ଦିଗପହଣ୍ଡି,୧୬।୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ କଙ୍କୋରଡ଼ା ଗ୍ରାମସ୍ଥିତ ସ୍ନାତକ ବିଜ୍ଞାନ ମହାବିଦ୍ୟାଳୟ ଓଡ଼ିଆ ଭାଷା ସାହିତ୍ୟ ବିଭାଗ ପକ୍ଷରୁ ସୋମବାର ଏକ ଦିବସୀୟ ଜାତୀୟ ଆଲୋଚନା ଚକ୍ର ଅନୁଷ୍ଠିତ ହୋଇଯାଇଛି।
କଲେଜ ଅଧ୍ୟକ୍ଷ ଡ଼. ସନ୍ତୋଷ କୁମାର ପାଢ଼ୀଙ୍କ ପୌରାହିତ୍ୟରେ ଆୟୋଜିତ ଉଦଘାଟନୀ ଅଧିବେଶନରେ ‘ସମକାଳୀନ ଓଡ଼ିଆ ସାହିତ୍ୟରେ ଜୀବନଚିତ୍ର’ ଶୀର୍ଷକ ଆଲୋଚନାଚକ୍ରରେ ମୁଖ୍ୟଅତିଥି ଭାବେ ବିଶିଷ୍ଟ ସାହିତି୍ୟକ ତଥା ଅବସରପ୍ରାପ୍ତ କଲେଜ ଅଧ୍ୟକ୍ଷ ଡ଼. ସୁରେନ୍ଦ୍ରନାଥ ପାଣିଗ୍ରାହୀ, ମୁଖ୍ୟ ଆଲୋଚକ ଭାବେ ଆନ୍ଧ୍ରପ୍ରଦେଶ ସୀତମପେଟା ସରକାରୀ ସ୍ନାତକ କଲେଜ ଅଧ୍ୟକ୍ଷ ଡ଼. ସୁଶାନ୍ତ ଜେନା, ସମ୍ମାନିତ ଅତିଥି ଭାବେ ପ୍ରାକ୍ତନ ଅଧ୍ୟକ୍ଷ ଡ଼. ହରିକୃଷ୍ଣ ନାୟକ, ଅଧ୍ୟାପକ ତଥା ନାଟ୍ୟକାର ଗୋପାଳ ମହାରଣା, ଆଇନଜୀବୀ ତଥା ସାହିତି୍ୟକ କୁରେଶୁ ପଣ୍ଡା ପ୍ରମୁଖ ମଞ୍ଚାସୀନ ଥିଲେ।
ଓଡ଼ିଆ ବିଭାଗ ମୁଖ୍ୟ ଅଧ୍ୟାପକ ସିଲୁ ମଣ୍ଡଳଙ୍କ ତତ୍ତ୍ୱାବଧାନରେ ଅନୁଷ୍ଠିତ ଆଲୋଚନାଚକ୍ରରେ ଅଧ୍ୟାପକ ସୀମାଞ୍ଚଳ ପ୍ରଧାନ ସଂଯୋଜନା କରିଥିଲେ। କାର୍ଯ୍ୟକ୍ରମର ଦ୍ୱିତୀୟାର୍ଦ୍ଧରେ ଡ଼. ସୁରେନ୍ଦ୍ରନାଥ ପାଣିଗ୍ରାହୀ ସଭାପତିତ୍ୱ କରିଥିଲେ।
ଓଡ଼ିଆ କାବ୍ୟ କବିତା, ଗଳ୍ପ ପ୍ରବନ୍ଧ ଉପନ୍ୟାସ ଓ ନାଟକରେ ଜୀବନ ଚିତ୍ର ସମ୍ପର୍କିତ ବୈଷୟିକ ଅଧିବେଶନରେ ଆଲୋଚକ ଭାବେ ଡ଼. ସୁଶାନ୍ତ ଜେନା ଦିକ୍ଷାନ୍ତ ଅଭିଭାଷଣ ପ୍ରଦାନ କରିଥିଲେ। ଗବେଷକ ସତ୍ୟନାରାୟଣ ମିଶ୍ର, ଗୋପାଳପୁର କଲେଜ ଓଡ଼ିଆ ଅଧ୍ୟାପକ ଡ଼. ରାଜେନ୍ଦ୍ର କୁମାର ମହାପାତ୍ର, ଗଜପତି ଜିଲା ମୋହନା କଲେଜ ଇଂରାଜି ଅଧ୍ୟାପକ ଡ଼. ପ୍ରଣବାନନ୍ଦ ପାଟ୍ଟଯୋଷୀ, ରାୟଗଡ଼ା କଲେଜ ଅଧ୍ୟାପକ ସୌଦାଗର ସିୟ, ପାଟପୁର କଲେଜ ଅଧ୍ୟାପକ କୁରେଶୁ ମହାରଣା, ଅଧ୍ୟାପିକା ଡ଼. ବାସନ୍ତି ନାୟକ, ଅଧ୍ୟାପକ ଲିଙ୍ଗରାଜ ରଥ, ଛାତ୍ରୀ ଆରାଧନା ପାତ୍ର, ଶୁଭଶ୍ରୀ ବିଷୋୟୀ, ଅଧ୍ୟାପକ ପ୍ରଶାନ୍ତ କୁମାର ପଟ୍ଟନାୟକ, ଶିବରାମ ସାହୁ ପ୍ରମୁଖ ବିଷୟ ଶୀର୍ଷକ ପ୍ରବନ୍ଧ ଉପସ୍ଥାପନା କରିଥିଲେ।
ଏହି ଅବସରରେ କଲେଜ ଓଡ଼ିଆ ବିଭାଗ ପକ୍ଷରୁ ସ୍ମରଣିକା ’ସ୍ୱର୍ଣ୍ଣପ୍ରଭା’କୁ ଅତିଥିମାନେ ଉନ୍ମୋଚନ କରିଥିଲେ। ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟର ସ୍ନାତକୋତ୍ତର ଛାତ୍ର ଡମ୍ୱରୁ ରାଉତ ଦିଗପହଣ୍ଡିର ଜଣାଶୁଣା ସାହିତ୍ୟକ କୁରେଶୁ ପଣ୍ଡାଙ୍କ ପ୍ରକାଶିତ ‘ମୁଠାଏ ଆକାଶ’ ଗଳ୍ପ ସଙ୍କଳନର ନେତା ଆସିଛି ଶୀର୍ଷକ ଗଳ୍ପକୁ ସମୀକ୍ଷା କରିଥିବା ବେଳେ ଅଧ୍ୟାପିକା ଡ଼.ବାସନ୍ତୀ ନାୟକ ନୂଆବର୍ଷର କବିତା ସଙ୍କଳନରେ ପ୍ରକାଶିତ ‘ସଂସ୍କାରକ’ ଶୀର୍ଷକ କବିତାକୁ ‘ସୱର୍ଣ୍ଣପ୍ରଭା’ ସ୍ମରଣିକାରେ ସମୀକ୍ଷା କରିଥିବା ଜଣାପଡିଛି।
