ଛତ୍ରପୁର,୧୭।୮(ଦିଲ୍ଲୀପ ସାମଲ/ଦ୍ୱାରକା ପଟ୍ଟନାୟକ): ରାଞ୍ଚିଠାରେ ହୋଇଥିବା ୧୬୧ତମ କେନ୍ଦ୍ରୀୟ କାର୍ଯ୍ୟ ସମିତିର ନିଷ୍ପତ୍ତି କ୍ରମେ ଭାରତୀୟ ମଜଦୁର ସଂଘ(ବିଏମ୍ଏସ) ପକ୍ଷରୁ ସୋମବାର ସ୍ଥାନୀୟ ଜିଲାପାଳ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି। ସଂଘ ପକ୍ଷରୁ ୧୨ ଦଫା ଦାବି ନେଇ ଅତିରିକ୍ତ ଜିଲାପାଳ ଦେବଦତ୍ତ ପଣ୍ଡାଙ୍କୁ ପ୍ରଧାନମନ୍ତ୍ରୀ ଏବଂ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରାଯାଇଛି। ଏହି ପ୍ରତିବାଦ ଭାରତର ସମସ୍ତ ଜିଲା ମୁଖ୍ୟାଳୟ ସମ୍ମୁଖରେ ଆୟୋଜନ କରାଯାଇଥିବା ସଂଘର ରାଜ୍ୟ କାର୍ଯ୍ୟକାରିଣୀ ସଦସ୍ୟ ଲିଙ୍ଗରାଜ ସାହୁ କହିଛନ୍ତି। ପ୍ରତିବାଦର ମୁଖ୍ୟ ଉଦ୍ଦେଶ୍ୟ ଶ୍ରମିକମାନଙ୍କ ସମସ୍ୟାର ତୁରନ୍ତ ସମାଧାନ ପାଇଁ ସରକାରଙ୍କ ନିକଟରେ ଦାବି କରାଯାଇଛି।
ସଂଘ ପକ୍ଷରୁ ଦାବିପତ୍ରରେ ଉଲ୍ଲେଖ କରାଯାଇଛି ଯେ, ଭାରତୀୟ ମଜଦୁର ସଂଘର ମୁଖ୍ୟ ଦାବିଗୁଡ଼ିକ ମଧ୍ୟରେ ଇଏସଆଇସି ବେତନ ସୀମାକୁ ୨୧୦୦୦ରୁ ଟଙ୍କା ୪୨,୦୦୦କୁ ବୃଦ୍ଧି କରିବା, ଇପିଏଫ ନ୍ୟୁନତମ ପେନସନକୁ ଟଙ୍କା ୧୦୦୦ରୁ ଟଙ୍କା ୭,୫୦୦କୁ ବୃଦ୍ଧି କରିବା, ଇପିଏଫ ବେତନ ସୀମାକୁ ୩୦ ହଜାର ଟଙ୍କା କରିବା ଏପରିକି ବୋନସ ଗଣନା ସୀମାକୁ ଟଙ୍କା ୧୮,୦୦୦ କରିବା, ବୋନସ ଯୋଗ୍ୟତା ସୀମାକୁ ଟଙ୍କା ୪୨,୦୦୦ କରିବା, ସ୍କିମ ଶ୍ରମିକମାନଙ୍କ(ଅଙ୍ଗନୱାଡ଼ି, ଆଶା ଇତ୍ୟାଦି) ମାନଦେୟ ବୃଦ୍ଧି, ଚୁକ୍ତିଭିତ୍ତିକ ଶ୍ରମିକଙ୍କୁ ସମାନ କାମକୁ ସମାନ ବେତନ ସୁନିଶ୍ଚିତ କରିବା, ଶ୍ରମ ଆଇନରୁ ଶ୍ରମିକ ବିରୋଧୀ ଧାରାଗୁଡ଼ିକୁ ବିଲୋପ କରିବା, ବ୍ୟାଙ୍କ କର୍ମଚାରୀମାନଙ୍କ ପାଇଁ ପାଞ୍ଚ ଦିନିଆ କାର୍ଯ୍ୟ ସପ୍ତାହ ଲାଗୁକରିବା, ଗ୍ରାଚୁଇଟି ସୀମାକୁ ୪୦ଲକ୍ଷ କୁ ବୃଦ୍ଧି କରିବା, କେନ୍ଦ୍ରୀୟ ନ୍ୟୁନତମ ବେତନକୁ ୩୦,୦୦୦ ଟଙ୍କା ପ୍ରତିମାସ ନର୍ଦ୍ଧାରଣ କରିବା ଓ ଜୀବନ ବୀମା ନିଗମରେ କାର୍ଯ୍ୟରତ ଡେଭଲପମେଣ୍ଟ ଅଫିସରମାନଙ୍କ ପାଇଁ ପୂର୍ଣ୍ଣ ଦାବିର ସୁରକ୍ଷା ଆଦି ଦାବି କରିଛନ୍ତି।
ଏହି ପରିପ୍ରେକ୍ଷୀରେ ଏକ ସାଧାରଣ ସଭା ଆୟୋଜନ ହୋଇଥିଲା ଏଥିରେ ଗଞ୍ଜାମ ଜିଲା ଭାରତୀୟ ମଜଦୁର ସଂଘ ଅନୁବନ୍ଧିତ ଅଙ୍ଗନବାଡ଼ି କର୍ମୀ ସଂଘ, ଆଶା କର୍ମୀ ସଂଘ, ନିର୍ମାଣ ଶ୍ରମିକ ସଂଘ, ଆଇଆର୍ଇଏଲ ଶ୍ରମିକ ସଂଘ, ବିଦ୍ୟୁତ କର୍ମଚାରୀ ସଂଘ, ପୋଷ୍ଟ କର୍ମଚାରୀ ସଂଘ ସହ ଅନେକ ଶ୍ରମିକ ଏବଂ କର୍ମଚାରୀ ଯୋଗ ଦେଇଥିଲେ। ଭାରତୀୟ ମଜଦୁର ସଂଘ ପକ୍ଷରୁ ରାଜ୍ୟ କାର୍ଯ୍ୟକାରିଣୀ ସଦସ୍ୟ ଲିଙ୍ଗରାଜ ସାହୁ, ତପସୀ ନାୟକ ଆଞ୍ଚଳିକ ରାଜ୍ୟ କୋଷାଧ୍ୟକ୍ଷା ମମତା ମହାନ୍ତି ଏବଂ ବିଭିନ୍ନ ସଂଘଠନର ପ୍ରମୁଖ କର୍ମକର୍ତ୍ତା ଉପସ୍ଥିତ ଥିଲେ।