ବେଙ୍ଗାଲୁରୁ,୧୩।୨:କୁହାଯାଏ, ସମୟ ବଡ଼ ବଳବାନ। ସମୟକୁ ଅପେକ୍ଷା କଲେ ପରିଶ୍ରମର ଫଳ ନିଶ୍ଚେ ମିଳିଥାଏ। ଆଇପିଏଲ୍ ୨୦୨୨ର ନିଲାମରେ ଏହିପରି ଜଣେ ଖେଳାଳିଙ୍କ ଭାଗ୍ୟ ବଦଳିଯାଇଛି।ସେ ହେଉଛନ୍ତି ନବଦୀପ ସଇନି। ତାଙ୍କୁ ଆଇପିଏଲ ୨୦୨୨ର ମେଗା ନିଲାମରେ ୨.୬ କୋଟି ଟଙ୍କା ମିଳିଛି। ଏହି ମାରାତ୍ମକ ଖେଳାଳି ଏକଦା ୨୦୦ ଟଙ୍କା ପାଇଁ କ୍ରିକେଟ ଖେଳୁଥିଲେ, କିନ୍ତୁ ବର୍ତ୍ତମାନ ସେ କୋଟିପତି ହୋଇପାରିଛନ୍ତି।
ରାଜସ୍ଥାନ ରୟାଲ୍ସ ଟିମ ଇଣ୍ଡିଆର ମାରାତ୍ମକ ଦ୍ରୁତ ବୋଲର ନବଦୀପ ସଇନିଙ୍କୁ ଆଇପିଏଲ ୨୦୨୨ର ମେଗା ନିଲାମରେ ୨୦୬ କୋଟିରେ କିଣିଛି। ୨୯ ବର୍ଷୀୟ ଡାହାଣହାତୀ ଦ୍ରୁତ ବୋଲର ସଇନିଙ୍କର କ୍ରମାଗତ ଭାବରେ ୧୪୫-୧୫୦ କିଲୋମିଟର ବେଗରେ ବଲ ପକାଇବାର କ୍ଷମତା ଅଛି।ସେ ଟିମ ଇଣ୍ଡିଆ ପାଇଁ କ୍ରିକେଟର ତିନୋଟି ଫର୍ମାଟରେ ଖେଳନ୍ତି।
ସଇନି ଘରୋଇ କ୍ରିକେଟରେ ଦିଲ୍ଲୀ ପାଇଁ ଖେଳନ୍ତି, ସେ କିନ୍ତୁ ହରିୟାଣାର କର୍ଣ୍ଣଲରୁ ଆସିଛନ୍ତି। କମ୍ ଲୋକ ଜାଣିଥିବେ ଯେ ଏପରି ଏକ ସମୟ ଥିଲା ଯେତେବେଳେ ସଇନି କର୍ଣ୍ଣଲରେ ସ୍ଥାନୀୟ ଟୁର୍ନାମେଣ୍ଟରେ ଖେଳିବା ପାଇଁ ପ୍ରତି ମ୍ୟାଚରେ ୨୦୦ ଟଙ୍କା ପାଉଥିଲେ। ଆଉ ଏକ କୌତୁହଳର ବିଷୟ ହେଉଛି ଯେ ୨୦୧୩ ପର୍ଯ୍ୟନ୍ତ ସଇନି ଚମଡ଼ା ବଲ ନୁହେଁ,ଟେନିସ ବଲ କ୍ରିକେଟ ଖେଳୁଥିଲେ। ଦିଲ୍ଲୀର ପୂର୍ବତନ ବୋଲର ସୁମିତ ନରୱାଲ କର୍ଣ୍ଣଲ ପ୍ରିମିୟର ଲିଗରେ ନବଦୀପଙ୍କ ବୋଲିଂ ଦେଖି ବହୁତ ପ୍ରଭାବିତ ହୋଇଥିଲେ। ଏହା ପରେ ସଇନିଙ୍କୁ ଦିଲ୍ଲୀ ଡକାଯାଇଥିଲା। ଦିଲ୍ଲୀରେ ସେ ଗୌତମ ଗମ୍ଭୀରଙ୍କୁ ନେଟ ଅଭ୍ୟାସରେ ସାହାଯ୍ୟ କରିଥିଲେ। ଗୌତମ ଗମ୍ଭୀର ତାଙ୍କ ବୋଲିଂ ଦେଖି ଆଶ୍ଚର୍ଯ୍ୟ ହୋଇଗଲେ ଏବଂ ନେଟ ଅଭ୍ୟାସ ପାଇଁ ପ୍ରତିଦିନ ଆସିବାକୁ କହିଥିଲେ। ଗୌତମ ଗମ୍ଭୀର ତାଙ୍କୁ ସମର୍ଥନ କରି ଦିଲ୍ଲୀ ରଣଜୀ ଦଳରେ ଚୟନ କରିଥିଲେ। ୨୦୧୩-୧୪ରେ ସେ ଦିଲ୍ଲୀ ରଣଜୀ ଦଳରେ ମନୋନୀତ ହୋଇଥିଲେ। ଯାହା ପରେ ସେ ଆଉ ପଛକୁ ଚାହିଁ ନ ଥିଲେ। ୨୦୧୮ରେ ଆଫଗାନିସ୍ତାନ ବିପକ୍ଷ ଏକମାତ୍ର ଟେଷ୍ଟ ପାଇଁ ପ୍ରଥମ ଥର ପାଇଁ ସାଇନି ଅନ୍ତର୍ଜାତୀୟ ଦଳରେ ସାମିଲ ହୋଇଥିଲେ।
