ୍ରାର୍ଥୀ ଦେଇଛି। ହିଞ୍ଜିଳି ବ୍ୟତୀତ ଅନ୍ୟ ଆସନଗୁଡ଼ିକରେ ମୁଖ୍ୟ ବିରୋଧୀ ଦଳ ପ୍ରାର୍ଥୀଙ୍କ ସହ ବିଜେଡିର ଫାଇଟ ହେବାର ଆଶଙ୍କା କରାଯାଉଛି।
